dëgjoni

Të dashur dëgjues, në rubrikën e sotme "Shkenca, arsimi dhe shëndetësia " do të flasim për përpjekjet që bëhen në Kinë për mbrojtjen e shëndetit nga dëmet që mund të sjellin mbartësit e sëmundjeve, për të siguruar higjienën e përgjithshme gjatë Lojërave Olimpike të Pekinit.

Lojërat Olimpike të Pekinit do të organizohen në verë që është një stinë kur veprojnë aktivisht mushkonjat, mizat, brumbujt, minjtë dhe gjërat e tjera të gjalla që mbartin sëmundjet direkt ose indirekt. Në fushën mjekësore dhe biologjike, këto quhen "mbartësit e sëmundjeve". Sektorët kinezë të shëndetësisë kanë përpiluar një program të hollësishëm dhe kanë bërë përgatitje të gjithanshme për të garantuar që Lojërat Olimpike të mos ndikohen nga dëmet që mund të sjellin ato dhe që të ulet në minimum rreziku i shfaqjes së papritur dhe përhapjes së sëmundjeve ngjitëse.

Mbartësit më të zakonshëm të sëmundjeve janë mushkonjat, mizat, minjtë, burbujtë, morrat e të tjera, që mund të mbartin murtajën, ethen dengë tropikale dhe sëmundje të tjera ngjitëse. Përveç kësaj, vetëm pickimi i mushkonjave mund të pengojë veprimin dhe pushimin e sportistëve. Prandaj, siç thotë zoti Çi Siaoqiu, drejtor i Drejtorisë së Parandalimit të sëmundjeve pranë Ministrisë së Shëndetësisë të Kinës, kontrolli i dendësisë së mbartësve të sëmundjeve ka të bëjë me rezultatin e organizimit të lojërave olimpike.

"Gjatë Lojërave Olimpike, do të vijnë në Pekin një numër i madh sportistësh, trajnierësh, gazetarësh e 600 mijë turistë të vendeve e rajoneve të tjera dhe, siç parashikohet, do të vijnë edhe 1 milion e 100 mijë turistë nga krahinat e tjera të vendit tonë, gjë që do të na shtojë presionin për sigurimin e higjienës së përgjithshme në Kinë. Prandaj forcimi i punës së mbrojtjes nga mbartësit e sëmundjeve, sidomos rritja e aftësisë së sigurimit dhe e nivelit teknik të kontrollit të tyre ka rëndësi të veçantë për organizimin me sukses të Lojërave Olimpike."

Pekini, si qytet organizator i lojërave olimpike, ka nisur prej kohësh përgatitjet përkatëse. Qysh në vitin 2005, sektorët e shëndetësisë të Pekinit nisën kontrollin e gjithanshëm e sistematik të dendësisë së mbartësve të sëmundjeve në ndërmarrjet dhe lokalet kryesore të gjithë qytetit, sidomos në stadiumet e fushat sportive të lojërave olimpike dhe bënë përpjekje për gjykimin e shkallës së dëmeve që mund të sjellin mbartësit e sëmundjeve gjatë Lojërave Olimpike të Pekinit, duke grumbulluar të dhëna të çmueshme të dorës së parë.

Në këtë bazë, duke marrë shembull nga punët në këtë drejtim të Lojërave Olimpike të Sidneit dhe të Athinës, Pekini hartoi "Programin e veprimit të kontrollit të mbartësve të sëmundjeve për organizimin e lojërave të shëndetshme olimpike". Mjeku drejtues i Qendrës së parandalimit dhe kontrollit të sëmundjeve të Pekinit, zoti Zeng Siaopeng, thotë se ky program përfshihet në rrjetin e kontrollit të mbartësve të sëmundjeve në mbarë qytetin gjatë Lojërave Olimpike. Janë organizuar edhe grupe pune për zbatimin e këtij programi.

"Në këtë program veprimi është përcaktuar objektivi i përgjithshëm i punës sonë. E para, do të ulet dendësia e mbartësve të sëmundjeve në mbarë qytetin; e dyta, do të pakësohet në minimum rrezikshmëria e përhapjes së sëmundjeve ngjitëse nga mbartësit e tyre; e treta, do të garantohet që stadiumet e fushat sportive të lojërave olimpike, Fshati i Lojërave Olimpike dhe zonat e tjera, që kanë lidhje me lojërat olimpike, do të arrijnë ose do të kalojnë standardin shtetëror. Nga gjendja e zbatimit të këtij programi rezultoi se objektivi tashmë është arritur."

Krahas afrimit dita ditës të Lojërave Olimpike, përgatitjet po hyjnë në fazën e fundit dhe sektorët e shëndetësisë të Pekinit aktivizohen me të gjitha forcat për të kryer punën e kontrollit të mbartësve të sëmundjeve. Në muajt maj, qershor dhe korrik, sektorët e shëndetësisë të Pekinit do të organizojnë në mënyrë unike aksionin e përgjithsëm për shfarosjen e mbartësve të sëmundjeve në një sferë prej 2 kilometrash të stadiumeve e fushave sportive të stërvitjeve, garave dhe ndeshjeve të Lojërave Olimpike, të hoteleve dhe spitaleve që kanë lidhje me Lojërat Olimpike. Atëherë grupet e specialistëve do të ftohen për kontroll dhe prova aty për aty.

Ndërkohë, këta sektorë do të organizojnë edhe aksione unike të mbarë qytetit për shfarosjen e insekteve dëmtuese, duke mobilizuar qytetarët për pastrimin e mbeturinave dhe ujërave të zeza në zonat ku gjenden stadiumet dhe fushat sportive të Lojërave Olimpike, në parqet, lagjet, hauzat dhe kanalet e mbarë qytetit. Për këtë foli funksionari i Drejtorisë së Shëndetit të Pekinit, zoti Sun Sianli.

"Puna jonë kryesore për këtë vit është që të mobilizojmë qytetarët në një sërë aktivitetesh për sigurimin e organizimit me sukses të Lojërave Olimpike."(Zheng)