(Lu Shanzhen)

Në Kampionatin Botëror të Gjimnastikës, që u zhvillua në vitin 2006 në kryeqytetin e Danimarkës Kopenhagë, skuadra kineze e gjimnastikës për femra, e kryesuar nga trajneri i njohur kinez Lu Shanzhen, arriti suksesin më të madh gjatë 53 vjetëve, duke u shpallur për herë të parë kampion si ekip në Kampionatin Botëror të Gjimnastikës. Si e arriti këtë sukses kaq të madh historik skuadra kineze? Çfarë roli ka luajtur kryetrajneri Lu Shanzhen në këtë proces? Sot, në minirubrikën " Sporti i Kinës", ju ftojmë që të dëgjoni korrespondencën me titull "Trajneri Lu Shanzhen që drejton ekipin kinez të gjimnastikës për femra".

Tani, ekipi kinez i gjimnastikës për femra po ndodhet në periudhën më të shkëlqyeshme historike. Por në fakt, para vitit 2006, ekipi kinez nuk kishte pasur arritje të mëdha. Lu Shanzhen me përvojë të pasur e ka të qartë këtë histori. Ai analizoi problemin e ekipit kinez kështu:

"Në përgjithësi, për shumë vjet, ekipi kinez i gjimnastikës për femra kishte arritur rezultate të mira vetëm në garat individuale, por nuk kishte fituar titullin e kampionit si ekip. Ekipi kinez kishte rezultate të mira në gara si ajo e paraleles së shkallëzuar dhe trau i ekuilibrit, por nuk kishte pasur arritje të mëdha në kërcimin e kaluçit dhe gjimnastikën e lirë."

Megjithatë, dalja e Chen Fei-it e ndryshoi historinë. Në Kampionatin Botëror të Gjimnastikës të vitit 2005, Chen Fei u bë gjimnastja e parë kineze që fitoi titullin e kampionit botëror në kërcimin e kaluçit. Në Kampionatin Botëror të vitit 2006, ajo fitoi 3 tituj kampion në garat gjimnastikore si ekip, të kërcimit të kaluçit dhe të gjimnastikës së lirë. Në Kupën Botërore në vitin 2007, ajo fitoi përsëri medaljet e arta në kërcimin e kaluçit, gjimnastikën e lirë dhe traun e ekuilibrit. Një veprim në kërcimin e kaluçit që emërtohet me emrin e saj "Kërcimi i Chen Fei-t" mund të arrihet vetëm nga pak njerëz në botë.

Me paraqitjen e shkëlqyeshme të Chen Fei-it, edhe gjimnastet e tjera të ekipit kinez tregojnë nivel të qëndrueshëm. Pra, si përgatiten këta gjimnastë të shkëlqyer nga trajneri Lu Shanzhen? Ai na tregoi:

"Preferoj që ta bëj stërvitjen nisur nga cilësitë personale të gjimnastëve. Kërkoj gjithmonë që të arrij fitim të madh me kosto të ulët. Nuk synoj asnjëherë për kohëzgjatjen e trajnimit. Kohëzgjatja e trajnimit të sportisteve të mia është e ndryshme nga njëra-tjetra."

Mënyra e trajnimit të Lu Shanzhen-it është shpërblyer me rezultatet e mira. Edhe ai vetë u bë person i shquar në historinë e gjimnastikës kineze.

Rruga e zhvillimit të sportit është e pafund. Megjithëse Lu Shanzhen dhe skuadrat e tij kanë krijuar histori, koha po kalon, sfida po vazhdon. Në shtatorin e këtij viti, do të organizohet në Shtutgart të Gjermanisë Kampionati i 40-të Botëror i Gjimnastikës. Në shortin për radhën e garave, ekipi kinez i gjimnastikës për femra nuk kishte fat. Mund të thuhet që ato patën shortin më të keq. Ato u klasifikuan në grupin e parë. Ekipi kinez jo vetëm do të paraqitet në garë në mëngjes, por edhe do të jetë i pari. Për sporte si gjimnastika ku rezultati është me pikë, dalja më parë në paraqitje ka ndikime shumë negative. Ekipi kinez që mbron titullin e kampionit ka dobësitë e veta. Lu Shanzhen është i ndërgjegjshëm për këtë.

"Chen Fei e ndihmoi ekipin kinez për fitimin e titullit kampion si ekip. Megjithatë, kam merak më të madh për nivelin e ekipit tonë në kërcimin e kaluçit dhe gjimnastikën e lirë. Përveç Chen Fei-it, nuk kemi gjimnaste tjetër që t'i afrohet nivelit të saj."

Por, Lu Shanzhen dhe skuadrat e tij janë përgatitur për sfidat, jo vetëm për kampionatin, por edhe për sfidën më të rëndësishme, Lojërat Olimpike të Pekinit në vitin 2008. Ai ëndërron shumë që të drejtojë ekipin për të fituar medalje olimpike në atdheun e vet. Kjo është edhe ëndrra e të gjithë kinezëve.

"Organizimi i lojërave olimpike në Kinë është një gjë krenare për çdo kinez. Të gjithë trajnerët dhe sportistët që aktivizohen në arenën sportive nuk dëshirojnë ta humbin këtë rast dhe do të përpiqen për medalje ari. Prandaj, edhe ne ekipi kinez i gjimnastikës për femra, duhet të fitojmë medalje ari." (xuguang)