"Huaer"-i është një formë e këngëve malësore me karakteristika të theksuara vendore që janë të përhapura gjerësisht në provincat Gansu, Qinghai dhe Rajonin Autonom të Ningxia-Huit të Kinës Veriperëndimore. Kënga "Sodis fushën nga malet e larta" është një nga këngët popullore më të përhapura, me ndikim më të madh dhe më përfaqësuese të stilit "huaer". Teksti i këngës ka domethënie të thellë, ka forcë imagjinuese, melodia e saj është e lartë dhe e hapur, e lirshme dhe e shtruar dhe ka ngjyrën e muzikës së Kinës Veriperëndimore. Në këngë thuhet: "Sodis fushën nga malet e larta, në fushë ka një lule mudan, është e lehtë për ta parë dhe e vështirë për ta këputur."

Në programin e kaluar ju kallëzova se Jiang Jiaqiang-u është një tenor i njohur kinez, i cili hyri në Filarmoninë Qendrore të Kombësive në vitin 1956, duke filluar karrierën e tij prej këngëtari. Gjatë gjysmë shekulli, ai ka interpretuar shumë këngë kineze dhe të huaja, ai këndon në mënyrë herë elegante e herë madhështore, duke shprehur stilin e veçantë të kulturës muzikore të kombit kinez dhe është vlerësuar lart nga dëgjuesit dhe specialistët e qarqeve muzikore. Më poshtë do të shijojmë së bashku këngën popullore të provincës Anhui me titull "Kënga e bariut të buallit".

Kënga që ndoqët titullohet "Kënga e bariut të buallit", kënduar nga Jiang Jiaqiang-u. Kjo këngë është e lehtë dhe e gjallë, ajo shpreh gëzimin e bariut dhe dashurinë e tij për këngët malësore. Në këngë thuhet: "Në mëngjes shkoj me buall në shpat mali, kur më sheh mua, buzëqesh dielli. Bualli është i shëndetshëm, unë gëzohem shumë dhe këndoj." Këtë këngë Jing Jiaqiang-u e këndon në mënyrë të lehtë, të gjallë dhe humoristike.

Nga vitet '80 të shekullit të kaluar, Jiang Jiaqiang-u filloi të studiojë interpretimin e këngëve me poezitë e lashta kineze si tekst. Ai studion me seriozitet poezitë e njohura klasike, e njeh kohën, sfondin e krijimit të tyre, dhe duke kombinuar ndjenjën e vet ndaj veprave me idenë e kompozitorit, ka krijuar stilin e veçantë artistik të interpretimit të këngëve të tilla. Gjatë shumë vjetëve ai ka interpretuar mbi 100 këngë me tekste poezitë klasike kineze, duke u quajtur "Personi i parë në interpretimin e këngëve me tekste poezitë klasike kineze". Tani le të shijojmë këngën popullore të provincës Hunan të Kinës Jugore me titull "Përkulet lehtë një bambu", kënduar nga Jiang Jiaqiang-u.

Kjo është një këngë e gjallë dhe e shpejtë, e cila me fjalë të thjeshta tregon një të vërtetë të pandryshuar: "Një bambu është e lehtë për t'u përkulur. Nuk është e tmerrshme forca e vogël, por vetmia është e tmerrshme". Këtë këngë Jiang Jiaqiang-u e këndon me forcë dhe në mënyrë prekëse.

Jiang Jiaqiang-u ka një familje të lumtur, e shoqja Jin Jiaqin është gjithashtu një këngëtare e dalluar e Filarmonisë Qendrore të Kombësive. Në vitin 1963 ata organizuan dasmën e tyre gjatë udhëtimit për shfaqje. Gjatë mbi 40 vjetëve, ata kujdesen për njëri-tjetrin dhe ecin bashkë përpara, janë një çift shembullor. Tani ata kanë dalë në pension, shëtitin shpesh nëpër park dhe marrin pjesë në aktivitetet masive të këngëve.

Në fund të programit do të shijojmë së bashku këngën popullore të provincës Hubei me titull "---- ", kënduar nga Jiang Jiaqiang-u dhe Jin Jiaqin-i.

Kjo është një këngë pune e përhapur në provincën Hubei, të cilën e këndojnë njerëzit gjatë shirjes së orizit. Ndërthurja e këngës me punën bën që njerëzit të harrojnë lodhjen. Këtë këngë Jiang Jiaqiang-u dhe Jin Jiaqin-i e këndojnë në mënyrë të veçantë. Le ta dëgjojmë. (pina)