dëgjoni

Me ndihmën e Kompanisë së Investimeve Ndërkombëtare Kino-Shqiptare, Grupi Shqiptar për Zhvillimin e Kapitaleve të Huaja (FCDG) pati mundësi të kontaktojë me Kompaninë e Ndërtimit të Hekurudhave të Kinës (CRCC), një nga kompanitë më të fuqishme në Kinë. Të dyja palët shprehën dëshirën për vendosjen e marrëdhënieve të partneritetit të bashkëpunimit strategjik.

Vitin e kaluar, një grup me përfaqësues të Kompanisë së Ndërtimit të Hekurudhave të Kinës bëri një vizitë miqësore në Shqipëri, ku u takua me kryeministrin e vendit Sali Berisha. Ditët e fundit, i ftuar nga Kompania e Ndërtimit të Hekurudhave të Kinës, erdhi për vizitë në Pekin kryetari i Grupit Shqiptar për Zhvillimin e Kapitaleve të Huaja Filip Lala. Gjatë qëndrimit të shkurtër në Pekin, z. Lala shkëmbeu mendime dhe konsultime miqësore me përfaqësuesit e CRCC-së lidhur me mundësinë e bashkëpunimit midis Kinës dhe Shqipërisë në fusha të ndryshme. Të dyja palët ranë dakord për konkretizimin sa më parë të këtij bashkëpunimi pas gjetjes së mundësive sa më të pjekura dhe pas studimeve të nevojshme, sepse të dyja palët janë të mendimit se bashkëpunimi ndërmjet Kinës e Shqipërisë ka perspektivë të gjerë.

Z. Filip Lala u ftua edhe për një vizitë në Radion e Jashtme të Kinës dhe dha një intervistë për redaksinë e gjuhës shqipe të kësaj Radioje, ku u prit ngrohtësisht nga punonjësit e kësaj redaksie. Ai shprehu befasinë e vet dhe përgëzoi për nivelin e njohjes së gjuhës shqipe nga anëtarët kinezë të redaksisë.

Grupi i z. Filip Lala, këtij biznesmeni të suksesshëm shqiptar në botë, ka pasur rastin të marrë pjesë në ndërtimin e Qendrës së madhe Ndërkombëtare Tregtare të SHBA-së, si dhe të ambasadës së Kinës në Uashington dhe konsullatës së Kinës në Nju-Jork. Duke folur për shkaqet që sollën në fitimin e së drejtës së ndërtimit të këtyre veprave shumë të rëndësishme, ai tha: "Për gjithçka në jetë, jo vetëm për ndërtimin, gjëja kryesore është që duhet ndërtuar besimi. Janë shumë njerëz që mund të ndërtojnë si unë ose edhe më mirë se unë, por rëndësia kryesore është që ata njerëz më kanë besuar për ndërtimin e këtyre veprave. Është besimi më shumë se gjithçka që duhet të ketë njeriu që të krijohet diçka e tillë."

Ambasada kineze në Uashington dhe konsullata e Kinës në Nju-Jork janë ndërtuar sipas karakteristikave të arkitekturës kineze, sepse edhe vetë zoti Lala e njeh dhe e admiron shumë kulturën e lashtë e të pasur kineze. Z. Lala u shpreh se ka dhënë fonde edhe për ndërtimin në Tiranë të muzeut të Nënë Terezës, kësaj gruaje të madhe të kombit shqiptar, të cilin ai e quajti "Nëna e të gjithë botës".

Gjatë qëndrimit 18-vjeçar në SHBA, z. Filip Lala ka pasur edhe shumë miq kinezë, ai ushqen një dashuri të madhe për popullin kinez dhe një respekt të madh për Kinën. Ai tha se është gjithmonë një kënaqësi dhe gjithmonë mahnitëse të vish në Kinë, në këtë vend kaq të bukur, me një kulturë kaq të lashtë, një filozofi kaq të thellë, ku sa herë vjen ai gjen gjithmonë diçka të re, që të jep një frymëzim shpirtëror. Ai tha se ai ka vizituar shumë objekte historike e kulturore në Pekin, si Murin e Madh Kinez, Qytetin e Ndaluar etj.

Nga ana tjetër, duke parë zhvillimin e vrullshëm të Kinës, ai shprehu dëshirën e madhe për të bashkëpunuar me kompani të ndryshme kineze.

Duke folur për zhvillimin e Kinës, z. Filip Lala tha: "Zhvillimi ekonomik i Kinës është një gjë shumë e mirë për çdo vend të botës, jo vetëm për Kinën. Unë jam shumë i kënaqur që Kina ka arritur këto suksese. Unë e admiroj popullin kinez edhe për zgjuarsinë natyrore dhe për përdorimin e filozofisë në çdo aspekt, si ekonomik, si politik, si kulturor. Dhe Kina është shumë shumë e mirë për botën".

Gjatë qëndrimit në Kinë, z. Lala pati rast të njihet me disa teknologji të reja dhe të përparuara kineze. Kështu, ai bëri një vizitë në një fabrikë për prodhimin e materialeve speciale të ndërtimit, të prodhuara prej druri dhe magnezi, që nuk digjen nga zjarri dhe janë rezistente ndaj temperaturave mbi 3000 gradë, si dhe ndaj ujit e krimbave. Shtëpitë e ndërtuara me këto materiale duket nga pamja e jashtme si prej druri ose prej guri, ato jo vetëm janë shumë të bukura, por edhe shumë të forta e mjaft mirë të izoluara.

Në Pekin, z. Filip Lala u ftua nga CRCC-ja edhe në një darkë me karakteristika të kombësisë mongole të Kinës, ku u kënaq jo vetëm me ushqimet karakteristike të kësaj kombësie, por shijoi edhe këngët e vallet e larmishme të saj.