Ju flet Radio e Jashtme e Kinës. Të dashur dëgjues, në rubrikën e sotme "Shkenca, arsimi dhe shëndetësia" do të japim reportazhin me titull "Qyteti i shkencës dhe arsimit Çangzhou, shëmbulli i arsimit profesional në provincën Gjangsu".

Në qytetin Çangzhou të provincës Gjangsu të Kinës Lindore, gjendet një bllok ndërtesash të shkollave të arsimit të lartë profesional, të institucioneve të kërkimeve shkencore dhe të ndërmarrjeve industriale, që quhet "Qyteti i shkencës dhe arsimit Çangzhou" dhe që gëzon famë në mbarë Kinën.

Çangzhou ndodhet në deltën e lumit Jance, që është një zonë e rëndësishme ekonomike në Kinë dhe që kufizohet me qytetet e mëdha të zhvilluara ekonomikisht si Shangai, Nankin dhe Suzhou, prandaj ka epërsi të dukshme gjeografike. Duke filluar nga viti 2002, në Çangzhou ndërtohet "Qyteti i shkencës dhe arsimit" si një zonë e eksperimentimit të zhvillimit dhe reformës së arsimit të lartë profesional në provincën Gjangsu. Deri tani, 5 shkolla të larta profesionale janë shpërngulur këtu. Ato kanë specialitete të plota, si ato të teknikës së informacioneve, tekstileve, mekanizmit, energjisë elektrike etj që do të plotësojnë në përgjithësi kërkesat e ndërmarrjeve industriale për kuadro teknikë të nivelit të lartë. Për zhvillimin e këtushëm, foli zoti Lu Gjinlin, shefi i zyrës së Qytetit të shkencës dhe arsimit Çangzhou.

"5 shkollat e larta profesionale të këtushme i pranojnë studentët e rinj nga 14 provinca dhe numri i studentëve që po studiojnë në to ka arritur në 76 mijë. Këtu është formuar një zonë e arsimit të lartë profesional me pajisje të përsosura."

Këtu janë ndërtuar disa baza mësimdhënie në praktikë, si ato të teknologjive moderne të kontrollit, teknologjive të veglave të modeleve, makinerive metalprerëse të kontrollit të shifruar etj. Këto baza jo vetëm kanë të mira në uljen e kostos dhe rritjen e rendimentit, por edhe janë të dobishme për studentët. Ndryshe nga mënyra mësimdhënëse e shkollave të larta të përgjithshme, shkollat e këtushme i kushtojnë më shumë rëndësi rritjes së aftësisë teknike të studentëve nëpërmjet praktikës. Zakonisht pedagogët e këtyre shkollave jo vetëm u shpjegojnë studentëve se si është krijuar një teknologji e caktuar, por edhe i bëjnë ata që të dinë se si ta shfrytëzojnë këtë teknologji më lehtë, me rendiment më të lartë dhe në mënyrë më shkencore.

Në qendrën e ushtrimeve të teknikës së saldimit dhe të matjes, korrespondenti ynë vuri re se studentët po bënin praktikë në një ofiçinë mjaft të gjerë dhe plot me dritë.

Shi Gjin, student i specialitetit të saldimit të Institutit të Inxhinierisë të Çangzhout, thotë se ai bën praktikë këtu që nga viti i dytë i studimeve të tij. Ai thotë se kjo praktikë ka lidhje të drejtpërdrejta me punën e tyre të ardhshme, prandaj ka të bëjë me punësimin e tyre.

Li Hao, student i fakultetit të inxhinierisë së automjeteve të Institutit të Mekanizmit dhe Energjisë Elektrike të Çangzhout, është optimist për punësimin e ardhshëm të tij.

"Unë jam i mendimit se profesioni i automjeteve ende është një profesion i porsanisur në Kinë dhe perspektiva e zhvillimit të industrisë së automjeteve është e mrekullueshme. Unë studioj teknologjitë e mirëmbajtjes dhe kontrollit të automjeteve. Kam nënshkruar tashmë kontratën me qendrën 4S të një qyteti automjetesh dhe do të nis punë së shpejti."

Lidhur me punësimin e të diplomuarve, zoti Lu Gjinlin, shefi i zyrës së Qytetit të shkencës dhe arsimit Çangzhou, tha se 5 shkollat e tyre të larta profesionale zënë vendet e para në gjithë provincën Gjagsu për sa i përket përqindjes së punësimit të të diplomuarve. Ai tha se, gjatë këtyre vjetëve, të diplomuarit e këtyre shkollave u punësuan qind për qind. Numri i diplomuarve të tyre nuk plotëson dot kërkesat, madje studentët e tyre caktohen për punësim me porosi nga ndërmarrjet qysh në vin e parë dhe të dytë të studimve.

Hang Yongbao, zv-drejtori i arsimit i qytetit Çangzhou, thotë se administrata e qytetit i kushton shumë rëndësi zhvillimit të arsimit profesinal. Sot në gjithë qytetin ka 36 shkolla të larta dhe të mesme profesionale. Pikerisht me përkrahjen e administratës së qytetit, numri i kursantëve të shkollave të mesme profesionale e ka kaluar numrin e nxënësve të shkollave të mesme të përgjjithshme dhe gjendja e punësimit është e kënaqshme.

"Numri i kursantëve të shkollave të mesme profesionale në qytetin tonë është afro 180 mijë. Përqindja e punësimit të të diplomuarve ka qenë gjithmonë mbi 96 %. Nën drejtimin e administratës së qytetit, ne propagandojmë aktivisht rëndësinë e zhvillimit të arsimit profesional. Zhvillimin me të gjjitha forcat të arsimit profesional e konsiderojmë si një çështje me rëndësi strategjike." (Zheng)