dëgjoni

Amerikanja Bec Rivet rreth 80-vjeçare ka një familje të lumtur përtej Oqeanit Paqësor. Ajo ka 3 bija, 11 mbesa dhe 5 stërmbesa. Mund të jetonte e lumtur në vendlindje bashkë me të afërmit e saj, por ajo erdhi nga një vend i largët për të punuar si pedagoge vullnetare në Kinë. Deri tani, ajo ka rreth 16 vjet që punon si pedagoge në qytetin Fuzhou të Kinës Juglindore.

Bec Rivet është një psikologe me gradën e doktoratës dhe ka 56 vjet që punon si pedagoge. Para ardhjes në Kinë, kishte vizituar mbi 70 vende të botës. Një pasdite, para 16 vjetëve, Beci që porsa kishte dalë në pension, lexoi rastësisht nga gazeta një reportazh për Institutin e Vajzave Huanan të Fuzhout të Kinës dhe kjo gjë i tërhoqi asaj vëmendje të madhe. Ajo i dërgoi një letër autores së reportazhit, mori telefon 5 pedagogë të huaj në Institutin e Vajzave Huanan, pyeti me hollësi për gjendjen e këtij instituti dhe mori përgjigjen unanime: "shkollë e mrekullueshme, njerëz të mrekullueshëm, mjedis i mrekullueshëm." Kështu që, Bec Rivet vendosi të punojë në Institutin e Vajzave Huanan.

"I thashë vetes sime se duhet të provoj disa gjëra krejtësisht të reja dhe krejtësisht të ndryshme. Kultura kineze ka ndryshime shumë të mëdha me kulturën evropiane. Prandaj thashë: mirë, do ta provoj, por vetëm për 1 vit."

Në gusht të vitit 1992, Beci 64-vjeçare u nis vetëm për në Fuzhou. Në aeroplan, ajo përfytyronte vazhdimisht se si do të ishte vendi ku do të jetonte për 1 vit, a mund të shkonte mirë me njerëzit e atjeshëm, a mund të komunikonte lehtë me ato vajza. Ndërsa, kur doli nga aeroporti i Fuzhout, iu zhdukën të gjitha dyshimet.

"Unë u nisa vetëm dhe nuk dija se çfarë do të gjeja në pikëmbërritje. Kur dola nga aeroporti, vura re se tre njerëz të buzëqeshur mbanin një tabelë të shkruar 'Mirë se erdhët në Institutin e Vajzave Huanan'. Unë mendova: mirë, jam gati. Ndieva një ngrohtësi nga sjelljet e tyre. "

Instituti i Vajzave Huanan, ku punon Bec Rivet, është një shkollë e lartë profesionale me një histori rreth 100-vjeçare, posaçërisht për vajza. Kjo shkollë gjendet në një shpat mali me mjedis të qetë dhe të bukur në periferi të qytetit Fuzhou. Prej këtej mund të shohim gjithë qyetin. Becit i pëlqen shumë kjo shkollë dhe ajo është ambientuar shpejt me jetën e këtushme.

Ajo jep mësim në fakultetin e anglishtes praktike dhe në fakultein e edukatës së fëmijëve. Ajo foli për përshtypjet që i la ora e parë e mësimit.

"Kur i pashë për herë të parë, m'u duk se studentet e mia kishin të njëjtën fytyrë. Nuk i dalloja dot, sepse të gjitha ato ishin me flokë të zinj dhe ishin të veshura pothuajse me rroba të njëllojta. Puna e parë për mua ishte që ato të merrnin nga një emër në anglisht, sepse shkolla jonë është një institut i gjuhëve të huaja. I shënova të gjithë emrat në kartela dhe i vura në tavolinë, që t'i shihja në çdo kohë. Më në fund, arrita t'i dalloj studentet e mia. "

Gjatë bisedës me korrespondentin tonë, studentja Çen Qiong tha se ajo është shumë e kënaqur për metodën mësimdhënëse të pedagoges Bec.

"Kur isha në shkollën e mesme, lodhesha shumë duke mbajtur shënim gjërat që shpjegonte mësuesi. Kurse pedagogia Bec ka një metodë tjetër mësimdhënëse dhe unë e ndiej të lehtë orën e mësimit. Ajo tha se shqiptimi ka më shumë rëndësi, sepse mund të shkruajmë fare lehtë kur shqiptojmë drejtë. Ne mund të mësojmë shumë gjëra nga ajo."

Zoti Lin Bençun, rektori i Institutit të Vajzave Huanan, tha se, për shkollën e tij, roli i pedagoges Bec është i pazëvendësueshëm.

"Ajo e do shumë Institutin Huanan dhe ka një frymë të kontributit për ta çuar përpara arsimimin e vajzave. Shumë nga pedagogët tanë të huaj kanë ardhur me rekomandimin e saj. Ajo ka hapur edhe një uebsajt për të propaganduar shkollën tonë. Studentet tona e duan shumë pedagogen Bec."

Në vitn 2006, qeveria kineze i dha asaj çmimin shtetëror të Miqësisë, duke çmuar kontributin e saj në zhvillimin e arsimit të Kinës. Sa herë që përmenden ndjenjat e saj për këtë çmim, ajo tregohet veçanërisht modeste.

"Këtë çmim e fitova vitin e kaluar. Duhet të dini se ky çmim është shumë domethënës. Bazamenti i kupës së çmimit është i derdhur me 99.99 % të arit, prandaj është shumë i shtrenjtë. Por është i shtrenjtë jo vetëm sepse është i derdhur me ar, por edhe sepse ka domethënie shumë të thellë." (Zheng)