dëgjoni

Sëmundjet e veshkës janë një sëmundje me përqindje të lartë të shfaqjes dhe të vdekshmërisë, por meqë ato janë të fshehura dhe gjendja e zhvillimit të tyre nuk duket qartë, shumë njerëz, që i zënë këto sëmundje, nuk ndiejnë dhe nuk vënë re se janë të sëmurë. Specialistët përkatës thonë se zbulimi i hershëm i këtyre sëmundjeve është metoda më e efektshme e parandalimit dhe mjekimit të tyre. Ata paralajmërojnë se shtetasit kinezë duhet të mbajnë vigjilencë të lartë ndaj sëmundjeve të veshkave, sepse sot në Kinë është shumë serioze gjendja e parandalimit dhe mjekimit të këtyre sëmundjeve.

Veshka është një organ i rëndësishëm në organizmin e njeriut, sepse ajo funksionon jo vetëm për jashtëqitjen e lëndëve të panevojshme e të dëmshme, por edhe për rregullimin e tensionit të gjakur e të ekuilibrit të mjedisit të trupit dhe luan rol të rëndësishëm edhe për funksionet e gjakut e skeletit të njeriut. Li Shyn, shefi i seksionit për sëmundjet kronike pranë Ministrisë së Shëndetësisë të Kinës, tha se sot në shkallë botërore vihet re një prirje e rritjes së përqindjes së shfaqjes së sëmundjeve të veshkës. Ai tha se, me përmirësimin e jetës materiale dhe të kushteve të punës, kanë ndodhur dhe po ndodhin disa ndryshime jo racionale në mënyrën e jetesës së popullit. Për shembull, disa njerëz asimilojnë elemente tepër të shumta ushqyuese; disa të tjerë e kanë gjendjen psikologjike tepër të tendosur për një kohë të gjatë dhe nuk flenë gjumë të mjaftueshëm; disa të tjerë pinë duhan e përdorin jashtë masës pije alkoolike; përveç këtyre, po rritet përqindja e shfaqjes së diabetit, tensionit të lartë të gjakut dhe të sëmundjeve të metabolizmit dhe disa njerëz shpërdorojnë barnat. Të gjitha këto shpien në shfaqjen e sëmundjeve kronike të veshkës.

"Ne po ndiejmë gjithnjë e më shumë rrezikun e madh të sëmundjeve të veshkave dhe sfidën që ato na sjellin në drejtime të ndryshme. Pas sëmundjeve të enëve të gjakut të zemrës, kancerit dhe diabetit, sëmundjet e veshkës janë bërë një tjetër grup sëmundjesh të keqija që rrezikon shëndetin tonë dhe përbën një problem global të shëndetësisë së përgjithshme."

Ne nuk jemi optimistë për gjendjen e Kinës në këtë drejtim. Nga një anketë e sektorëve përkatës del se 18.7 % e kinezëve mbi 40 vjeçë vuajnë nga sëmundja e veshkës. Zheng Falei, profesor i repartit të neuropatologjisë të spitalit Siehe të Pekinit, thotë se shtetasit e thjeshtë kinezë, madje edhe disa mjekë, nuk e njohin drejt rrezikun e sëmundjeve të veshkës. Disa njerëz vijnë për mjekim vetëm në kohën kur sëmundja është zhvilluar në shkallë të rrezikshme. Por zbulimi i hershëm është mënyra më e mirë e parandalimit dhe mjekimit të kësaj sëmundjeje.

"Te disa njerëz, shenjat fillestare të sëmundjeve kronike të veshkës nuk duken qartë, madje nuk duken fare. Megjithatë, me zhvillimin gradual të sëmundjes, ata mund të ndiejnë disa shenja, si lodhje e paarsyeshme, ulje e oreksit, çrregullim i gjumit ose ënjtje në trup te disa njerëz. Të gjitha këto janë shenja të hershme të sëmundjeve të veshkës."

Profesor Zheng thotë se sëmundja e veshkës nuk gjykohet vetëm sipas këtyre shenjave, prandaj analiza e hershme është shumë e rëndësishme. Po më e rëndësishmja është që analiza të bëhet çdo vit, për të shoshitur gjendjen shëndetësore. Për njerëzit mbi 40 vjeçë, çdo vit duhet të bëhet analiza e rregullt e uresë dhe e funksioneve të veshkës, ndërsa për ata që vuajnë nga tensioni i lartë i gjakut dhe nga diabeti, kjo analizë duhet bërë dy herë në vit.

Profesor Zheng vuri në dukje veçanërisht një gjë që shpërfillet shpesh herë në jetën e përditshme. Sa herë që janë shumë të zënë me punë, disa njerëz harrojnë të pinë ujë dhe nganjëherë vonojnë edhe jashtëqitjen, më tej e bëjnë pak nga pak durimin e jashtëqitjes së ujit të hollë si një zakon. Por ky është një zakon shumë i dëmshëm për shëndetin e njeriut në përgjithësi dhe për veshkat në veçanti.

Ai tha se tashmë janë gjetur metoda të efektshme të mjekimit të disa sëmundjeve të veshkës. Megjithëse është e vështirë të shërohen përfundimisht sëmundjet e veshkës, ëshë e mundshme që, duke u përdorur disa terapi të përshtatshme dhe nëpërmjet ndryshimit të zakoneve në jetë, mund të ngadalësohet, madje të ndalet, zhvillimi dhe keqësimi i mëtejshëm i këtyre sëmundjeve, në mënyrë që të sigurohet cilësia e jetës e të sëmurëve dhe të kursehen shpenzimet e mjekimit për të mirën e familjeve dhe të gjithë shoqërisë.

"Sëmundjet e veshkave janë të tmerrshme dhe quhen vrasëse të fshehura. Por këtu bëhet fjalë për sëmundjet e vonshme të veshkës. Për sa i përket sëmundjeve të hershme, mund të frenohet zhvillimi i tyre dhe i sëmuri mund të jetojë normalisht. Kyçi është zbulimi dhe mjekimi i hershëm." (Zheng)