Të dashur dëgjues, në rubrikën "Kultura tradicionale kineze" do të flasim për taktikën "Fshehja e hanxharit në mes të buzëqeshjes", taktika e 10-të nga libri "Tridhjetë e gjashtë skemat strategjike dhe taktike", një libër klasik kinez për artin ushtarak.

Në jetën e përditshme, shprehja "Fshehja e hanxharit në mes të buzëqeshjes" përdoret për të përcaktuar një njeri që hiqet si njeri modest, i ndershëm dhe i afrueshëm, por në fakt është i lig dhe i rrezikshëm. Kurse në fushën ushtarake, me këtë shprehje emërtohet taktika e mashtrimit dhe vënies në gjumë të kundërshtarit me mënyrat politike dhe diplomatike, me qëllim që të veprosh befasisht për të fituar në rrethanat kur kundërshtari e ndien veten të kënaqur në një atmosferë miqësie dhe ka humbur vigjilencën e gatishmërinë.

Kyçi i zbatimit të taktikës "Fshehja e hanxharit në mes të buzëqeshjes" është vënia në gjumë e kundërshtarit, me qëllim që të dobësojë vigjilencën. Në lëndët historike janë shënuar mjaft shembuj të zbatimit të suksesshëm të kësaj taktike.

Në shekulllin e 3-të të erës sonë, gjatë periudhës së Tri Perandorive në historinë kineze, perandoria Vei, që ishte më e fuqishmja, u mundua të shfaroste perandoritë Vu dhe Shu, që ishin me potencial relativisht të dobët. Prandaj këto dy të fundit u detyruan të formonin një aleancë kundër Veit. Madje Liu Bei, monarku i Shu-së, e mori për grua motrën e Sun Qunait, monarku i Vu-së. Por megjithatë, edhe midis Liu Beit dhe Sun Quanit shpërthente luftë shumë shpesh, sepse secili prej tyre kishte ambicie për të krijuar regjimin e vet të centralizuar. Taktika "Fshehja e hanxharit në mes të buzëqeshjes" u përdor me sukses edhe në luftën midis tyre.

Qyteti Gjingzhou i Shu-së ishte objekti që dy të tjerat synonin ta shtinin në dorë, sepse kishte pozitë të rëndësishme strategjike. Gjenerali i famshëm Guan Yu ishte ngarkuar me detyrën e mbrojtjes së këtij qyteti. Për ta vënë atë në gjumë, Lu Shyn, komandanti i ushtrisë së Vu-së, i dërgoi Guan Yu-së një letër, në të cilën e ngriti në qiell, duke shkruar se ai vetë, si një gjeneral shumë i ri, e respektonte shumë dhe donte të mësonte nga përvoja e tij. Guan Yu-së, që gëzonte famë ndër të gjithë komandantët e të tri perandorive, iu rrit mendja më tej. Ai u bind se Lu Shyni nuk përbënte rrezik ndaj qytetit Gjingzhou, prandaj i vuri të gjitha trupat për të sulmuar perandorinë Vei. Por pikërisht në atë kohë, Lu Shyni u mor vesh me Vei për të sulmuar Guan Yu-në nga dy drejtimet.

Ndërsa forcat kryesore të Guan Yu-së kishin arritur në vijën e parë të frontit dhe kishin filluar luftimet me forcat e Veit, Vu-ja dërgoi trupat e saj të mprehura për të marrë qytetin Gjingzhou. Ato u fshehën në anijet luftarake, të kamufluara si anije tregtie, u afruan fshehurazi në rrugën lumore, mësynë befasisht dhe morën qytetin Gjingzhou me një të goditur. Pastaj, njerëzit e Veit e përhapën qëllimisht këtë lajm në gjirin e forcave të Guan Yu-së, të cilat u gjendën menjëherë në rrëmujë. Tregimi për këtë ngjarje është ruajtur edhe sot në popull, e quajtur "Rënia e Gjingzhout nga pakujdesia". Guan Yu pësoi disfatën sepse ra në grackën e vënë nga Lu Shyni, i cili zbatoi taktikën "Fshehja e hanxharit në mes të buzëqeshjes". (Zheng)