dëgjoni

31-vjeçari Huang Doudou është kërcimtar i famshëm në Kinë, vallet e tij janë plot me fuqi. Ai ka fituar shumë çmime në konkurset ndërkombëtare duke nxitur aktivisht shkëmbimet midis artit kinez dhe atij të huaj. Krahas këtyre, Huang Doudou merret edhe me botimin e librave, ekspozita artistike etj. duke marrë pjesë aktivisht në veprimtarinë e popullarizimit të Lojërave Olimpike të Pekinit jashtë vendit.

Huang Doudou është kërcimtar i Ansamblit të Këngëve dhe të Valleve të Shangait. Pak kohë më parë, ky ansambël zhvilloi në Pekin shfaqjen me emër "Vallet e daulles, zëri i kombit kinez", Huang Doudou ishte aktor kryesor i shfaqjes. Kjo shfaqje u organizua nga Ministria e Kulturës e Kinës për të pritur Lojërat Olimpike të Pekinit dhe për të përhapur artin kinez.

Në fakt, Huang Doudout të vogël nuk i pëlqente vallja, ai nuk dëshironte të kërcente në skenë. Ai tha:

"Shumë media janë shprehur se Huang Doudou është një kërcimtar i lindur, por në fakt s'më pëlqente shumë vallja kur isha në moshë të re, sepse atë kohë isha i mendimit se vallja është më e përshtatshme për femrat, një burrë duhet të bëhet ushtar. Por familja ime shpresonte shumë që unë të bëhesha kërcimtar dhe më inkurajoi herë pas here të merrem me kërcim. Në fund unë vendosa të shfaq temperamentin e meshkujve nëpërmjet valleve."

Nga mosha 12-vjeçare deri në moshën 18-vjeçare, Huang Doudou studioi sistemakisht vallen kombëtare kineze në Shkollën e Valleve të Shangait. Gjatë kësaj periudhe, ai fitoi çmimin e artë në konkursin mbarëkombëtar të valleve për fëmijë dhe të rinj. Pas kësaj, pothuajse çdo vit ai fitoi çmim në disa konkurse të rëndësishme brenda e jashtë vendit. Kur ishte në moshën 20-vjeçare, me ftesën e konkursit ndërkombëtar të baletit të Lozanës, Huang Doudou interpretoi vallen "Shpirti i ushtarëve të dinastisë Qin" duke ngjallur jehonë të madhe në arenën ndërkombëtare të valleve. Ai është kërcimtari i parë kinez që interpretoi në këtë konkurs.

Huang Doudou u shpreh se me rritjen e moshës dhe me pasurimin e përvojës së interpretimit në skenë, atij i kanë lindur mendime të reja për vallen:

"Në fillim unë mora pjesë në konkurse të ndryshme vallesh për të fituar çmim. Gradualisht zbulova se ky nuk është qëllimi im, prandaj tani unë përpiqem të krijoj valle për të shfaqur mendimet e mia për jetën."

Me përpjekjet e palodhshme, çdo vit Huang Doudou krijon disa valle të shkëlqyera.

Në vitin 1999, me ftesën e SHBA-së, Huang Doudou dha shfaqje për herë të parë në këtë vend. Pas shfaqjes, ish-presidenti amerikan Gerald Ford u takua posaçërisht me të dhe e ftoi të japë përsëri shfaqje në SHBA. Edhe Huang Doudou shprehu shpresën se më shumë kërcimtarë kinezë do të japin shfaqje në SHBA për të shfaqur artin e kulturën kineze. Me përpjekjet e palëve të ndryshme, pas 3 vjetëve, Huang Doudou dhe kërcimtarë të tjerë të shquar kinezë vizituan SHBA-në për shfaqje, Gerald Ford e shikoi përsëri shfaqjen e tyre.

Në vitin 2006, me ftesën e Teatrit të Operës Metropolitane të SHBA-së, Huang Doudou bashkëpunoi me regjisorin e famshëm kinez Zhang Yimou dhe me muzikantin e famshëm kinez Tan Dun dhe krijoi operën "Perandori Qinshihuang". Huang Doudou ishte koreografi dhe kryekërcimtari i operës. Shumica e aktorëve të kësaj opere ishin artistë perëndimorë, Huang Doudou u shpreh se kjo operë thelloi njohjen e Perëndimit për artin kinez.

Në shkurt të këtij viti, Huang Doudou dhe shumë artistë të famshëm kinezë dhanë shfaqje në Barcelonë të Spanjës për të pritur Lojërat Olimpike të Pekinit. Huang Doudou u shpreh se si të gjithë kinezët, ai shpreson të japë kontributin e vet për Lojërat Olimpike të vitit 2008:

"Shfaqja në Barcelonë është një aktivitet me vlerë për Lojërat Olimpike të Pekinit. Si të gjithë kinezët, unë i përkrah shumë Lojërat Olimpike të vitit 2008 dhe dëshiroj të bëj gjithçka për to." (Fani)