dëgjoni

Të dashur miqtë, mirë se vini në programin tonë. Këtë herë, do të ndiqni pjesën e tretë të intervistës së posaçme me presidentin e Komitetit Olimpik Kombëtar Shqiptar Hysen Domi.

Në fillimin e muajit prill, presidenti i Komitetit Olimpik Kombëtar Shqiptar Hysen Domi arriti në Pekin. Gjatë vizitës së tij, Domi mori pjesë në asamblenë e 16-të të Shoqatës së Komiteteve Olimpike Kombëtare dhe diskutoi mbi tema të sportit me kryetarët e komiteteve olimpike të vendeve të ndryshme.

Gjatë intervistës së tij për Radion e Jashtme të Kinës, zoti Domi na tregoi jo vetëm gjendjen e përgatitjes së palës shqiptare për pjesëmarrjen në Lojërat Olimpike të Pekinit, por edhe na foli për synimet e shqiptarëve jashtë fushës olimpike. Krahas këtyre, zoti Domi shprehu edhe mendimet e tij për bashkëpunimin midis Kinës dhe Shqipërisë në fushën olimpike.

"Raportet e Komitetit Olimpik Shqiptar me Komitetin Olimpik Kinez, dhe sidomos kohët e fundit me Komitetin Organizator të Lojërave Olimpike janë tepër të ngushta. E para sepse është një detyrë jona që të krijojmë të gjithë infrastrukturën e nevojshme për akreditimin e sportistëve tanë njëlloj si sportistët e të gjithë botës. Së dyti, ne me dy Komitetet Olimpike shkëmbimet direkte sportive, ndoshta për shkak të largësisë, ende nuk i kemi të konsoliduara, por specialistë kinezë kanë qenë në Shqipëri. Ne kemi bërë disa takime në ambasadën e Kinës në Tiranë, kemi planifikuar disa veprimtari promovuese olimpike me ambasadorin kinez në Shqipëri. Ne kemi një shkollë të madhe sportive me të rinj në qytetin e Durrësit, e vetmja në Shqipëri, dhe kemi planifikuar, pasi të kthehemi nga Pekini, që bashkë me ambasadën kineze, të bëjmë një promovim të përgatitjeve që po bën Kina për Olimpiadën, të masave që janë marrë, të aktiviteteve që do të zhvillohen në këtë kuadër, dhe ambasadori e pranoi me shumë kënaqësi."

Ndërkohë, Domi është i bindur që 2008-a është një rast i mirë për forcimin e bashkëpunimit midis dy vendeve dhe sipas tij, ky bashkëpunim me siguri do të bëhet më i ngushtë nëpërmjet mbështetjes së palës kineze.

"Sigurisht që 2008-a është një rast shumë i mirë, sepse përfitimet do të jenë shumë të mëdha. Disa unë i përmenda. Olimpiada është eveniment i rrallë unikal, një shans që i jepet një sportisti për të marrë pjesë në një aktivitet të tillë. Imagjinoni një sportist, le të themi të nivelit mesatar, që konkurron me sportistët absolutë, me kampionin e botës, me medalistin e artë. Kështu që përfitimet janë si në eksperiencë, ashtu edhe në anë të tjera. Por ne, sidomos me disa sporte në Kinë, do të vazhdojmë përpjekjet që të kemi shkëmbime akoma më të gjera. Natyrisht ne e dimë që Kina i ka sportet në nivele shumë të larta, është ndër pretendentet për fitimin e më shumë medaljeve në të gjithë botën. Në disa sporte natyrisht ne kemi shumë nevojë për mbështetje. Ka qenë traditë që specialistët kinezë kanë ardhur në Shqipëri, sidomos në sportin e volejbollit ? unë kam pasur vetë fatin të stërvitem me ta, ? në atletikë, në gjimnastikë, në pingpong. Janë disa sporte për të cilat niveli i lartë kinez mund të kontribuojë shumë në rritjen e nivelit të tyre në Shqipëri."

Kur ne e pyetëm nëse ka ndonjë problem ose divergjencë në bashkëpunimin e tanishëm dypalësh, Domi shprehu mendimet e tij, duke thënë se problemi më i madh është distanca gjeografike.

"Nuk bëhet fjalë për divergjenca, nuk ka absolutisht asnjë. Raportet janë absolutisht të mira, pavarësisht që për shkak të largësisë, s'mund të kemi kontakte të shpeshta njerëzore, sepse informacionet me linjat moderne të shkëmbimit të informacioneve i kemi."

Domi u shpreh gjithashtu se me gjithë largësinë, palës shqiptare i duhet edhe mbështetje më konkrete nga miqtë kinezë.

"Problemi është që ne kemi nevoja konkrete, dhe unë jam i sigurt që pas Olimpiadës do të konkretizohen disa nga ato që ne kemi kërkuar nga miqtë tanë, nga kolegët tanë, për mbështetjen e sportit shqiptar. Për shembull, në gjimnastikë kemi nevojë, sepse kemi gjimnaste shumë të talentuara, por te ne ka një nivel të caktuar trajnerësh, stafesh, dhe nuk mund të shkojnë më shumë përpara. Ne, për shembull, planifikojmë që një ose dy sportistë elitarë tanët t'i sjellim të stërviten në Kinë."

Të dashur miqtë, kjo ishte pjesa e tretë e intervistës së posaçme me presidentin e Komitetit Olimpik Kombëtar Shqiptar Hysen Domi, ju falënderojmë për shoqërinë, mirudëgjofshim! (Jiang Lei)