Të dashur dëgjues, në rubrikën e sotme "Shkenca, arsimi dhe shëndetësia" do të japim reportazhin "Hyrja e Operës së Pekinit në shkollat e Tiancinit".

Opera e Pekinit vlerësohet si margaritar i kulturës tradicionale kineze dhe quhet "kuintesencë kombëtare" e Kinës. Në shkurt të këtij viti, Ministria e Arsimit e Kinës përfshiu 15 arie nga Opera e Pekinit në lëndën mësimore të muzikës të shkollave fillore dhe shkollave të mesme, me qëllim që frytet e shquara kulturore të trashëgohen më mirë nga brezi i ri. Më pas, Pekini, Tiancini, Gjangsu dhe 7 provinca të tjera caktuan secila 20 shkolla fillore dhe shkolla të mesme si pika prove të "hyrjes së Operës së Pekinit në mësim". Kështu që nxënësit po shijojnë pak nga pak bukurinë e vërtetë artistike të kësaj "kuintesence kombëtare", duke filluar nga njohja e lëvizjeve bazë skenike dhe melodive të Operës së Pekinit. Kjo punë po zhvillohet mbarë në shkollat fillore dhe shkollat e mesme të qytetit Tiancin të Kinës Veriore.

Në klasën e 5-të të shkollës fillore të rrugës "Siangjang" të rajonit Hësi të Tiancinit po zhvillohet mësimi i muzikës. Nga magnetofoni po jepet muzika shoqëruese. E drejtuar nga mësuesi i saj, nxënësja Pan Siao Tong po këndon me vëmendje arien nga pjesa teatrore "Hong Niang". Ajo thotë se ka dy vjet që mëson Operën e Pekinit.

"Opera e Pekinit më duket shumë interesante. Mua më pëlqejnë sidomos tekstet e arieve. Sa herë që mësojmë ndonjë arie, mësuesi ynë na tregon në radhë të parë përmbajtjen e kësaj pjese dhe sfondin shoqëror të krijimit të saj, me qëllim që të kuptojmë më thellë dhe të mësojmë më mirë."

Në qytetin Tiancin, që ka pasur emrin e bukur "Fshati i artit teatror" i Kinës, Opera e Pekinit ka mjaft adhurues. Qysh para disa vjetëve, shkolla fillore e rrugës "Siangjang" dhe disa shkolla të tjera vunë njohuritë bazë të Operës së Pekinit në mësimin e muzikës. Në vitin 2005, mësuesit e kësaj shkolle përpiluan lëndën mësimore me titull "Kuintesenca magjepsëse kombëtare" dhe nisën në gjithë shkollën edukimin e nxënësve me artin e Operës së Pekinit. Përmbajtja e kësaj lënde mësimore fillon nga njohuritë bazë të Operës së Pekinit dhe mbaron në të kënduarin e disa arieve nga pjesët teatrale. Tani, nxënësit e kësaj shkolle jo vetëm kanë përvetësuar njohuritë bazë përkatëse, por mund të këndojnë shumë arie. Për këtë foli mësuesja e muzikës e kësaj shkolle, Yang Qiu Yue:

"Mësimin e muzikës me elemente të Operës së Pekinit për klasat e ulëta ne e fillojmë me disa arie të regjistruara në disk, me qëllim që nxënësit të shikojnë dhe shtojnë gradualisht interesin për Operën e Pekinit."

Specialisti i artit teatror i Tiancinit, zoti Liu Lianqun, thotë se kujdesi i shoqërisë për Operën e Pekinit është dobësuar, sepse nuk i kushtohet rëndësi trashëgimit të kulturës tradicionale. Futja e elementeve të Operës së Pekinit në mësimin e muzikës të shkollave fillore dhe të mesme është e domosdoshme për ndryshimin e kësaj gjendjeje, sepse edukata e përshtatshme është kushti paraprak i brumosjes së nxënësve me interesin për këtë art tradicional. Sot mjaft vende të botës e kanë përfshirë trashëgimin e kulturës së vet kombëtare në arsimin bazë. Nga ky këndvështrim, hyrja e Operës së Pekinit në mësimin e muzikës të shkollave fillore dhe të mesme është e dobishme për trashëgimin e kulturës sonë kombëtare.

"Përse të fusim elementet e Operës së Pekinit në mësimin e muzikës? Me sa kuptoj unë, qëllimi është që brezi i ri të brumoset qysh në shkollën fillore me dashurinë për kulturën dhe artin e shquar kombëtar. Vetëm kështu mund të trashëgohet brez pas brezi kultura kombëtare, gjë që mund të lindë forcën e përbashkuar dhe potencialin shpirtëror të kombit."

Për të ngritur më lart nivelin e mësimdhënies, shumë shkolla fillore dhe të mesme të Tiancinit ftojnë posaçërisht artistë profesionistë për mësimdhënien e Operës së Pekinit. Zoti Tao Sinçeng, artist profesionist i Teatrit Tiancinas të Operës së Pekinit, shfrytëzon kohën e lirë për mësimdhënie në klasën e 2-të të shkollës së mesme "Yaohua" të Tiancinit. Ai thotë se nxënësit tashmë kanë interes të madh për Operën e Pekinit.

Zoti Feng Gjicai, shkrimtar i njohur kinez dhe kryetar i Lidhjes së Shkrimtarëve dhe Artistëve të qytetit Tiancin, e quan futjen e elementeve të Operës së Pekinit në mësimin e muzikës "një veprim të mrekullueshëm krijues". Ai propozon që krahinat e ndryshme të Kinës, duke u nisur nga kushtet e veçanta të tyre, të mbrojnë edhe format e veta karakteristike të arteve, domethënë, duke pasur hyrjen e Operës së Pekinit në mësimin e muzikës si nismë, të fusin edhe arte të tjera kombëtare në lëndët mësimore.

"Opera e Pekinit është përcaktuar si trashëgimi kulturore jo materiale. Unë e përkrah plotësisht hyrjen e saj në mësimin e muzikës në shkolla." (Zheng)