Në kuadrin e Festës së Pranverës, festës tradicionale më madhështore në Kinë, sipas zakonit tradicional kinez, ju shpreh juve, të dashur dëgjues, gëzuar Vitin e Ri, ju uroj shëndet dhe mbarësi.

Melodia "Gëzimi i madh" që po ndiqni, po ju çon në një atmosferë të gëzueshme dhe të lumtur të kremtimit të Festës së Pranverës nga populli kinez. Festa e Pranverës është viti i ri sipas kalendarit bujqësor kinez dhe festa më e rëndësishme dhe më madhështore e vitit. Këtë festë populli kinez e kremton me solemnitet të madh, ashtu si perëndimorët që festojnë Krishtlindjet. Melodia me titull "Presim pranverën dhe lumturinë" që do të dëgjojmë më poshtë, mishëron më së miri gëzimin e kinezëve në pritje të vitit të ri.

Po vjen Festa e Pranverës, njerëzit janë shumë të gëzuar, duke pritur një vit të ri me korrje të bollshme.

Në ditët e Festës së Pranverës, sipas zakonit tradicional, në portat, dyert dhe muret e të gjitha shtëpiveve ngjitet hieroglifi "Fu" që simbolizon lumturinë e fatmirësinë. Si në të kaluarën ashtu edhe sot hieroglifi "Fu" ka shprehur e shpreh dëshirat e njerëzve për jetën e lumtur dhe urimet e tyre për të ardhmen e bukur. Për të shprehur si duhet këto dëshira e urime, disa njerëz e vizatojnë hieroglifin "Fu" në figurat e të moshuarit jetëgjatë, pjeshkës jetëgjatë dhe të korrjeve të bollshme, madje e ngjitin këtë hieroglif kokëposhtë, për të treguar ardhjen e lumturisë.

Të dashur dëgjues, melodia që po ndiqni titullohet "Ka ardhur lumturia", e cila shpreh pikërisht dëshirën e njerëzve për ardhjen e fatmirësisë dhe tregon njëkohësisht edhe shijet jetësore të kinezëve në ditë feste.

Gjatë festës, njerëzit i thonë gjithmonë njëri-tjetrit "Qofshi fatbardhë". Tani ju ftoj të shijoni melodinë me titull "Qofshi fatbardhë", në mënyrë që kjo melodi e bukur dhe e hareshme t'ju çojë urimet tona, ju urojmë fat dhe mbarësi gjatë vitit të ri.

Preludi i melodisë shpall me tingujt e gongeve dhe daulleve ardhjen e vitit të ri, vegla muzikore suona ekzekuton melodinë kryesore të bukur e të gëzueshme, ndërsa veglat muzikore me tela lëshojnë tingujt e këndshëm, si urimet që i shprehin njëri-tjetrit. Në fund, ekzekutimi i gjithë orkestrës i çon në kulm ndjenjat e gëzueshme festive.

Në fund të programit të sotëm ju ftoj të dëgjoni melodinë popullore me titull "Ditët e hareshme". Kjo melodi ka qenë një melodi e shkurtër e përhapur gjerësisht në zonat veriore të Kinës. Preludi i fuqishëm tregon temën e gëzueshme të kësaj pjese, pastaj vjen melodia e shkathët dhe e lehtë, në fund gonget e daullet i shtojnë pjesës atmosferën e hareshme, duke përshkruar me gjallëri gëzimin e njerëzve në ditët e festës. ( Pina)