Në rubrikën "Kultura tradicionale kineze" do të flasim për taktikën "Vrasja e njeriut me thikën e marrë hua", që është taktika e tretë nga libri "Tridhjetë e gjashtë skemat strategjike dhe taktike", një libër klasik kinez për artin ushtarak.

Taktika "Vrasja e njeriut me thikën e marrë hua", që do të thotë goditja dhe shfarosja e kundërshtarit duke shfrytëzuar forcat e palës së tretë, u përdor shumë shpesh në luftërat ushtarake dhe politike të Kinës së lashtë.

Në vitet e fundit të dinastisë Zhou Perëndimore (nga shekulli i 11-të para erës sonë deri në shekullin e 8-të para erës sonë), Zheng Huan Gong, monarku i shtetit Zheng, vendosi të zhdukte shtetin Kuai. Në radhë të parë, ai bëri një listë të ministrave dhe gjeneralëve më të talentuar të shtetit Kuai dhe deklaroi hapur se, pas shkatërrimit të Kuait, ai do t'u jepte këtyre personave poste dhe tituj të lartë feudalë dhe do t'u shpërndante atyre tokën e Kuait. Për të propaganduar publikisht vendimin e tij, ai organizoi në qytet aktivitete betimi. Monarku i shtetit Kuai u indinjua, pasi e mori vesh, dhe i vrau si tradhtarë të gjithë ministrat dhe gjeneralët e shkruar në atë listë. Kështu, shteti Zheng e shkatërroi lehtë shtetin Kuai.

Një shembull tipik i zbatimit në luftën politike të taktikës "Vrasja e njeriut me thikën e marrë hua" ka qenë tregimi i vërtetë në historinë kineze "Vrasja e tre trimave me anë të dy pjeshkave". Në shekullin e 6-të para erës sonë, shteti Çi kishte 3 trima që quheshin Gongsun Gjie, Tian Kai Gjang dhe Gu Yezi. Meqë u treguan jashtëzakonisht të guximshëm në betejën e luftës, monarku i Çiut i donte shumë. Mirëpo të tre trimat ishin mendjemëdhenj dhe secili e quante veten hero të pashoq. Yan Ying, politikani i madh dhe kryeministri i shtetit Çi, shqetësohej dhe kishte frikë se mos këta trima, me veprimet e tyre trashanike, mund të krijonin telashe që do të rrezikonin sigurinë e Çiut, prandaj deshi t'i asgjësonte. Një ditë, me propozimin e tij, Çi Jing Gong, monarku i shtetit Çi, u dhuroi tre trimave dy pjeshka, që t'i ndanin sipas meritave. Secili prej këtyre trimave të pamend thoshte se ai kishte më shumë merita dhe për këtë filluan të grindeshin dhe, më tej, të vrisnin njëri tjetrin. Kështu, Yan Ying e arriti lehtë qëllimin e tij.

Taktika "Vrasja e njeriut me thikën e marrë hua" duket barbare dhe djallëzore, prandaj zbatimi i saj kufizohej në luftën ushtarake. Në rrethana të tjera, nëse dikush e përdorte për t'ia arritur qëllimit vetjak, kjo mund të konsiderohej si intrigë e ulët e një njeriu të poshtër.

Në shoqërinë moderne, dikush ka krijuar një shpjegim të ri të taktikës "Vrasja e njeriut me thikën e marrë hua". Në këtë shpjegim, theksi u vihet fjalëve "marr hua". Kjo do të thotë se, për të arritur qëllimin në tregti ose në luftën politike, çdokush mund të "marrë hua" forcat e të tjerëve dhe qëllimi i tij nuk duhet të jetë "vrasja e njeriut", por konkurrenca. Ai mund të "marrë hua" shumë gjëra, si fonde, kuadro, teknologji etj. Një sipërmarrës mund të ketë sferë të gjerë manovrimi gjatë konkurrencës së ashpër në ekonominë e tregut, mjafton të përvetësojë kuintesencën e taktikës "Vrasja e njeriut me thikën e marrë hua". (Zheng)