Në qytetin Ningbo të provincës Zhegjang të Kinës Lindore, gjendet një shkollë e lartë me emrin "Universiteti Notingham i Ningbos", që është i pari universitet i hapur në bashkëpunim ndërmjet Kinës dhe një vendi të huaj me miratimin e Ministrisë së Arsimit të Kinës. Zv-rektori i këtij universiteti, zoti Roxher Ud, dhe 140 pedagogët e ardhur nga vende të ndryshme të botës po praktikojnë një model arsimi ndërkombëtar dhe dëshmojnë se si përplaset dhe shkrihet koncepti tradicional arsimor kinez me atë perëndimor. Zoti Roxher Ud erdhi në Kinë në shkurt të vitit 2007 nga qyteti Notingham i Anglisë dhe nisi punën e tij si zv-rektor i këtij universiteti.

"S'ka asnjë dyshim se unë kam qejf të punoj në Kinë. Ky është një vend plot me gjallëri, që është i përshtatshëm për ekzistencën e një shkolle të tillë. Këtu mund të gjej shumë raste zhvillimi dhe fryma e kinezëve për të ecur përpara më bën të bashkëpunoj shumë mirë me ta."

Zonja Shy Yafen, administratore nga pala kineze dhe anëtare e Këshillit të Universiteti Notingham të Ningbos, tha se për 1 vit përfunduan punimet e ndërtimit të këtij universiteti, që zë një sipërfaqe toke prej 60 hektarësh, gjë që tregon se bashkëpunimi kino-anglez shkon shumë mbarë. Sigurisht, vazhdoi Zonja Shy, për shkak të ndryshimeve ndërmjet kulturës kineze e asaj perëndimore dhe të ndryshimeve në sistemet arsimore të Kinës dhe të Anglisë, shpesh herë dalin edhe disa divergjenca ndërmjet dy palëve. Megjithatë, të dyja palët mund të kapërcejnë divergjencat dhe të bashkëpunojnë si duhet, sepse kanë të njëjtin drejtim të zhvillimit të arsimit.

"Është e vështirë që kinezët dhe anglezët të mendojnë njësoj. Por të dy palët kanë qëllimin e përbashkët që studentët të duan atdheun e vet, pavarësisht nga shoqëria kapitaliste apo ajo socialiste. Të gjitha vendet edukojnë studentët që të bëhen qytetarë të kualifikuar dhe të respektojnë ligjet e rregullat ligjore. Të gjitha vendet brumosin brezin e ri me mendime të reja krijuese. Ja, në këto çështje mendojmë njësoj. Pala kineze dhe ajo angleze mund të shkojnë me njëra-tjetrën në harmoni në shumë drejtime, sepse kemi unanimitet në drejtimin kryesor të përgatitjes së kuadrove."

Në punët e përditshme mësimdhënëse, edhe zoti Roxher Ud jep mësim. Duke u përpjekur të ndikojë te studentët kinezë me mënyrën angleze të të menduarit, ai ka vënë re disa ndryshime ndërmjet studentëve kinezë dhe atyre anglezë. Ai vlerëson lart studentët e tij kinezë.

"Mua më duket se studentët kinezë janë shumë të drejtë. Ata i shprehin troç mendimet e veta. Në Angli, populli flet me fjalë të martura. Ata nuk thonë drejtpërdrejt se 'Dëshira ime më e madhe është filan', 'Unë shqetësohem shumë për diçka', 'Unë kam ndonjë ambicie' e të tjera. Kurse studentët kinezë janë ndryshe. Kur kanë ndonjë ambicie, ata mund ta thonë drejtpërdrejt dhe pa asnjë druajtje. Mua më pëlqen kjo mënyrë shprehjeje, sepse nga fjalët e tyre e kam shumë të lehtë të marr vesh se çfarë duan ata. Studentë kinezë mësojnë me shumë zell dhe i përvetësojnë gjërat shumë shpejt."

Në Universitetin Notingham të Ningbos, studiojnë edhe shumë studentë nga vende të tjera. Një nga ata është edhe djaloshi i pashëm holandez Tim Herzi, i cili ka 14 muaj që studion në Kinë. Para se të vinte në Ningbo, ai mësoi gjuhën kineze në Çangçun të Kinës Verilindore. Ai foli rrjedhshëm në gjuhën kineze për jetën në këtë universitet.

"Mua më quajnë Tim. Kam ardhur në Ningbo për të studiuar tregti dhe ekonomi ndërkombëtare, që është specialiteti im. Këtu jetoj shumë mirë, sepse kinezët janë miqësorë. Shumë prej tyre duan të miqësohen me mua, prandaj kam shumë miq në Kinë. Unë fle në konvikt, që është i rehatshëm dhe me qira të ulët. Kam qejf të dal në rrugë për të ngrënë në restorante plot me klientë, ku marr makarona të fërguara ose pite, që janë të lira dhe të shijshme."

Zv-rektori Roxher Ud shpreson se do t'u japë studentëve kinezë dhe të huaj më shumë raste kontaktesh me botën. Ai po bën përpjekje që sa më shumë studentë të huaj të vijnë për studime në universitetin e tij dhe që studentët kinezë të kenë më shumë raste për studime në Universitetin Notingham të Anglisë ose në shkolla të vendeve të tjera.

Universiteti Notingham i Ningbos ka tani 2800 studentë dhe, siç parashikohet, në shtator të vitit 2008 ky numër do të arrijë në 4000. Ndër ta, studentët e huaj do të përbëjnë një të katërtën. Zoti Rexher Ud shpreson se, këtej e tutje, më shumë studentë të huaj do të vijnë për të marrë arsimin origjinal anglez në truallin kinez dhe për të dhënë kontribut në arsimin e ndërkombëtarizuar kino-perëndimor. (Zheng)