Ju flet radio e Jashtme e Kinës. Të dashur dëgjues, në rubrikën "Kultura tradicionale kineze" do të flasim për taktikën "Grabitja në mes të zjarrit", që është taktika e 5-të nga libri "Tridhjetë e gjashtë skemat strategjike dhe taktike", një libër klasik kinez për artin ushtarak.

Kuptimi origjinal i shprehjes "grabitja në mes të zjarrit" është grabitja e pasurisë së dikujt duke përfituar nga rasti i fatkeqësisë së zjarrit në shtëpinë e tij, gjë që është kuptim i keq. Por në fushën ushtarake, me këtë shprehje emërtohet taktika për rritjen e avantazhit mbi kundërshtarin duke përfituar nga rasti i rrëmujave të brendshme të vendit të tij. Strategu kinez i lashtësisë, Sun Ci, thoshte që "Të fitosh në mes të rrëmujave". Rrëmuja do të thotë krizën e brendshme ose kërcënimin nga jashtë dhe ajo përfshin telashet në fushën politike, ekonomike, shoqërore dhe të fatkeqësive natyrore. Çdo vend, sado i fuqishëm që të jetë, i krijon kundërshtarit rastin e volitshëm, në qoftë se humbet paqen dhe rendin e brendshëm,

Në shekullin e 5-të para erës sonë, që ishte një periudhë e rivalitetit të principatave dhe shteteve vasale të dinastisë Zhou për të vendosur hegjemoni, shtetet Vu dhe Yue, dy shtete fqinjë në Kinën Juglindore, kishin fuqi të përafërt dhe secila prej tyre përpiqej të aneksonte tjetrin, prandaj luftërat midis tyre vazhdonin vite me radhë. Një herë, shteti Yue u mund dhe mbreti i tij, Gou Jian, u mbajt në shtetin Vu si rob që t'i shërbente mbretit të Vusë, Fu Çait. Gou Jiani duronte çdo fyerje, hante thjeshtë, flinte pranë stallës së kuajve, bënte punë të rëndë, i shërbente me kujdes mbretit Fu Çai, duke e quajtur veten "ministri i përkulur" para tij. Sado rëndë që ta fyente Fu Çai, ai tregohej shumë i bindur, prandaj u besua gradualisht nga Fu Çai dhe, pas 3 vjetëve, u lirua dhe u kthye në vendin e tij. Edhe pas kthimit, ai vazhdoi të tregohej i bindur dhe filloi t'i dërgonte në kohë shtetit Vu materiale si kontribut, i dhuroi vajza të bukura, margaritarë e xhevahirë, mjeshtër të shquar dhe sende të çmueshme. Kështu, Fu Çai humbi vigjilencën ndaj shtetit Yue, i cili po merrte një sërë masash për fuqizimin e vendit dhe për shtimin e armatimeve. Gou Jiani i dha ryshfet kryeministrit të shtetit Vu që, duke shfrytëzuar ambicjen e Fu Çait, ta ndërsente të rivalizonte me shtetet e tjera për të vendosur hegjemoni. Si rrjedhim, potenciali i shtetit Vu u harxhua për luftë. Aq më tepër, mbreti Fu Çai, pa përfillur propozimet dhe vërejtjet e ministrave të tij, harxhoi mjaft për ndërtimin e pallateve të tij. Kështu, fuqia financiare e shtetit Vu u shter plotësisht. Në vitin 473 para erës sonë, në shtetin Vu ndodhi një fatkeqësi e rëndë e thatësirës, gjë që shkaktoi rrëmujë të madhe. Gou Jiani, mbreti i shetit Yue, e priti më në fund rastin për hakmarrje dhe filloi luftën në përpjesëtime të mëdha kundër shtetit Vu. Ndërsa shteti Vu nuk kishte aspak fuqi për kundërsulm dhe humbi shpejt luftën. Kështu, mbreti Fu Çai u vetëvra dhe shteti i tij u aneksua nga shteti Yue.

Veprimi i Go Jianit, që filloi luftën në kohën e volitshme dhe fitoi lehtë mbi armikun duke përfituar nga rasti i rrëmujave të vendit të tij, mishëroi më së miri taktikën "grabitja në mes të zjarrit". Kjo taktikë u zbatua gjerësisht edhe në luftërat e kohës moderne. (Zheng)