dëgjoni

Më 4 prill, presidenti i Komitetit Olimpik Kombëtar Shqiptar Hysen Domi arriti në Pekin. Gjatë vizitës së tij, Domi mori pjesë në asamblenë e 16-të të Shoqatës së Komiteteve Olimpike Kombëtare dhe diskutoi mbi tema të sportit me kryetarët e komiteteve olimpike të vendeve të ndryshme.

Gjatë intervistës, zoti Domi na bëri të njohur vëmendjen e treguar nga mediat shqiptare për Lojërat Olimpike të Pekinit, duke na treguar edhe rëndësinë e kushtuar nga Komiteti Olimpik Kombëtar Shqiptar për përhapjen e informacioneve të lidhura me Olimpiadën e kësaj vere.

"Dy vjet më parë ne si Komitet Olimpik përgatitëm një strategji për përgatitjen e kandidatëve për lojërat olimpike, për masat që duhen marrë për pjesëmarrjen e tyre në aktivitete kualifikuese, dhe sigurisht që mediat e kanë pasqyruar herë pas here të gjithë veprimtarinë e Komitetit Olimpik, të gjithë veprimtarinë me sportistët olimpistë, me takimet e ndryshme, me promovimet e ndryshme që i bëjmë në televizionet shqiptare delegacionit shqiptar. Ne si Komitet Olimpik kemi prej kohësh të hapur një uebsajt, në të cilin japim informacione të herëpashershme, shpërndajmë në të gjithë botën ato përgatitje që po bën Shqipëria për pjesëmarrjen në Olimpiadë."

Duke folur për ceremoninë kremtuese të zhvilluar në Pekin në gusht të vitit 2007, zoti Domi tha se ajo ceremoni i ka lënë atij një përshtypje shumë të thellë dhe shprehu bindjen që në 8 gusht të vitit 2008, do të ketë një ceremoni hapjeje më të bukur.

"Ajo ishte një ceremoni jo vetëm sportive. Ajo ceremoni ishte, le të themi, një parapërgatitje shpirtërore për pjesëmarrësit se çfarë do të ndodhë në Pekin 2008. Dhe unë kam bindjen që, edhe nga kontaktet me miqtë e mi, ajo ceremoni ishte një parapërgatitje e opinionit publik të thjeshtë, jo vetëm e neve që do të jemi këtu, se çfarë do të ndodhë më 8 gusht në ceremoninë e çeljes. Le të themi se të gjithë presin që do të ndodhë mrekulli, le të themi pas ceremonisë së çeljes së Athinës presin diçka akoma edhe më të bukur, më tërheqëse. Ky është opinioni i përgjithshëm."

Krahas këtyre, zoti Domi na tregoi se Komiteti Olimpik Kombëtar Shqiptar ka edhe synime jashtë fushës olimpike.

"Olimpiada, dhe ne e kemi ndier edhe në Athinë, nuk është vetëm një garë sportive. Misioni i olimpiadave të mëdha nuk është vetëm gara sportive, por është edhe krijimi i mundësive për shkëmbime kulturore, për njohje të mjediseve, për njohje të njëri-tjetrit, dhe përcjell një mision që për ne olimpistët është ndër më edukativët, sepse duke jetuar të gjithë sportistët në një fshat olimpik, 11-12 mijë sportistë nga të gjitha kontinentet, të bardhë, të zinj, aziatikë, vajza, djem, të të gjitha feve, atje është e gjithë bota në të gjitha nivelet kulturore, të racave, gjinore. Mund të shpërndaheshin në shtete të ndryshme a në hotele të ndryshme, por misioni i lojërave olimpike nuk është thjesht gara, siç janë kampionatet botërore a kampionatet e ndryshme, por është një mision shumë më i madh e fisnik, sepse përçon paqen, miqësinë, bashkëjetesën e larmishme në një fshat të vetëm."

Zoti Domi tha se në lojërat olimpike ka gjithashtu edhe një fshat rinor olimpik ku çdo shtet i botës përfaqësohet me dy të rinj nën 18-vjeçarë, të cilët nuk marrin pjesë në garë, por kanë aktivitete kulturore, edukative, argëtuese, sportive në këtë fshat. Ai shtoi: "Çdo shtet i botës paraqitet me dy të rinj, një djalë dhe një vajzë, të cilët detyrimisht duhet të njohin gjuhën angleze, në mënyrë që të kontaktojnë me njëri-tjetrin, të shkëmbejnë me njëri-tjetrin nivele kulturore, të marrin informacione nga njëri-tjetri, të argëtohen me njëri-tjetrin, të bëjnë aktivitete të përbashkëta dhe të ndjekin aktivitete sportive." Ai tha se ideja e këtij aktiviteti është lidhja e miqësive në të gjithë botën dhe mendon që të gjitha këto dalin përtej qëllimit që ka një garë sportive.

"Gara është thjesht një garë, në fushën e lojës, kurse kjo është një jetesë e përbashkët për 25 ditë në një familje të përbashkët. Kanë bërë shumë mirë dhe unë jam plotësisht dakord që e quajnë familja olimpike. Dhe ky është misioni edhe për ne që punojmë në Shqipëri me rininë shqiptare, me sportistët shqiptarë, sepse edhe ne atje përpiqemi të stimulojmë jo vetëm proceset e garës, të ndeshjes sportive, por edhe proceset e bashkëjetesës, të komunikimit me njëri-tjetrin, të marrjes së informacioneve nga njëri-tjetri."

Të dashur dëgjues, ky ishte pjesa e dytë e intervistës së posaçme me presidentin e KOKSH-it Hysen Domi. Ju falënderojmë për shoqërinë, mirudëgjofshim herën tjetër! (Jiang Lei)