Në programin e sotëm, do t'ju paraqit një grup melodish të interpretuara me bawu nga instrumentisti i njohur kinez i veglave muzikore popullore Wang Tiechui. Së pari ju ftoj të shijoni melodinë "Kënga e peshkatarëve", interpretuar nga Wang Tiechui.

Të dashur dëgjues, ndoqët melodinë "Kënga e peshkatarëve". Kjo melodi nëpërmjet timbrit të butë e të veçantë të veglës muzikore bawu, përshkruan një tablo të bukur, ku peshkatarët po kthehen në shtëpi pas zënies së peshqve, duke treguar gëzimin dhe shpresën e tyre për jetën e re.

Bawu është një vegël muzikore popullore e përhapur në zonat e pakicave kombëtare të Kinës jugperëndimore. Ajo ka timbër të bukur e të shtruar dhe përdoret për të interpretuar melodi lirike dhe për të shprehur gëzimin, shqetësimet e hidhërimin e njerëzve. Kur kërkojnë vajzat e zemrës, djemtë i bien kësaj vegle muzikore për t'u shprehur atyre dashurinë e tyre. Prandaj banorët vendas e quajnë bawu "vegël muzikore që di të flasë".

Wan Tiechui është një instrumentist i talentuar i shumë veglave muzikore. Ai ka lindur në vitin 1932 në një fshat të provincës Hebei në veri të Kinës dhe është rritur në mes të tingujve të muzikës popullore kineze. Kur ishte 7 vjeç, ai filloi të mësonte nga i ati t'u binte veglave muzikore popullore kineze dhe kur ishte 10 vjeç dha shfaqje në skenë. Gjatë praktikës shumëvjeçare ai ka përvetësuar interpretimin e shumë veglave muzikore popullore, u bie më mirë veglave muzikore frymore si fyell, xiao, bawu etj. dhe ka krijuar e interpretuar shumë pjesë muzikore të shkëlqyeshme. Në mënyrë të veçantë meloditë e interpretuara prej tij në bawu kanë stil të theksuar të kombësisë dhe ngjyrë lokale. Më poshtë do të shijojmë së bashku melodinë me titull "Kënga e luginës", interpretuar dhe përpunuar nga Wang Tiechui.

Kjo melodi është përpunuar në bazë të materialeve muzikore popullore të provincës Yunnan dhe rrëfen një histori prekëse dashurie: Në kohët shumë të lashta, në një fshat të kombësisë hani në jugperëndim të Kinës, jetonin një djalë e një vajzë që e dashuronin njëri-tjetrin. Një ditë një përbindësh e rrëmbeu vajzën, i preu gjuhën dhe e hodhi në një hendek të thellë të malit. Vajza e hidhëruar pa masë nuk mund të thërriste. Një ditë një zog i tregoi se bambuja mund ta ndihmonte që të fliste. Vajza preu një copë bambuje, e bëri në formën e gjuhës dhe i binte me gojë, kështu dëgjohej kënga e bukur prekëse në luginë. Djali në krye të fshatarëve erdhi në luginë dhe e shpëtoi vajzën. Qysh nga ajo kohë, banorët e kombësisë hani e bëjnë me bambu veglën muzikore bawu, e cila është e përhapur gjerësisht në provincën Yunnan.

Melodia që ndoqët titullohet "Kënga e luginës".

Në fund të programit ju ftoj të dëgjoni melodinë "Kullota e artë", e interpretuar nga Wang Tiechui në bawu. Kjo melodi ka marrë si bazë muzikën e kombësisë mongole në veri të Kinës. Në fillim melodia nëpërmjet timbrit të ulët dhe të butë të bawusë përshkruan stepën e pafund, ku rrezet e arta të diellit ndriçojnë tokën e gjerë dhe kullotën e bukur, fill pas kësaj ajo me ritme të gëzueshme dhe të shpejta përshkruan blegtorët që janë duke kënduar e vallëzuar, ata i këndojnë vendlindjes e jetës së tyre të lumtur. Le ta shijojmë. (pina)