Të dashur dëgjues, ju përshëndes përsëri nga Pekini. Në programin e këngëve popullore do t'ju paraqit disa këngë popullore kineze të interpretuara nga këngëtari i njohur kinez Jiang Jiaqiang. Së pari ju ftoj të ndiqni këngën me titull "Shkoj në Sëchuan"

Kjo është një këngë popullore e përhapur gjerësisht në provincën Gansu të Kinës perëndimore. Kjo këngë me melodi të bukur e me zigzage përshkruan dashurinë e thellë të një djali që merret me transportin e mallrave në distancë të gjatë për vajzën e zemrës. Në këngë thuhet: "Nëpër vargmale të larta, po shkoj në Sichuan. Duke e shkelur udhën me këmbë, më merr malli për ty."

Jiang Jiaqiang, tenori i njohur kinez, ka lindur në vitin 1935 në provincën Zhejiang të Kinës jugore. Në vitin 1956 Jiang Jiaqiang hyri në Filarmoninë Qendrore të Kombësive, duke filluar karrierën e tij prej këngëtari. Në vitin 1957, në Festivalin e 6-të botëror të të rinjve ai këndoi si solist i korit këngën me titull "Kënga e malit të çajit" dhe fitoi medaljen e artë. Gjatë gjysmë shekulli, Jiang Jiaqiang ka interpretuar shumë këngë kineze e të huaja dhe ka krijuar stilin e vet në qarqet e muzikës vokale popullore, ai jo vetëm ka fituar zemrën e dhjetëra mijë dëgjuesve, por edhe është vlerësuar lart nga specialistët e qarqeve muzikore e kulturore. Më poshtë le të shjojmë këngën popullore të provincës Yunnan të Kinës jugperëndimore me titull "Kënga e malit të çajit".

Kënga që ndoqët, titullohet "Kënga e malit të çajit", kënduar nga Jiang Jiaqiang dhe sopranoja Xie Lin. Kjo këngë e ëmbël dashurie shpreh kërkesën e të rinjve për dashurinë e bukur. Në këngë thuhet: "Hajde të këndojmë këngë malësore, pa kënduar këngë malësore, lulet nuk çelin. Vajza si lule çaji lëshon erë të këndshme, djali si bletë vjen nga mali. Le të takohemi ne të dashuruarit në malin e çajit."

Për të bërë që sa më shumë njerëz të kuptojnë mirë këngët popullore me karakter të theksuar vendës, Jiang Jiaqiang i interpreton këto këngë në gjuhën letrare e nuk imiton thjesht mënyrën e këndimit origjinal. Këngët popullore Jiang Jiaqiang i këndon me ngjyrë të theksuar lokale, me shqiptim të qartë dhe me shije të veçantë.

Kënga që ndoqët është kënga popullore e provincës Zhejiang me titull "Dingdingdang". Kjo është një këngë e gëzueshme që shpreh harenë e njerëzve.

Gjatë shumë vjetëve, Jiang Jiaqiang ka fituar më se një herë çmime në konkurse të ndryshme muzikore. Në vitin 1987 Radio Qendrore Popullore e zgjodhi atë "Këngëtarin më të pëlqyer nga dëgjuesit e mbarë vendit". Ai ka shkuar për shfaqje në mbi 10 vende, si në ish-Bashkimin Sovjetik, SHBA, Gjermani, Francë, Austri, Belgjikë, Japoni etj. dhe është ftuar për dhënien e leksioneve në Japoni e Singapor, ku është vlerësuar lart nga miqtë e vendeve të tjera.

Në fund të programit, do të shijojmë së bashku këngën popullore të provincës Sichuan me titull "Gëzohemi shumë kur del dielli", kënduar nga Jiang Jiaqiang.

Kjo është një këngë e përhapur në lindje të provincës Sichuan. Fëmijët e atjeshëm shkojnë në male për të prerë dru duke kënduar këtë këngë, që shpreh mostrembjen e fëmijëve para vështirësive dhe dashurinë e tyre për punën, për vendlindjen dhe për jetën. Melodia e saj është e lartë dhe e thjeshtë, ritmet janë të qarta. Këtë këngë Jiang Jiaqiang e këndon në mënyrë të shtruar, të çiltër dhe optimiste. Le ta shijojmë. ?pina?