(liang fuping dhe gruaja e tij)

dëgjoni

Në qytetin Congqing të Kinës jugperëndimore, këngëtari Liang Fuping njihet pothuajse nga të gjithë. Megjithëse ka paaftësi fizike në këmbë, ai merr pjesë në konkurse të ndryshme të këngës dhe ka botuar album me këngë. Liang Fuping është një njeri optimist dhe i përballon vështirësitë në jetë me këngë.

Liang Fuping lindi në vitin 1963 në qytetin Congqing afër lumit Jialing. Nëna e tij ishte tekstiliste, babai punonte në stacionin e trenit. Ata ishin të ngarkuar me punë dhe nuk kishin shumë kohë të kujdeseshin për Liang Fupingun e vogël. Kur ishte në moshën 2-vjeçare, Liang Fuping u sëmur nga poliomieliti, që i shkaktoi paaftësi fizike në këmbën e djathtë. Liang Fuping kujton se në moshën e fëmijërisë, ai nuk mund të luante së bashku me fëmijët e shëndetshëm, miku i tij më i mirë ishte muzika:

"Më pëlqente shumë këndimi qysh në moshë të re. Kur dëgjoja një këngë të këndshme, do ta studioja se si ta këndoja mirë."

Liang Fuping përdori çdo rast për të mësuar muzikën. Ai mësoi teorinë dhe njohuritë bazë muzikore në shkollë dhe kopjoi këngëtarë të tjerë në këndim. Çdo ditë, Liang Fuping këndonte për dy orë buzë lumit Jialing dhe nuk pushonte asnjë ditë. Vëllai i tij Liang Fuyong kujton:

"Në verë, ne notonim në lumë, kurse Liang Fuping këndonte buzë lumit. Kur binte shi, unë i mbaja çadrën."

Lumi i bukur Jialing ka vërtetuar entuziazmin dhe dashurinë e Liang Fupingut për muzikën dhe ka ngjallur frymëzimin e tij. Liang Fuping krijoi këngën e parë "Lumi i bukur Jialiang", ai u shpreh se çdo herë kur sheh lumin Jialing, ai ka dëshirë të këndojë për të.

Në vitin 1982, Liang Fuping nisi punën e parë të tij, punëtor në një fabrikë. Me marrjen e rrogës, ai mund të blinte instrumente muzikore, njëkohësisht filloi të japë shfaqje:

"Harxhova 88 juanë dhe bleva një kitarë. Mbaj mend që atë ditë kur bleva kitarën, isha shumë i emocionuar dhe i rashë tërë ditën pa futur gjë në gojë. Drejtori i fabrikës dëgjoi se unë mund të këndoj dhe më dërgoi të marr pjesë në shfaqje artistike ose konkurse të këndimit, një herë unë fitova çmimin e parë në një konkurs."

Megjithëse të ardhurat e tij ishin të pakta, Liang Fuping bleu shumë libra e revista muzikore dhe studioi teorinë muzikore. Njëkohësisht ai mori pjesë pandërprerë në konkurse të ndryshme të këndimit dhe fitoi shumë çmime, duke u bërë i famshëm në qytetin Congqing dhe në krahinat jugperëndimore të Kinës. Por pas martesës dhe lindjes së vajzës, u shtua shumë presioni i jetesës, të ardhurat e pakta të Liang Fupingut nuk mund të mbështetnin më jetesën e familjes:

"Në vitin 1989, më lindi vajza. Në atë kohë gruaja ime nuk kishte punë, rroga ime ishte e vogël, prandaj vendosa të lë punën dhe u bëra këngëtar endacak."

Liang Fuping mori kitarën e vet dhe filloi jetën e këngëtarit endacak. Ai këndoi në rrugët kryesore të qytetit Congqing dhe shkoi në qytete të tjera për këndim. Por zgjedhja e Liang Fupingut nuk ia përmirësoi jetesën, përkundrazi martesa e tij u prish. Në këtë kohë, muzika e ndihmoi atë të dalë nga gjendja e vështirë. Në vitin 2005, Liang Fuping mori pjesë në konkursin e këngëtarëve me aftësi të kufizuara fizike të mbarë vendit dhe fitoi çmimin e këngëtarit më të mirë. Njëkohësisht ai fitoi përsëri dashurinë. Në një takim, ai njohu vajzën e virtytshme A Jiao. Për A Jiaon, paaftësia fizike nuk është pengesë për dashurinë e tyre, ajo do jo vetëm talentin dhe këngët e Liang Fupingut, por edhe qëndrimin optimist të tij për jetën:

"Jam e magjepsur nga talenti i tij. Njëkohësisht ai është një njeri i përgjegjshëm për familjen."

Në vitin 2007, Liang Fuping pati pikën e kthesës në karrierën e vet. Në dhjetor doli në mbarë vendin albumi i parë i tij me këngë "Supet e burrit".

Liang Fuping u shpreh se këngët e albumit "Supet e burrit" janë mendimet e vërteta të tij dhe tregojnë plotësisht jetën e tij:

"Megjithëse kam paaftësi fizike, nuk kam humbur vetëbesimin. Unë gëzoj plotësisht jetën e lumtur." (Fani)