dëgjoni

Në Kampionatin Botëror të Atletikës në fushë të mbyllur 2008, që u mbyll pak kohë më parë, atletët kinezë fituan 1 medalje të artë dhe 1 të bronztë, duke arritur rezultatin më të mirë gjatë 20 vjetëve të fundit. Nuk mbeten as 5 muaj para hapjes së Lojërave Olimpike të Pekinit, prandaj nëpërmjet këtij kompionati, u testua efektiviteti i stërvitjeve përgatitore të atletëve kinezë për Olimpiadën. Do të ndiqni tani një reportazh lidhur me këtë.

Si veprimtaria e parë dhe e rëndësishme atletike në vitin 2008, Kampionati Botëror i Atletikës në fushë të mbyllur, që u zhvillua në mars në Valencia të Spanjës, tërhoqi pjesëmarrjen e mbi 600 atletëve nga 109 vende e rajone të botës. Kësaj here, ekipi kinez i atletikës dërgoi 11 sportistë, të cilët morën pjesë në 4 disiplina për meshkuj dhe 4 për femra. Sigurisht, ndër ta më i shkëlqyeri është Liu Xiang, që fitoi të vetmen medalje të artë për Kinën në vrapimin 60 metra me pengesa me rezultatin 7 sekonda e 46 të qindtat. Kështu, Liu Xiang-u u bë edhe sportist me "titullin e madh", që u shpall kampion përkatësisht në Lojërat Olimpike, në Kampionatin Botëror të Atletikës në fushë të hapur e në Kampionatin Botëror të Atletikës në fushë të mbyllur dhe njëkohësisht është edhe mbajtës i rekordit botëror.

Trajneri i Liu Xiang-ut, Sun Haiping është i mendimit se rezultati i dalluar i Liu Xiang-ut në këtë kampionat erdhi nga stërvitjet dimërore, që u zhvilluan pak kohë më parë në mënyrë të vazhdueshme. Veçanërisht në stërvitjet e forcës, Liu Xiang-u pati përparime të mëdha, duke rezervuar energjinë trupore për këtë kampionat botëror dhe për Lojërat Olimpike të Pekinit.

Me titullin "kampion botëror", Liu Xiangu krijoi një hapje të mrekullueshme në vitin olimpik. Por, nëse rezultati i mirë dhe vlerësimi nga të tjerët do të ushtrojnë presion ndaj Liu Xiang-ut gjatë Lojërave Olimpike? Për këtë, Liu Xiang-u tregohet shumë i qetë:

"Të ndjek natyrën, hap pas hapi, avash avash. U shpalla kampion olimpik, pra nuk e konsideroj aq të rëndësishëm. Do të bëj mirë ç'duhet ta bëj. S'ka nevojë të mendoj më tepër."

Krahas Liu Xiang-ut, edhe disa atletë të tjerë kinezë u paraqitën mirë në këtë kampionat dhe pasqyruan normalisht gjendjen e stërvitjeve dimërore. Li Meiju fitoi medaljen e bronztë në hedhjen e gjyles për femra me rezultatin 19.09 metra. Tjetër vrapues Shi Dongpeng, që mori pjesë së bashku me Liu Xiang-un në vrapimin 60 metrash me pengesa, u radhit në vendin e 9-të në garën pasgrupore. Megjithse ai nuk kishte të drejtë të merrte pjesë në finale, rezultati i tij në këtë kampionat ishte më i miri për të në këtë sezon. Përveç këtyre, Xie Limei u përfshi në 8 vendet e para në kërcim trehapësh për femra dhe Xue Fei arriti rezultatin e saj më të mirë në vrapimin 3000 metrash për femra. Të gjitha këto tregojnë se gjatë procesit përgatitor për Lojërat Olimpike, atletët kinezë po rregullojnë gjendjen e vetë dhe po ngrenë nivelin e tyre sportiv.

Garat pasqyrojnë edhe dobësitë në stërvitje. Trajneri i përgjithshëm i ekipit kinez të atletikës z. Feng Shuyong u shpreh se rezultati i sportistëve kinezë pasqyroi në përgjithsi gjendjen e stërvitjeve dhe ky kampionat i dha ekipit të tij një rast të mirë për zbulimin e problemeve dhe për përmirësim. Feng Shuyong përgjithësoi:

"Në përgjithësi, nuk jemi në nivelin e lartë në fushë të mbyllur. Kemi shumë për të bërë në përmirësimin e konceptit të stërvitjeve atletike."

Në gusht të këtij viti do të hapen Lojërat Olimpike të Pekinit. Trajneri Feng Shuyong është i mendimit se ky kampionat e bëri ekipin kinez të atletikës më të ndërgjegjshëm për pozicionin e vet në qarqet atletike ndërkombëtare dhe kjo, pa dyshim do të jetë në dobi të atletëve kinezë të bëjnë përgatitje më serioze, që të përpiqen për një rezultat të mirë në Lojërat Olimpike.

"Ky kampionat botëror në fushë të mbyllur është gara e fundit e nivelit të lartë para Lojërave Olimpike. Në këtë kampionat u tregua se niveli i përgjithshëm i atletikës së Kinës ndodhet ende në nivelin e mesëm në botë dhe janë të pakta disiplinat e atletëve me epërsi." (Wang Lei)