Para mbi 10 vjetëve, një fëmijë fshatar shikoi një film dhe i lindi ëndrra për t'u bërë aktor kinemaje. Sot me përpjekjet e palodhshme, ky djalë fshatar është bërë një nga aktorët e rinj më të mirëpritur në Kinë, personazhet me natyrën e thjeshtë të interpretuar nga ai në film dhe në drama televizive kanë fituar përshëndetjen e gjerë të shikuesve. Ai është aktori i ri Wang Baoqiang.

Në vjeshtë të vitit të kaluar, drama televizive me seri "Ushtarët" ngjalli jehonë të madhe në mbarë vendin duke tërhequr shumë shikues. Në këtë dramë televizive që përshkruan jetën e ushtarëve, Wang Baoqiangu interpretoi personazhin kryesor Xu Sanduo, një ushtar i ri nga fshati. Xu Sanduo është një ushtar i thjeshtë dhe bën gjithmonë gabime gjatë stërvitjes, por ai është edhe një njeri i sinqertë dhe këmbëngulës. Nëpërmjet përpjekjeve të palodhshme, Xu Sanduo u bë më në fund një ushtar i shquar.

Drama televizive "Ushtarët" u transmetua në televizionet e krahinave të ndryshme të mbarë vendit dhe Wang Baoqiangu fitoi famë shumë të madhe. Wang Baoqiangu u shpreh se në fakt ai vetë i ngjan shumë personazhit Xu Sanduo:

"Jam një njeri modest, kur isha i vogël, askush nuk besonte që unë do të bëhesha aktor."

Wang Baoqiangu lindi në vitin 1984 në distriktin Nanhe të provincës Hebei të Kinës Qendrore. Kur ishte në moshën 8-vjeçare, ai shikoi në vendlindjen filmin e kungfu-së "Tempulli Shaolin". "Tempulli Shaolin" ishte filmi i parë i yllit kinematografik të vushu-së Jet Li, interpretimi i shkëlqyer i tij preku thellë zemrën e Wang Baoqiangut, ai vendosi të bëhet aktor i Vushu-së si Jet Li.

Për të realizuar ëndrrën e aktorit, Wang Baoqiang shkoi në tempullin Shaolin. Në këtë vend të shenjtë të vushu-së, ai mësoi vushu për disa vjet, por gradualisht ai zbuloi se vushu-ja nuk mund ta ndihmojë të bëhet aktor. Në fund të vitit 1997, Wang Baoqiangu i dëshpëruar u largua nga ky tempull dhe u kthye në vendlindje. Në këtë kohë, atij i lindi mendimi i ri që të shkojë në Pekin për të realizuar ëndrrën e aktorit. Shumë bashkëfshatarë ishin të mendimit se ky djalë ishte i çmendur.

Në fillim të vitit 1999, Wang Baoqiang 15-vjeçar erdhi i vetëm në Pekin. Ai priste çdo ditë në Studion Kinematografike të Pekinit për të kërkuar rast të luajë një rol figuranti. Duke kujtuar jetën e vështirë të atëkohshme, Wang Baoqiang u shpreh:

"Atë kohë ne 5 veta morëm me qira një dhomë të vogël si konvikt. Kushtet ishin shumë të këqija. Çdo ditë ne prisnim në studion kinematografike për ndonjë rast. Nëse kishte rast, mund të fitoja mbi 10 ose 20 juanë në ditë, por kishte rrallë raste."

Megjithëse kishte shumë vështirësi, Wang Baoqiangu këmbëngulës nuk hoqi dorë nga ëndrra. Kur ishte në moshën 16-vjeçare, Wang Baoqiang pati pat dhe fitoi mundësinë e interpretimit të personazhit kryesor në filmin "Pusi i verbër". Ai luajti rolin e një nxënësi fshatar të gënjyer në qytet. Wang Baoqiang u shpreh se në fakt ai nuk e njihte mjeshtërinë e interpretimit, por regjisori e ndihmoi shumë:

"Regjisori më inkurajoi shpesh. Me drejtimin e tij, unë e luajta me sukses këtë personazh duke krijuar vetëbesim."

"Pusi i verbër" fitoi çmimin "Ariu i argjendtë" në Festivalin e 53-të Ndërkombëtar të Filmit të Berlinit. Me këtë film, Wang Baoqiang fitoi po ashtu çmimin "Kali i artë" të aktorit më të mirë të ri të Tajvanit.

Drama televizive "Ushtarët" i solli Wang Baoqiangut famë të madhe. Duke folur për shkakun e bërjes aktor, Wang Baoqiangu tha:

"Pas transmetimit të dramës televizive 'Ushtarët' në vendlindjen time, prindërit dhe bashkëfshatarët ishin shumë të gëzuar. Ata nuk guxonin të besonin që unë mund të bëhem aktor. Jam shumë i kënaqur që munda t'u sjell një gëzim aq të madh."

Wang Baoqiang interpreton zakonisht personazhe optimiste, këmbëngulëse dhe të sinqertë. Nga këto personazhe, shumë shikues kanë parë guximin, këmbënguljen dhe përpjekjet për kapërcimin e vështirësive në jetë. (Fani)