dëgjoni

Më 12 maj, në Wenchuan të provincës Sichuan të Kinës ra tërmeti prej 7.8 ballësh, ky tërmet i fuqishëm u ndie në mbi 10 provinca e qytete të mbarë vendit. Deri në orën 16 të 13 majit, tërmeti shkaktoi mbi 12000 të vdekur.

Pas tërmetit, kryetari i shtetit i Kinës Hu Jintao dha menjëherë urdhër për shpëtimin e të plagosurve. U krijua komanda e përgjithshme e shpëtimit nga fatkeqësia me kryeministrin kinez Wen Jiabao si komandant i përgjithshëm. Tani Wen Jiabao ka arritur në qytetin Dujiangyan të provincës Siçuan për të drejtuar punën kundër tërmetit.

Nga aeroplani me të cilin po shkonte drejtë rajonit të prekur nga fatkeqësia, Wen Jiabao u kërkoi qeverive të shkallëve të ndryshme të bëjnë përpjekjet më të mëdha për të shpëtuar të plagosurit:

"Funksionarët e shkallëve të ndryshme duhet të shkojnë në frontin e luftës kundër tërmetit për të drejtuar punën e shpëtimit nga fatkeqësia. Tani më të rëndësishmet janë gjakftohtësia, besimi, guximi dhe komanda e fuqishme. Jam i bindur se nën udhëheqjen e komitetit qendror të Partisë Komuniste të Kinës dhe të Këshillit të Shtetit, ne do të mposhtim patjetër këtë fatkeqësi."

Pas arritjes në qytetin Dujiangyan, Wen Jiabao organizoi menjëherë mbledhje ku u kërkoi ushtarëve dhe oficerëve që marrin pjesë në punën e shpëtimit nga fatkeqësia të kapërcejnë të gjitha vështirësitë dhe të hyjnë sa më parë në rajonin me gjendjen më të rëndë të fatkeqësisë. Ai tha:

"Tani detyra e parë është shpëtimi i të plagosurve. Duhet të mblidhet sa më parë numri i të vdekurve dhe i të plagosurve."

Pastaj Wen Jiabao shkoi në spitalin e mjekësisë kineze dhe në shkollën e mesme Juyuan të qytetit Dujiangyan për të vizituar masat popullore të prekur nga fatkeqësia dhe për të njohur gjendjen e fatkeqësisë. Ndërtesat e spitalit të mjekësisë kineze të Dujiangyanit u rrëzuan gjatë tërmetit, më se 100 njerëz u bllokuan nën gërmadha, Wen Jiabao u ngjit në murin e prishur dhe u thirri masave popullore të bllokuara:

"Mbahuni, ushtarët po ju shpëtojnë!"

Në shkollën e mesme Juyuan, Wen Jiabao tha:

"Ka edhe shumë njerëz që kanë shpresë të mbeten gjallë, ne duhet të bëjmë përpjekjet më të mëdha për t'i shpëtuar."

Pas tërmetit, organet e ndryshme përkatëse kineze filluan menjëherë punën e shpëtimit nga fatkeqësia. Ushtria kinez dërgoi ushtarë dhe oficerë në rajonin e prekur nga tërmeti për punë shpëtimi. Oficeri i policisë së armatosur Zhang Jinliang u shpreh:

"Deri tani kemi dërguar 5000 ushtarë, njëkohësisht 2000 ushtarë të tjerë janë gati të shkojnë në rajonin e prekur nga fatkeqësia."

Drejtoria Sizmologjike e Kinës dhe Ministria e Shëndetësisë e Kinës kanë dërguar grupe të punës në rajonin e prekur nga fatkeqësia për punë shpëtimi dhe të ndihmës. Ministria e Punëve Civile e Kinës dha menjëherë 5000 çadra, njëkohësisht kjo ministri dhe Ministria e Thesarit e Kinës dhanë 200 milionë juanë fonde të ndihmës me rastin e gjendjes së jashtëzakonshme në rajonin e prekur nga fatkeqësia. (Fani)