dëgjoni

Ashtu si shumë qytete të mëdha në botë, edhe Pekini përballon presion të madh në komunikacion. Pas disa muajve, Lojërat Olimpike do të hapen në Pekin. Kështu, nëse mund të garantohet qarkullimi normal në Pekin ka tërhequr shumë vëmendjen e botës. Ditët e fundit, funksionarë përkatës të Komitetit Organizator të Lojërave Olimpike të Pekinit dhe të Bashkisë së Pekinit u shprehën përkatësisht se gjatë Olimpiadës së Pekinit do të garantohet patjetër komunikacioni dhe në këtë drejtim Pekini është i gatshëm. Do të ndiqni tani një reportazh lidhur me këtë.

Për të zbutur presionin e trafikut dhe për krijimin e një mjedisi të mirë të komunikacionit për organizimin e Lojërave Olimpike, vitet e fundit Bashkia e Qytetit të Pekinit ka bërë përpjekje kolosale. Nënkryetari i Bashkisë së Pekinit z. Ji Lin shpjegoi se gjatë 5 vjetëve të kaluar, Pekini ka investuar gjithsej 110 miliardë juanë për përmirësimin e infrastrukturës në komunikacion.

"Pekini ka forcuar ndërtimin e infrastrukturës së komunikacionit, që përfshin dy aspekte. Njëri janë rrugët. Qoftë në autostradat apo rrugët urbane, kemi bërë shumë investime. Tjetri është komunikacioni me binarë, për të cilin kemi bërë shumë përpjekje, kemi dhënë fonde të mëdha dhe kemi pasur efektivitet të madh."

Në tetor të vitit të kaluar, u vu në shfrytëzim linja e 5-të e metrosë, një arterie e madhe komunikacioni, që përshkon zonën urbane të Pekinit nga jugu në veri. Kështu gjatësia e përgjithshme e metrosë në Pekin i kalon 140 km dhe vëllimi i transportimit të udhëtarëve ka arritur në 2.2 milionë, gjë që e përmirëson shumë gjendjen e bllokimit të trafikut në Pekin.

Për të shtuar forcën tërheqëse të komunikacionit publik për banorët, Pekini ka krijuar kanal të posaçëm për autobus, ka përhapur kartën IC të autobusëve, që përdoret më lehtë, dhe ka zbatuar politikën e biletave të lira të autobusit. Tani, në Pekin në linjat kryesore të autobusëve, çmimi i biletave është vetëm sa 40 % e çmimit të kaluar; ndërkohë, për komunikacionin me binarë, pavarësisht nga gjatësia apo hera e ndërrimit, çmimi i biletave është vetëm sa 2/3 e atij të kaluar. Me këto masa konkrete, përqindja e pekinasve që udhëtojnë me komunikacion publik është ngritur në 34 %, duke e kaluar përqindjen e banorëve që udhëtojnë me vetura private.

Për përmirësimin e gjendjes së trafikut, pekinasit kanë ndjenja të thella. Z. Li Jian është pedagog në një universitet të Pekinit. Ai tha se përmirësimi i komunikacionit i ka sjellë lehtësi të paparë.

"Këto masa për përmirësimin e komunikacionit na kanë sjellë shumë lehtësi. Edhe çmimi i biletave u ul nën kontrollin e bashkisë së Pekinit, gjë që na kursen paratë. Jam shumë i kënaqur."

Për këtë ka ndjenjë të thellë edhe korrespondenti i gazetës braziliane "Globo", Gjilberto Skofield, që jeton në Pekin prej 4 vjetësh.

"Mund të shoh nga afër përpjekjet e qeverisë kineze në përmirësimin e komunikacionit të Pekinit, që kanë zbutur në tërësi presionin e trafikut."

Megjithatë, një problem i pashmangshëm është që në Pekin ka mbi 16 milionë banorë të përhershëm dhe mbi 3 milionë automjete, ndërsa numri i automjeteve shtohet me një ritëm prej 1000 në ditë. Me aq shumë banorë dhe automjete, në kulmin e qarkullimit të automjeteve për vajtje-ardhjen nga puna, disa pjesë rruge ende bllokohen. Pas disa muajve do të zhvillohen në Pekin Lojërat Olimpike dhe Pekini do të presë miliona sportistë, trajnerë, shikues e turistë kinezë dhe të huaj. Kështu, kërkesat për komunikacion do të arrijnë kulmin historik. Pikërisht për këtë, komunikacioni është bërë hallkë e rëndësishme në punët përgatitore për këto lojëra.

Për të realizuar objektivin e trafikut të lirshëm gjatë Lojërave Olimpike të Pekinit, sektori përkatës hartoi projektin e administrimit të komunikacionit gjatë Olimpiadës dhe do ta publikojë së shpejti. Nënkryetari ekzekutiv i Komitetit Organizativ të Lojërave Olimpike të Pekinit, z. Wang Wei, u shpreh me besim të plotë:

"Gjatë Lojërave Olimpike do të zgjidhet problemi i komunikacionit. Do të marrim disa masa dhe më e rëndësishmja prej tyre është kanali i gjelbër olimpik. Të gjitha automjetet me shenjë olimpike do të ndjekin kanale të posaçme olimpike, që të garantohet arritja në kohë e sportistëve dhe e shikuesve në pallate e stadiume."

Mësohet se kanalet e posaçme të Lojërave Olimpike të Pekinit përfshijnë sferën më të madhe në krahasim me edicionet e kaluara të Olimpiadës. Sipas premtimeve të Komitetit Organizativ të Lojërave Olimpike të Pekinit, gjatë këtyre lojërave nga vendbanimi deri në terrenet sportive, sportistët nuk do të shpenzojnë as 30 minuta.

Përveç këtyre, nënkryetari i Bashkisë së Pekinit, z. Ji Lin, bëri të ditur gjithashtu se gjatë Lojërave Olimpike, Pekini do të marrë disa masa të kufizimit të qarkullimit, por njëkohësisht do të përpiqet të pakësojë në minimum ndikimet e këtyre masave ndaj punëve e jetës së zakonshme të banorëve të Pekinit.

"Atëkohë, do të kontrollojmë qarkullimin e automjeteve, që do të thotë automjetet do të qarkullojnë sipas numrit tek a çift të licencës së tyre. Sigurisht, në përputhje me këtë masë, qeveria do të përdorë edhe metoda inkurajuese dhe politikë kompensimi."

Vitin e kaluar, Pekini provoi masat e kufizimit të qarkullimit të automjeteve dhe pati efekt të mirë. Ky eksperiment i dha bazë hartimit të masave të kufizimit të qarkullimit gjatë Lojërave Olimpike. Këto masa gjetën mirëkuptim dhe përkrahje edhe në banorët e Pekinit. Z. Zhang Duo është pronari i një veture private. Nga këndvështrimi i tij, masat e kufizimit të qarkullimit i bënë rrugët më të lira.

"Vitin e kaluar, gjatë periudhës së qarkullimit të veturave sipas numrit tek e çift, automjetet në rrugë u pakësuan dukshëm dhe rendi i trafikut u përmirësua shumë. Çdo pronar i automjeteve private shpreson se një gjendje e tillë do të përsëritet jo vetëm gjatë Lojërave Olimpike, por edhe në ditët e zakonshme në të ardhmen."

Mësohet se para hapjes së Lojërave Olimpike, në Pekin do të futen në shfrytëzim edhe disa linja metroje, duke përfshirë një linjë që përshkon zonën qendrore olimpike të Pekinit. Atëherë, gjatësia e përgjithshme e metrosë në Pekin do të arrijnë në 200 km. Krahas këtyre, gjatë Lojërave Olimpike të Pekinit do të hapen edhe 34 linja të posaçme të autobusëve në shërbim të garave olimpike. Shikuesit kinezë dhe të huaj me bileta olimpike do të gëzojnë falas këto linja të posaçme.

Në kohën e garantimit të komunikacionit të lirë gjatë Lojërave Olimpike, administrata e Pekinit ka marrë parasysh edhe krijimin e mekanizmit afatgjatë për zgjidhjen e problemit të komunikacionit në këtë qytet, duke përfituar nga rasti olimpik. Nënkryetari i Bashkisë së Pekinit Ji Lin shpjegoi se punët përgatitore për Lojërat Olimpike kanë nxitur ndërtimin e infrastrukturës rrugore në Pekin. Pas Olimpiadës, Pekini do të vazhdojë të marrë masa të ndryshme në këtë drejtim, që të zgjidhë problemin e komunikacionit në mënyrë afatgjatë.

"Në të ardhmen do të nxjerrim masa konkrete. Rrugëzgjidhja thelbësore është forcimi i komunikacionit me binarë. Tjetër metodë është shtimi i forcës tërheqëse të trafikut rrugor dhe i efektivitetit të tij."

Sipas planifikimit të Bashkisë së Pekinit, deri në vitin 2012 përqindja e banorëve që përdorin komunikacionin publik do të arrijë në 50 %. Deri në vitin 2015, në Pekin do të formohet një rrjet i metrosë me gjatësi prej 561 km, shifër kjo që do ta kalojë atë të Nju-Jorkut, dhe Pekini do të jetë qyteti me metronë më të gjatë në botë. Krahas këtyre, Pekini do të ngulë këmbë për një kohë të gjatë në politikën e çmimit të ulët të komunikacionit publik, që banorët dhe turistët të gëzojnë shërbime komunikacioni të lehta, të shpejta dhe të lira në Pekin. (Wang Lei) (Artan)