Ju flet Radio e Jashtme e Kinës! Të dashur dëgjues, unë jam Pina, ju përshëndes përsëri nga Pekini. Në programin e sotëm të këngëve popullore kineze do t'ju paraqit disa këngë popullore të interpretuara nga këngëtarja e njohur kineze Feng Zhilian. Së pari ju ftoj të dëgjoni këngën "Kënga malësore".

Kënga që po ndiqni është një këngë popullore e provincës Sichuan të Kinës jugperëndimore me titull "Kënga malësore". Kjo këngë e freskët dhe e lehtë me fjalë të gjalla dhe të thjeshta, i këndon dashurisë së një vajze. Në këngë thuhet: "Dielli që del si një pikë e kuqe ndriçon malet e larta dhe pyjet e dendura. Lauresha e do lartësinë e qiellit të kaltër, vajza e do djalin duarartë. Rrezet e argjendta të hënës ndriçojnë kasollet e vendlindjes. Lejleku i bardhë e do ujin e Lumit Jance, vajza e do djalin punëtor."

Feng Zhilian është këngëtare e njohur popullore kineze. Ajo ka lindur në verilindje të Kinës dhe në vitin 1983 u pranua në fakultetin e muzikës vokale popullore të Konservatorit të Shenyang-ut. Në vitin 1987 ajo organizoi koncertin e parë recital dhe filloi të punojë në konservator si pedagoge. Feng Zhilian ka zë të ëmbël, shqiptim të qartë dhe ndjenja të përzemërta dhe interpreton si duhet këngët kineze të stileve të ndryshme. Tani le të shijojmë këngën popullore të provincës Shandong të Kinës lindore me titull "Vallja Yangge e shoqëruar me këngë".

Yangge është vallja popullore kineze më përfaqësuese dhe me historinë më të lashtë, është gjithashtu një art kolektiv i veçantë i këngëve dhe valleve popullore që zhvillohet në shesh. Kërcimtarët vallëzojnë me lëvizje të larmishme e të pasura duke ndryshuar vendosjen e tyre sipas ritmeve të daulles, dhe mirëpriten ngrohtësisht nga shikuesit. Kënga "Vallja Yangge e shoqëruar me këngë" këndohet gjatë vallëzimit dhe është e gëzueshme, e zjarrtë dhe me atmosferë jetësore. Në këngë thuhet: "Lulet e pjeshkës janë flakë të kuqe, vajzat e bregut të djathtë të lumit vijnë për të vallëzuar Yangge, djemtë e bregut tjetër të lumit i shoqërojnë me këngë. Në vendlindje ka shumë këngë, lumi Yunhe gurgullon i gëzuar, njerëzit vallëzojnë me të qeshura."

Feng Zhilian nuk u kënaq me sukseset e mëdha të arritura. Në vitin 2000 ajo u pranua në klasën e aspirantëve të Konservatorit të Kinës, ku mësoi me profesoren Zou Wenqin, në të njëjtën kohë ajo mbaroi studimet pasuniversitare në Akademinë e Artit të Kinës, për të studiuar teorinë e muzikës tradicionale kineze. Në fund të vitit 2001, Feng Zhilian organizoi me sukses të plotë dy koncerte recitale në qytetet Pekin dhe Shenyang me titull "Kombësia dhe kënga", ku ajo këndoi shumë këngë klasike. Tani ajo punon si docente në fakultetin e muzikës të Konservatorit Shenyang dhe disa nga studentët e saj kanë dalë shkëlqyeshëm.

Në fund të programit të sotëm ju ftoj të shijoni këngën popullore të provincës Hebei të Kinës veriore me titull "Qëndis fener". Kjo këngë melodike dhe e hollësishme kallëzon 5 histori të vërteta dhe gojëdhëna kineze për dashurinë. Këtë këngë Fen Zhilian e këndon në mënyrë të hollësishme dhe prekëse.

Ju flet Radio e Jashtme e Kinës! Të dashur dëgjues, ndoqët disa këngë popullore kineze të interpretuara nga këngëtarja e njohur Feng Zhilian. Mirudëgjofshim të shtunën tjetër. Në mikrofon për ju, Pina.