dëgjoni 

Për shkak të zhvillimit të paekuilibruar ekonomik dhe shoqëror, kushtet e arsimit në fshatin kinez nuk kanë qenë të mira dhe niveli i mësuesve ka qenë relativisht i ulët. Administratat e krahinave të ndryshme të Kinës kanë bërë përpjekje të shumta me qëllim që edhe fëmijët në fshat të arsimohen mirë ashtu si fëmijët në qytet. Një nga ato është edhe qyteti Gjintan i provincës Gjangsu të Kinës Lindore.

Vitet e fundit, administrata e qytetit Gjintan ka shtuar investimet për arsimin në fshatrat e periferisë së këtij qyteti, duke ndihmuar në ndërtimin ose modifikimin e ndërtesave të shkollave dhe shtimin e pajisjeve mësimore. Gjatë dy vjetëve të fundit, shkolla Antou, një shkollë e arsimit fillor dhe arsimit të periudhës së ulët të arsimit të mesëm, investoi 8 milionë juanë për përmirësimin e kushteve mësimore. Kjo shkollë zë vendin e parë në gjithë provincën për cilësinë e mësimdhënies. Për këtë foli drejtori i shkollës Antou, zoti He Xiaohei.

"Shkolla eksperimentale Antou ka ngritur nga viti në vit nivelin mësimdhënës. Në vitin 2007, 90 % e nxënësve që mbaruan shkollën tonë u pranuan në shkolla të periudhës së lartë të arsimit të mesëm dhe 40 % e tyre u pranuan në shkolla të mesme të rëndësishme. Shkolla jonë ka arritur në përgjithësi objektivin e nivelit mësimdhënës si në qytet."

Shkollat në fshatrat e periferisë së qytetit Gjintan, duke marrë shembull nga parimet e përparuara ideore të shkollave në qytet, kanë vendosur mjaft lëndë mësimore sipas interesit të nxënësve. Në shkollën fillore Baita, mësimi i prerjes artistike të letrës është mirëpritur nga nxënësit. Sot në këtë shkollë është hapur një sallë e posaçme, ku vihen në ekspozitë veprat e bukura të nxënësve, si ato të prerjes artistike të letrës dhe të gdhendjes artistike në karton. Që nga viti 2002 e deri në vitin 2007, veprat artistike të nxënësve të kësaj shkolle kanë fituar disa herë çmime në konkurse kombëtare dhe provinciale. Mësuesja Cao Yujiao, që merret me edukimin artistik, ka dhënë kontribut në zhvillimin e edukimit artistik të kësaj shkolle.

"Në shkollën tonë, mësimi i gdhendjes së figurave në karton ka kaluar një proces nga aktivitetet e interesit vetjak në krijimin e karakteristikave të edukimit artistik dhe pastaj në krijimin e një kulture karakteristike me vete. Në vitin 2007, me ndihmën e Institutit Studimor qytetar të gdhendjes së figurave në karton, shkolla jonë organizoi personelin për të përpiluar posaçërisht tekstet e kësaj lënde mësimore dhe tani gdhendja e figurave në karton është bërë një lëndë mësimore normale."

Li Gjia Rui, nxënëse e klasës së 6-të të shkollës fillore Baita, thotë se asaj i pëlqen shumë ky mësim arti.

"Unë fillova të mësoj gdhendjen e figurave në karton qysh nga koha kur isha në klasën e 3-të, sepse më pëlqen shumë ky art. Vepra ime 'Loja e laraskave' fitoi çmim në Ekspozitën e 8-të kombëtare me temë 'Yje të shekullit' të arritjeve të edukimit artistik të pionierëve. Kjo lëndë mësimore jo vetëm më brumos me art, por edhe më ndihmon të përparoj në drejtime të tjera."

Për ta çuar më përpara zhvillimin relativisht të shpejtë të arsimit në fshat, qyteti Gjintan organizon edhe shkëmbimet ndërmjet mësuesve të qytetit dhe atyre të periferisë. Duke filluar nga vjeshta e vitit 2007, 50 mësues të dalluar të qytetit kanë zhvilluar shkëmbime me 50 mësues të periferisë. Zoti Li Da, drejtori i Drejtorisë së Arsimit të qytetit Gjintan, thotë se ata kanë plan që, në 4 vjetët e ardhshëm, secili nga mësuesit e rinj e të dalluar të qytetit të punojë për 1 vit në një shkollë të periferisë dhe shkollat në periferi të qytetit të dërgojnë një pjesë të mësuesve të tyre për shkëmbim e specializim në qytet, me qëllim që të ndryshojë gjendja e mosekuilibrimit të nivelit të mësuesve të qytetit dhe fshatit.

Mësueses He Çunhua të shkollës fillore Baita iu dha rasti për të dhënë mësimin e gjuhës në klasën e 3-të të shkollës fillore Çangsheng të qytetit Gjintan pikërisht nëpërmjet shkëmbimeve midis mësuesve të fshatit dhe atyre të qytetit. Sipas planit, ajo do të punojë në qqytet për 6 muaj. Ajo tha se ka vënë re se mësuesit në qytet kanë shumë gjera të mira në parimet dhe metodat mësimdhënëse që janë të vlefshme edhe për mësuesit në fshat.

Praktika e qytetit Gjintan është një pasqyrë e përpjekjeve që bëhen në Kinë për ta çar më përpara zhvillimin e arsimit në fshat. Vitet e fundit, me ndihmën financiare të qeverisë kineze, janë përmirësuar kushtet mësimore të shkollave në fshat, është forcuar specializimi i mësuesve të shkollave të mesme dhe të shkollave fillore, janë përmirësuar kushtet e punës dhe jetës të mësuesve dhe është thelluar reforma e lëndëve mësimore të shkollave në fshat. (Zheng)