Dëgjoni

Duke folur për Murin e Madh kinez, mendoj se nuk është i panjohur për ju. Ai, së bashku me pandën, porcelanin dhe gjimnastikën tradicionale kineze Ushu, janë bërë simboli i Kinës së lashtë dhe misterioze. Për shumicën dërrmuese të të huajve, Muri i Madh ndodhet në veriperëndim të Pekinit, ku ka frëngji të zeza si dhe turistë të panumërt. Në fakt, fragmentet që turistët e huaj vizitojnë shpesh janë vetëm një pjesë e Murit të Madh afër Pekinit, ndërsa Muri i Madh nis në lindje nga gryka Shanhaiguan, buzë detit dhe 270 km në lindje të qytetit të Pekinit, pikërisht në qytetin Qinhuangdao.

Zonjusha Wang Hongxia flet shumë shpejt, duke mishëruar karakterin e saj të vetëbesimit. Ajo vjen nga 6000 familjet autoktone buzë fragmentit të Murit të Madh në Shanhaiguan, të cilat banuan brenda qytezës së lashtë Shanhaiguan deri në vitin e kaluar. Njëkohësisht, si shefja e zyrës drejtuese të riparimit të fragmentit të Murit të Madh në Shanhaiguan, ajo përgjigjet edhe për hallkat konkrete të riparimit, nga hartimi i politikës deri në zbatimin e tyre. Sapo nisi të fliste për grykën Shangaiguan, fytyra e saj u mbush plot me qeshje, si dhe krenari nga zemra. 

"Nuk e zmadhojmë po të themi që disa specialistë për Murin e Madh kinez dhe për reliktet kanë ardhur te ne mbi 100 herë. Ata thanë se gryka Shanhaiguan është thelbi i kulturës së Murit të Madh dhe muzeu natyror i këtij Muri."

Znj. Wang bëri të ditur se, pavarësisht nga sipërfaqja e vogël, në saje të pozicionit të veçantë, grykës Shanhaiguan i është kushtuar vëmendje e madhe nga qeveritë qendrore të dinastive të ndryshme. Veçanërisht në dinastinë Ming, 1/4 e financave qendrore u përdorën për qytezën Shanhaiguan, si kala ushtarake dhe qytezë e rëndësishme ekonomike,.

Si pikënisja e Murit të Madh kinez, një nga trashëgimitë kulturore të botës, qyteza Shanhaiguan ka edhe vlera historike dhe kulturore, që e barazojnë me fragmentin e Murit të Madh në Badaling afër Pekinit. Por për shkaqe historike, kjo qytezë e lashtë me pasuri të mëdha kulturore, ra në gjendje të keqe dhe ishte e vështirë për turizëm. Nga të dhënat statistikore del se para veprës së ripariit, në qytezën Shanhaiguan 60% e mbetëzave kulturore ishin prishur. Ndër 4600 metra muri të qytezës, 3300 u dëmtuan rëndë. Duke folur për të kaluarën e qytezës Shanhaiguan, drejtori i Drejtorisë së mbrojtjes së relikteve të kësaj qyteze, z. Guo tha i emocionuar:

"Para riparimit, në qytezën e lashtë kudo gjendeshin shtëpi të vogla njëkatëshe, të ndërtuara pas tërmetit të madh të Shangshanit. Edhe rrugët e lagjet ishin të ngushta dhe hedhurinat liheshin kudo sipas qejfit. Veçanërisht buzë murit të qytetit, terrenet e rritjes së derrit dhe të pulave ishin ndërtuar andej-këndej në shtratin e hendekut të tharë."

Në vitin 2005 qeveria kineze nisi veprën kombëtare të mbrojtjes së Murit të Madh, duke investuar me radhë 900 milionë juanë në riparimin dhe rimëkëmbjen e pjesës kryesore të qytezës Shanhaiguan. Edhe administrata vendore mblodhi brenda mundësive 700 milionë juanë, që të mbrojë me vendosmëri të plotë trashëgiminë e çmuar.

Sigurisht, zhvillimi i qytezës së lashtë historike e kulturore nuk është i njëjtë me zhvillimin e qyteteve të zakonshme. Për këtë, administrata vendore ftoi dy specialistë nga Universiteti Tongji i Shangait, Ruan Yisan dhe Zhoulian, që quhen si "mbrojtësit e qytezës së lashtë" dhe janë dekoruar me "Medaljen e Nderit të Letërsisë dhe të Artit" të Francës. Specialistët morën pjesë nga afër në projektimin e mbrojtjes së qytezës së lashtë dhe hartuan 3 programe për mbrojtjen dhe zhvillimin e qytezës, duke përfshirë shpërnguljen e mbi 6000 familjeve nga qyteza dhe krijimin e muzeut të Murit të Madh.

Në vitin 2008, një pjesë ndeshjesh olimpike të futbollit do të zhvillohen në qytetin Qinhuangdao, ku ndodhet qyteza Shanhaiguan. Atëkohë, do të përqendrohen atje mijëra sportistë, funksionarë, gazetarë si dhe shikues. Këto krijojnë perspektivë të mirë për ekonominë turistike të qytezës Shanhaiguan, të karakterizuar nga kultura e Murit të Madh. Znj. Wang Hongxia, që përmenda në fillim të programit, tha:"Vitin e ardhshëm kur hapen Lojërat Olimpike, do të përfundojë riparimi i pjesës kryesore të fragmentit të Murit të Madh në Shanhaihuan. Më 8 gusht të këtij viti, me rastin e një-vjetorit para hapjes së Lojërave Olimpike të Pekinit, lëshuam fishekzjarrë me temën olimpike. Fishekzjarrët në qiell, si dhe pasqyrimet e tyre në det, dukeshin shumë të bukur."

Me zbatimin e planit të mbrojtjes dhe të zhvillimit, në vitin 2008 qyteza Shanhaiguan do të jetë më tërheqëse.  (Wang Lei)