Shprehja "Tharja e kumbullës për hir të pjeshkës" ka ardhur nga një vjershë e Kinës së lashtë, ku thuhet se dikur pranë një pusi, rriteshin si partnere dy pemë, njëra ishte kumbull dhe tjetra ishte pjeshkë. Një ditë, një tufë krimbash erdhën për të ngrënë rrënjët e pjeshkës, por kumbulla u bre nga krimbat dhe u tha për hir të pjeshkës. Me këtë shprehje është emërtuar taktika për të cilën po flasim. Në të është marrë pjesërisht edhe kuptimi alegorik i subjektit të kësaj vjershe të lashtë. Domethënia e kësaj taktike është se, gjatë luftës politike dhe ushtarake, në rrethanat kur raporti i forcave të të dyja palëve është i barabartë ose kur humbja e palës sonë është e pashmangshme për shkak se forcat e kundërshtarit janë relativisht të mëdha, ne duhet të bëjmë një sakrificë të vogël për të korrur fitoren e fundit ose për të shmangur një humbje më të madhe. Kjo taktikë u zbatua në mjaft luftëra politike dhe ushtarake të Kinës së lashtë.

Në shekullin e 3-të para erës sonë, shteti Zhao pësonte vazhdimisht ngacmimet e kalorësve hunë, që ishin fise blegtore shtegtare të veriut, sepse Zhao kufizohej me territorin e hunëve. Prandaj populli i Zhaos nuk jetonte dhe punonte dot në qetësi. Mbreti i Zhaos dërgoi gjeneralin Li Mu për mbrojtjen e Yanmenit, një qytet që rrezikohej nga hunët. Pasi hipi në postin e tij, Li Mu urdhëroi komandantët dhe ushtarët të gjendeshin brenda, me të mbyllur portën e qytetit, dhe të mos dilnin për të luftuar jashtë. Hunët, që nuk e kuptonin qëllimin e tij, nuk guxonin të mësynin lehtazi. Li Mu stërviste intensivisht trupat e tij, për të përgatitur një goditje të fortë kundër hunëve. Pas disa vjetësh, forcat e Li Musë ishin rritur shumë dhe ushtarët kishin vullnet të fortë për luftim.

Para mësymjes kundër hunëve, Li Mu dërgoi disa ushtarë që, bashkë me disa blegtorë, të dilnin nga qyteti dhe të kullosnin bagëtitë. Duke parë këtë gjendje, kreu i hunëve dërgoi menjëherë kalorës për të grabitur bagëtitë. Ushtarët e Li Musë bënë sikur po luftonin, por ikën shpejt duke i lënë bagëtitë, sikur dështuan. Kalorësit e hunëve u kthyen duarplot. Kreu i hunëve u vërsul duke prirë të gjitha trupat e tij, sepse ai kujtonte se më parë Li Mu nuk i lejonte ushtarët e tij të dilnin për luftim, ngaqë ishte i paaftë dhe frikacak.

Duke parë se taktika e tij dha rezultat, Li Mu në radhë të parë vuri pritë nëpër rrugë dhe dërgoi një pjesë të ushtarëve që të tërhiqnin trupat hune në pritë, pastaj mësynë kundër armiqve, duke i ndarë në disa pika. Kështu që hunët pësuan një goditje të fortë dhe kufiri i Zhaos fitoi qetësi.

Taktika "Tharja e kumbullës për hir të pjeshkës" përdoret shpeshherë edhe në konkurrencën tregtare, meqë tregtarët kanë nevojë të sakrifikojnë disa interesa të përkohshme për hir të interesave afatgjata. Një herë, kjo taktikë u zbatua me sukses edhe nga shoqëria e famshme amerikane "Bausch & Lomb Inc." në kohën kur zgjodhi alternativën vendimtare. (Zheng)