Ju flet Radio e Jashtme e Kinës. Të dashur dëgjues, në rubrikën "Kultura tradicionale kineze" do të flasim për taktikën "E lëshoj qëllimisht që ta nënshtroj përfundimisht", që është taktika e 16-të nga libri "Tridhjetë e gjashtë skemat strategjike dhe taktike", një libër klasik kinez për artin ushtarak.

Në fushën ushtarake, taktika "E lëshoj qëllimisht që ta nënshtroj përfundimisht" do të thotë se, për ta nënshtruar përfundimisht kundërshtarin, mund ta lëmë të veprojë si të dojë, që të bindet gradualisht. Një shembull i mrekullueshëm i përdorimit të kësaj taktike në fushën ushtarake të lashtësisë është historia e vërtetë "Zënia rob e Meng Huos për herë të 7-të", ku flitet për luftën që bëri strategu i famshëm kinez Zhugë Liang për të nënshtruar Meng Huon, që ishte kreu i një fisi të atëhershëm në zonat jugore.

Në vitin 225 të erës sonë, gjatë periudhës së "Tri Perandorive" në historinë kineze, kryeministri i perandorisë Shu, Zhugë Liang, komandoi trupat për ekspeditë drejt jugut, për të konsoliduar prapavijën e shtetit të tij. Në kohën kur ai po bëhej gati të tërhiqte trupat pas fitores, Meng Huo, kreu i fisit Yi të jugut, duke prirë trupat e tij, nisi mësymjen kundër trupave të Shusë. Por ai pësoi disfatë dhe u zu rob. Sipas logjikës, pas zënies rob të kryekomandantit të palës kundërshtare, Zhugë Liangu mund të vazhdonte luftimin për të korrur fitoren përfundimtare, duke përfituar nga rasti i rënies së fuqisë luftarake të armikut. Por Zhugë Liangu kishte parasysh se, meqenëse Meng Huo gëzonte prestigj të lartë dhe kishte ndikim të gjerë në ato zona, nënshtrimi dhe kapitullimi i tij me dëshirën e vet do të ishte një gjë shumë e dobishme për stabilizimin e vërtetë të zonave jugore; përndryshe, me vazhdimin e trazirave të fiseve të jugut, prapavija e perandorisë Shu nuk do të kishte qetësi. Kështu që ai liroi Meng Huon, duke filluar një "luftë kundër zemrës".

Më pas, Meng Huo, duke prirë trupat e tij, luftoi edhe 5 herë të tjera me trupat e Zhugë Liangut, por pësoi disfatë çdo herë dhe u zu rob çdo herë. Megjithatë, Meng Huo ende nuk pajtohej me dështimin, duke u justifikuar se lloj-lloj faktorësh të papritur e shpunë atë në disfatë dhe në zënien rob. Kështu, Zhugë Liangu e liroi edhe një herë. Meng Huo luftoi për herë të 7-të, por prapë u kap nga trupat e Zhugë Liangut. Kësaj here, ai pranoi më në fund se ishte i dobët në komandimin e forcave ushtarake në krahasim me Zhugë Liangun, madje e falënderoi përzemërsisht për mosvrasjen, edhe pse u zu rob 7 herë. Më tej, ai u betua se u nënshtrua dhe u vu nën varësinë e Zhugë Liangut. Që nga ajo ditë, u bë e sigurt paqja në prapavijën e perandorisë Shu.

"Lëshoj qëllimisht" është kyçi i përdorimit të taktikës "E lëshoj qëllimisht që ta nënshtroj përfundimisht". Zbatimi i kësaj taktike në praktikë është shumë i vështirë, sepse pakujdesia sado e vogël mund të sjellë rezultatin e "lëshimit të tigrit të kthehet në mal", gjë që i lë kundërshtarit rastin e ikjes dhe të rimëkëmbjes. Prandaj, përdorimi i kësaj taktike i kërkon vendimmarrësit që në radhë të parë të analizojë mirë dhe të gjykojë saktë gjendjen dhe pastaj të ndërmarrë veprimin e të luftojë për të korrur fitoren përfundimtare. (Zheng)