dëgjoni

Zonat në periferi të qytetit Zhongsiang të provincës Hubei të Kinës Qendrore janë zona me tokë pjellore dhe me produkte të bollshme. Që nga lashtësia e deri tani, fshatarët e këtyre zonave janë të kënaqur me jetën e tyre, siç thonë ata, "dal në ara në të gdhirë, filloj pushimin në të ngrysur". Kurse vitet e fundit, ka ndodhur një ndryshim i paparashikuar. Gjithnjë e më shumë fshatarë të këtushëm dalin jashtë vendit dhe shkojnë në Japoni për të mësuar agroteknikën dhe përvojën e përparuar. Kur kthehen, ata hapin sfera të reja të zhvillimit të bujqësisë. I pari nga fshatarët e Hubeit që ka qenë për specializim në Japoni, është He Jiaguo.

"Në fillim, unë u habita shumë, kur mora vesh se shteti ynë ka filluar të dërgojë edhe fshatarë për specializim në vende të tjera. Asnjëherë nuk më shkonte ndër mend se edhe mua do të më jepej rasti për të dalë jashtë vendit."

He Jiaguo shkoi në Japoni në vitin 1998 për të mësuar agroteknikën e kultivimit të pjeprit dhe luleshtrydhes në distriktin Ibaraki-ken. Gjatë 1 viti që mësoi dhe jetoi në Japoni, ai jo vetëm përvetësoi agroteknikën përkatëse, por edhe njohu shkallën e zhvillimit të bujqësisë moderne në Japoni dhe rolin e madh që luan Lidhja Japoneze e Bashkëpunimit Bujqësor në prodhimin bujqësor, në shtimin e të ardhurave dhe në pakësimin e shpenzimeve.

Detyra e kësaj organizate është që t'u ofrojë fshatarëve shërbim në fushën e mjeteve të prodhimit, financave, sigurimit shoqëror dhe të administrimit, kurse fshatarët duhet kanë vetëm të punojnë me zell në ara. Përvoja e Japonisë në prodhimin bujqësor e ndihmoi He Jiagjuon të mendojë nëse kjo praktikë është e zbatueshme edhe në vendlindjen e tij.

"Në saje të specializimit para 10 vjetëve në Japoni, gjeta rrugën e përmirësimit sa më shpejt të kushteve tona ekonomike. Aq më tepër, specializimi në Japoni na dha rastin të njohim parimin e përparuar e modelin shkencor të Japonisë në administrimin e bujqësisë dhe na ndihmoi të gjejmë një rrugë të administrimit e zhvillimit të bujqësisë, një rrugë pasurimi që është e përshtatshme për kushtet tona konkrete."

Gjatë specializimit në Japoni në vitin 2005, Zhang Guang Ming, bashkëfshatar i He Jiaguos, ndjeu se gjithçka aty ishte interesante. Ai tha se sidomos niveli i lartë i agroteknikës dhe mekanizimit të bujqësisë në Japoni i la atij përshtypje të thella.

"Ndërtimi i fshatit të ri socialist na kërkon të bëhemi fshatarë të tipit të ri, të kualifikuar me teknikë. Specializimi për 1 vit në Japoni më dha rastin të përvetësoj agroteknikën dhe modelin e përparuar bujqësor të Japonisë. Pasi u ktheva, duke kombinuar agroteknikën e përparuar japoneze me agroteknikën tonë tradicionale, kam thyer me guxim shabllonin e vjetër dhe kam ngritur treguesin e mbjelljes së tokave me dy korrje në vit. Kam mbjellë 0.5 hektar tokë me pambuk e shalqi, 0.2 hektar tokë me oriz e lakër vaji dhe 0.3 hektar tokë me oriz e grurë. Kështu, në vitin 2007 të ardhurat e familjes sime u shtuan 3 herë. Pas eksperimentimeve, unë do ta përhap përvojën time në të gjitha fshatrat në periferi të qytetit Zhongsiang, me qëllim që më shumë fshatarë të tjerë të bëhen fshatarë të tipit të ri të kualifikuar me teknikë, ashtu si unë."

Para se të shkojnë për specializim në Japoni, fshatarët e këtyre zonave mësojnë në radhë të parë gjuhën japoneze në një kurs afatshkurtër tremujor. Në bazën e kualifikimit pranë Lidhjes Kineze të Bashkëpunimit Bujqësor "Shekulli i Ri", korrespondenti ynë takoi disa kursiste, që do të shkojnë në Japoni për të mësuar kryesisht teknikën e mbajtjes së lopëve. Njëra prej tyre, Vang Ping tha se më parë ishte e papërfytyrueshme që gratë dhe vajzat fshatare, siç është ajo, të dilnin jashtë vendit. Kurse tani kjo gjë është bërë realitet dhe ajo do të dalë jashtë vendit për të parë botën e jashtme dhe për të zgjeruar horizontin.

Zoti Zhao Zhivu, përgjegjësi i kësaj baze, tha se këto kursiste janë të reja të shquara fshatare, të zgjedhura në mënyrë të përsëritur. Deri tani, zonat e tyre kanë dërguar për specializim në Japoni gjithsej 79 grupeve me 1100 veta, që janë specializuar në fusha të ndryshme të bujqësisë, si ato të kultivimit të perimeve, të mbjelljes së bostaneve e pemëve, të mbajtjes së kafshëve shtëpiake etj. Për këtë foli zoti Tian Venbiao, kryetari i bashkisë së qytetit Zhongsiang.

"Me anë të specializimit në Japoni, fshatarët tanë kanë shtuar të ardhurat. Por më e rëndësishmja është se ata kanë përvetësuar agroteknikën dhe përvojën e përparuar, duke ndihmuar shtimin e lidhjeve ekonomike e kulturore midis dy vendeve, gjë që është e dobishme për të dy palët"(Zheng)