dëgjoni

Pu Cunxini është një nga aktorët më të famshëm dramatikë në Kinë dhe ka pasur sukses të madh në interpretimin në film dhe në dramë televizive. Njëkohësisht ai merr pjesë aktivisht në çështjen e ndihmës shoqërore dhe është propagandist i parandalimit të Sidës.

Pu Cunxini lindi në vitin 1953 në një familje artistësh në Pekin. Babai i tij ishte një nga aktorët e parë të Teatrit Artistik Popullor të Pekinit që u krijua në vitin 1952. Si një teatër në shkallë shtetërore, gjatë mbi 50 vjetëve, Teatri Artistik Popullor i Pekinit ka shfaqur rreth 300 drama kineze dhe të huaja të stileve të ndryshme dhe ka përgatitur shumë artistë të shquar. Sot ky teatër është bërë një nga simbolet më të spikatura kulturore të Pekinit. Pu Cunxini është zv-drejtori i Teatrit Artistik Popullor të Pekinit, duke folur për ndikimin e teatrit mbi të, ai tha:

"Teatri Artistik Popullor i Pekinit ka ushtruar ndikim të madh mbi jetën time artistike. Jam një pasardhës i artistëve të vjetër të këtij teatri dhe kam mësuar shumë nga ata."

Fëmijëria e Pu Cunxinit kaloi në skenën e Teatrit Artistik Popullor të Pekinit. Babai i tij e sillte shpesh atë në teatër për të shikuar shfaqje ose prova. Edhe në shtëpi, Pu Cunxini i vogël shihte shpesh shumë aktorë që diskutonin për dramat.

Kur ishte në moshën 2 vjeçare, Pu Cunxini u prek nga poliomieliti që i shkaktoi të meta fizike në këmbë. Për të kapërcyer vështirësitë e sjella nga sëmundja dhe për t'u shëruar sa më parë, Pu Cunxini i fortë mori pjesë në sporte të ndryshme si basketboll, not etj. Gjatë Revolucionit Kulturor, si shumë nxënës dhe të rinj, 16-vjeçari Pu Cunxini u largua nga qyteti dhe shkoi në fshat në verilindje të Kinës për punë. Ai punoi në fshat për 8 vjet, gjatë kësaj periudhe ai jepte nganjëherë shfaqje artistike.

Pas përfundimit të Revolucionit Kulturor, në vitin 1977, Pu Cunxini u kthye në Pekin dhe hyri në një trupë artistike për të interpretuar dramë. Për shkak të interpretimit të shquar në skenë, më vonë ai u pranua në Teatrin Artistik Popullor të Pekinit. Pu Cunxini kujton:

"Jam rritur qysh në moshë të re në mjedisin e dramës dhe është një gjë e natyrshme që të bëhem aktor dramatik. Isha shumë i mallëngjyer kur u ngjita për herë të parë në skenën e Teatrit Artistik Popullor. Kur isha i vogël, shikoja vetëm shfaqje poshtë skenës dhe nuk u ngjita asnjëherë në skenë. Deri sot, kam interpretuar në këtë skenë për mbi 20 vjet, mendoj se jam një aktor fatmirë."

Kur ishte në moshën 33-vjeçare, Pu Cunxini u bë aktori kryesor i Teatrit Artistik Popullor të Pekinit. Përvoja e pasur e jetës e ka ndihmuar të interpretojë me sukses personazhe të ndryshme në skenë. Në shumë drama klasike të këtij teatri që shfaqen herë pas here si "Çajtorja", "Stuhi me gjëmë" etj. Pu Cunxini ka interpretuar personazhin kryesor. Viti i kaluar ishte 100-vjetori i lindjes së dramës kineze. Në atë vit, Pu Cunxini interpretoi personazhin kryesor në 8 drama duke dhënë mbi 120 shfaqje.

Pu Cunxini është i famshëm jo vetëm për shkak të veprave artistike të tij, por edhe për shkak të pjesëmarrjes aktive në çështjen e ndihmës shoqërore. Vitet e fundit, ai ka marrë pjesë në shumë punë të ndihmës shoqërore si propaganda për ndalimin e drogës, parandalimin e Sidës etj. Duke folur për çështjen e ndihmës shoqërore, Pu Cunxini tha:

"Jam i mendimit se është një gjë e gëzueshme që shumë njerëz marrin pjesë në çështjen e ndihmës shoqërore. Edhe unë jam shumë i gëzuar që kam marrë pjesë për shumë vjet në këtë çështje. Shpresoj se çështja e ndihmës shoqërore do të bëhet pjesë e jetës së njerëzve, sepse kjo çështje do t'u sjellë njerëzve shumë gëzime."

Në fund të marsit të këtij viti, si përfaqësues i qarqeve të ndryshme shoqërore kineze dhe si mbajtës i pishtarit, Pu Cunxini shkoi në Greqi për të pritur dërgimin e zjarrit të shenjtë olimpik në Pekin. Pu Cunxini është edhe vullnetar i Lojërave Paralimpike të Pekinit. Këtë vit ai do të jetë i ngarkuar me shumë punë lidhur me Lojërat Olimpike. Për shembull gjatë Lojërave Olimpike të Pekinit do të zhvillohet veprimtaria e stinës së dramave klasike të Teatrit Artistik Popullor të Pekinit dhe Pu Cunxini do të interpretojë personazhin kryesor në disa drama. (Fani)