dëgjoni

Dedema-ja 60 vjeçare ka lindur në një familje blegtori të qarkut Alashan në Rajonin Autonom të Mogolisë së Brendshme në veri të Kinës, prindërit e saj janë këngëtarë të njohur vendorë. Stepa e pafund dhe kullota e bukur ia kanë dhënë Dedema-së talentin muzikor. Kur ishte 13 vjeçe, ajo hyri në ekipin artistik Wulamuqi si një artiste e vogël. Në vitin 1964 ajo u pranua në Konservatorin e Kinës, ku studioi në mënyrë sistematike muzikën vokale. Pas diplomimit Dedema-ja u kthye në vendlindje duke filluar karrierën e saj prej këngëtareje.

Kënga që ndoqët është një këngë me shije të theksuar stepe me titull "Kam ardhur nga stepa", kënduar nga Dedema-ja.

Dedema-ja u bë e njohur më vonë në krahasim me moshatarët e saj. Gjatë 10 vjetëve pas diplomimit ajo punonte si soliste në Ansamblin e këngëve dhe valleve të Mongolisë së Brendshme dhe nuk tërhoqi vëmendjen e spektatorëve. Kur ishte 31 vjeçare, në një shfaqje në Guanzhou të Kinës jugore Dedema-ja këndoi këngën "Stepa e bukur, shtëpia ime" dhe u mirëprit me duartrokitjet e të gjithë spektatorëve. Zëri i saj kumbues dhe i veçantë, i butë dhe i bukur dhe interpretimi me ndjenja të përzemërta e bënë atë të njohur në mbarë vendin. Tani le të shijojmë së bashku këngën "Stepa e bukur, shtëpia ime".

Në vitin 1982 Dedema-ja erdhi në Pekin dhe filloi të punojë në Ansamblin Qendror të këngëve e valleve të Kombësive si nsoliste. Duke kombinuar mënyrën e këndimit klasik me atë mongol, ajo ka përsosur e zhvilluar pandërprerë mjeshtërinë e këndimit, duke ruajtur veçoritë e kombësisë ka krijuar gradualisht stilin e vetë të veçantë artistik. Interpretimi i saj me zë të bukur dhe me diapazon të gjerë ka forcë të fuqishme prekëse artistike. Shumë këngë të stilit të kombësisë mongole të interpretuara prej saj janë të përhapura gjerësisht në Kinë.

Të dashur dëgjues, kënga që po ndiqni titullohet "Era në qiell", kënduar nga Dedema-ja në gjuhën han e mongole. Kjo është një këngë e lashtë popullore e kombësisë mongole, në vitet 90' të shekullit të kaluar, Dedema-ja e interpretoi këtë këngë. Kjo këngë me gjuhë të thjeshtë e figurative dhe me melodi të bukur e të rrjedhshme përshkruan qendrimin përparimtar e aktiv të banorëve mongolë për jetën dhe shpreh ëndrrën e tyre për të ardhmen.

Në këngë thuhet: "Në qiell nuk ka re të pashpërndara, në tokë nuk ka vite të pavdekshme. Vitet nuk mund të jenë të përjetshme, ne duhet ta çmojmë kohën e bukur. Rrezet e yjeve ndriçojnë qiellin e natës, mençuria e gjelbëron zbrazëtinë e jetës. Le të hapim krahët e shpresave, për ta përqafuar idealin me duart tona."

Pikërisht në kohën kur Dedema-ja këndonte me gjithë forcën e shpirtin, fatkëqësia i ra në kokë. Në vitin 1998, Dedema-ja u ftua në një koncert të madh në Japoni. Kur interpretonte këngën e 2-të, ajo e ndjente veten shumë të pafuqishme. Atë e zuri hemorragjia cerebrale dhe u paralizua e gjithë pjesa e djathtë e trupit. Por sëmundja nuk e shpartalloi shpirtin e saj, ajo filloi një luftë të gjatë dhe të vështirë me sëmundje.

Pas një mjekimi 9 mujor, në tetor të vitit 1999 Dedema-ja u ngrit përsëri në skenë. Ajo tha se pas provave për jetë a vdekje, ajo ka pasur një kuptim të ri për jetën dhe filloi përsëri karrierën e saj artistik. Në fund të vitit 2001, Dedema-ja nxori albumin e saj të 3-të me titull "Bariu". Pas një viti ajo nxori albumin tjetër me titull "Çadra e kuqe e Dedema-së".

Të dashur dëgjues, kënga që ndiqni, titullohet "Bariu". Në fillim vegla muzikore popullore matouqin ekzekutoi melodinë e shtruar dhe të thellë, dhe fill pas kësaj doli kënga e Dedema-së me ndjenja të thella, duke shprehur plotësisht vështirësitë e jetës shtegtare të blegtorëve mongolë dhe frymën e tyre këmbëngulëse dhe optimiste.

Tani Dedema-ja po aktivizohet përsëri në skenën e muzikës popullore kineze. Në vitin 2007 ajo organizoi koncertin recital. Në fund të programit do të dëgjojmë së bashku këngën "Në mes të vjeshtës së kohës".(pina)