Ju flet radio e Jashtme e Kinës. Të dashur dëgjues, në rubrikën "Kultura tradicionale kineze" do të flasim për taktikën "Bujë në lindje, sulm në perëndim", taktika e 6-të nga libri "Tridhjetë e gjashtë skemat strategjike dhe taktike", një libër klasik kinez për artin ushtarak.

Taktika "Bujë në lindje, sulm në perëndim", që përdoret shumë shpesh në luftë, do të thotë që të fillosh sulmin nga drejtimi lindor vetëm për të mashtruar kundërshtarin dhe, në kohën kur kundërshtari tërheq forcat kryesore për në anën lindore duke e lënë anën perëndimore të zbrazët, ta sulmosh befasisht dhe të fitosh me një të goditur. Një dredhi e tillë mashtruese u përdor gjerësisht në betejat e luftërave të Kinës së lashtë.

Në shekullin e 2-të të erës sonë, në kohën e dinastisë Han Lindore, gjenerali Zhu Jun, duke komanduar trupat qeveritare, sulmoi një repart të kryengritësve fshatarë që quheshin "Trupat e peshqirëve të verdhë", sepse secili prej tyre e mbështillte kokën me një peshqir të verdhë. Pas betejave të shumta, Zhu Jun nuk fitonte dot mbi kryengritësit, që kishin zënë qytetin Vançeng dhe mbroheshin vendosmërisht. Kështu, ai ndërtoi një kodër të vogël prej dheu dhe filloi të vëzhgonte nga andej. Më pas, ai urdhëroi trupat qeveritare që të sulmonin drejt murit jugperëndimor të qytetit, duke bërë bujë të madhe. Trupat kryengritëse, që kujtonin se Zhu Jun do të sulmonte me të vërtetë anën jugperëndimore të qytetit, u grumbulluan atje dhe u bënë gati për kundërsulm. Duke parë se kryengritësit ranë në grackë, trupat qeveritare, të prira personalisht nga Zhu Juni, sulmuan fuqimisht në anën verilindore të qytetit, që ishte bërë pika e dobët e kundërshtarit, Zhu Jun mori lehtë qytetin, duke ngadhënjyer mbi kryengritësit.

Kuptimi thelbësor i taktikës "Bujë në lindje, sulm në perëndim" është që t'i krijosh kundërshtarit shfaqje false dhe përshtypje të gabuara. Kjo taktikë përdoret gjerësisht edhe në luftën moderne. Në periudhën e fundit të Luftës së 2-të botërore, kjo taktikë u përdor me sukses në operacionin e njohur të Normandisë. Para operacionit për të zbarkuar në Normandi më 6 qershor të vitit 1944, trupat aleate ishin përgatitur për 2 vjet. Për të hutuar trupat gjermane, ato kishin përhapur informata false dhe hiqeshin sikur do të fillonin sulmin. Më në fund, gjermanët u bindën se trupat aleate do të sulmonin për të zbarkuar në Kalais. Madje, edhe në kohën kur trupat aleate filluan luftimin për zbarkim në Normandi, gjermanët besonin se ky ishte veprim fals dhe se më pas trupat aleate do të sulmonin fuqimisht në Kalais, prandaj nuk vunë në veprim repartet e tyre të përgatitjes strategjike, të pajisura dhe të stërvitura shumë mirë, duke humbur rastin e volitshëm të kundërsulmit. Kështu që, trupat aleate zbarkuan me sukses në Normandi. Operacioni i Normandisë qe një nga operacionet më me rëndësi vendimtare në luftën e dytë botërore.

Në trajtimin e çështjeve gjyqësore, disa gjyqtarë hutojnë të dyshuarit gjatë bisedës që duket e pakuptim, dhe u bëjnë pyetje kyçe në kohën kur të dyshuarit dobësojnë vigjilencën. Kështu, të dyshuarit thonë të vërtetën kur nuk përgatiten shpirtërisht. Kjo metodë është mishërimi i taktikës "Bujë në lindje, sulm në perëndim" në jetën e përditshme. (Zheng)