Të dashur dëgjues, në rubrikën "Shkenca, arsimi dhe shëndetësia" do të japim reportazhin "Mjekimi në bashkëpunim favorizon shumicën e fshatarëve", në të cilin do të flasim për përpjekjet që bën qyteti Sinzhou i provincës Shansi të Kinës Qendrore për krijimin e sistemit të ri të mjekimit në bashkëpunim në fshat, gjë që u solli dobi pjesës më të madhe të fshatarëve në periferi të këtij qyteti.

"Sistemi i ri i mjekimit në bashkëpunim në fshat" është një sistem mjekimi i organizuar nga qeveria, ku fshatarët marrin pjesë me dëshirën e vet dhe i japin ndihmë njëri-tjetrit. Në këtë sistem, fondet grumbullohen nëpërmjet pagimit të shpenzimeve të individëve dhe subvencionit të qeverisë. Sa herë që fshatarët pjesëmarrës sëmuren dhe mjekohen në ambulancë ose shtrohen në spital me shpenzime të mëdha, qeveria u jep subvencion.

Fshatarët e distriktit Sinfu në periferi të qytetit Sinzhou marrin pjesë në këtë sistem mjekimi qysh nga shkurti i vitit 2007. Çdo fshatar i këtushëm u bë pjesëtar duke paguar vetëm 15 juanë. Sot ata e vlerësojnë shumë lart këtë sistem mjekimi. Zoti Li Ventian, drejtor i shëndetësisë i këtij distrikti, mallëngjehet sa herë që flet për këtë çështje.

"Fshatarët tanë thonë se këta 15 juanë, që paguan për të marrë pjesë në sistemin e ri të mjekimit të kooperuar, janë më të leverdishëm sesa të lindësh një djalë, sepse yt bir jo me siguri të jep 10 mijë juanë në momentin kyç, po të jetë i paaftë, kurse shteti na ka dhënë 10 mijë juanë për mjekim. Fshatarët tanë u janë mirënjohës partisë dhe qeverisë që kanë përpiluar një politikë kaq të mirë."

Në prill të vitit të kaluar, Huang Çao Siu, një fshatare 67-vjeçare nga fshati Gaojiazhuang në periferi të qytetit Sinzhou, tek po shkonte me biçikletë për në ara, ra nga pakujdesia në një kanal ujitës dhe u plagos rëndë. Ajo u çua menjëherë në spital dhe u shkëput nga rreziku i vdekjes vetëm pas një operacioni të vështirë që zgjati 11 orë. Disa thonë se mjekët e "tërhoqën atë nga porta e djajve". Por, pasi erdhi në vete, ajo u shqetësua për shpenzimet e mjekimit.

"Pasi u zgjova, pyeta bijtë e mi pse u munduan të më shpëtonin. S' ka gjë po të ikja unë. Me se do të paguanim shpenzimet e mëdha të mjekimit?"

Ajo u shqetësua për shpenzimet e mjekimit sepse ajo i kishte të ardhurat të pakta dhe, aq më tepër, ajo kishte si detyrë për të mbajtur vjehrrën e saj 98-vjeçare. Në atë çast, mjeku i tha se nuk kishte përse të shqetësohej, meqenëse merr pjesë në sistemin e mjekimit në bashkëpunim dhe, aq më tepër, ajo ka tre bij, që mund të ndajnë shpenzimet. 10 ditë pas daljes së saj nga spitali, Zyra e Mjekimit në Bashkëpunim pranë distriktit Sinfu i dha asaj një subvencion prej 12 mijë juanësh.

"I kam ndier vetë të mirat e politikës së partisë dhe qeverisë. Ne fshatarët kemi përfituar me të vërtetë nga sistemi i ri i mjekimit në bashkëpunim."

Në periferi të qytetit Sinzhou ka edhe shumë fshatarë të tjerë që kanë pasur një përvojë ashtu si fshatarja e moshuar Huang Çaosiu. Zv-dejtori i shëndetësisë i qytetit Sinzhou, zoti Gao Fanghua, tha se ekipi mjekësor i qytetit të tyre filloi që në vitin 2003 provën për krijimin e sistemit të ri të mjekimit në bashkëpunim dhe, deri tani, 1 milion e 610 mijë fshatarë të 10 distrikteve marrin pjesë në këtë sistem.

"Administratat e instancave të ndryshme i kushtuan vëmendje të veçantë krijimit të sistemit të mjekimit në bashkëpunim dhe dërguan në kohë paratë e nevojshme."

Ai tha se, pasi politika për krijimin e këtij sistemi mjekimi është vënë në jetë në të gjitha fshatrat në periferi të qytetit Sinzhou, detyra kryesore e drejtorisë së shëndetësisë është shndërruar në mbikëqyrjen e punës në këtë drejtim e në dëgjimin e vërejtjeve dhe propozimeve të fshatarëve për këtë punë.

"Ne kemi qenë për të kërkuar vërejtje në çdo fshat të 185 lokaliteteve të 14 distrikteve, me qëllim që fshatarët të kënaqen dhe të ndiejnë me të vërtetë dobinë e këtij sistemi të ri mjekimi."

Para disa kohësh, gjatë inspektimit në provincën Anhui, kryetari i shtetit i Kinës Hu Jin Tao parashtroi kërkesën që të ngrihet më tej dhe në tërësi sasia e subvencionit për fshatarët në raste mjekimi.

"Qeveria qendrore ka vendosur që, brenda dy vjetëve, sasia mesatare e subvencionit qeveritar për sigurimin mjekësor të ngrihet nga 40 juanë për frymë në 80 juanë për frymë. Në këtë mënyrë, edhe niveli i subvencionit për mjekimin në bashkëpunim në fshat do të ngrihet më tej. Thuhet se ekzistojnë vështirësi në mjekim dhe disa nuk guxojnë të mjekohen në spital. Por ky problem do të zgjidhet duke filluar me përpjekjet e qeverisë. "

Po zhvillohet mbarë puna për krijimin e sistemit të ri të mjekimit në bashkëpunim që filloi në vitin 2003. Siç parashikojnë specialistët përkatës, deri në vitin 2010, ky sistem do të mbulojë të gjitha fshatrat e Kinës dhe çdo fshatar kinez do të përfitojë nga ky sistem. (Zheng)