dëgjoni

Emisionet e Radios së Jashtme të Kinës në gjuhën shqipe kanë kaluar një rrugë 39-vjeçare dhe gjatë këtyre dhjetëra vjetëve, redaksia e emisioneve të gjuhës shqipe të RJK ka pasur ndryshime të mëdha. Sidomos vitet e fundit, veteranët e redaksisë dolën që të gjithë në pension dhe emisionet e kësaj radioje po i vazhdon brezi i ri i redaksisë së gjuhës shqipe.

Pas disa vjet zhvillimi, emisionet e gjuhës shqipe jo vetëm transmetohen në radio me valë të shkurtra e me vale të mesme, por transmetohen edhe me figurë e zë edhe nëpërmjet internetit për shqiptarët e Shqipërisë, Kosovës, Maqedonisë, Malit të Zi dhe për emigrantët shqiptarë të mbarë botës.

Përveç emisioneve, në kuadrin e 35-vjetorit të fillimit të emisioneve të gjuhës shqipe të RJK-së, redaksia nxori edhe numrin e parë të gazetës së saj në gjuhën shqipe "Dritare".

Një nga lexuesit e parë shqiptarë të gazetës "Dritare" është edhe regjisori i njohur shqiptar Piro Milkani. Ai ka mësuar nga numri i parë i gazetës "Dritare" shumë gjëra. Sidomos artikujt lidhur me filmat shqiptarë "Bisedë rreth filmave të vjetër artistikë" dhe "Filmat artistikë shqiptarë në sytë e personave të njohur kinezë" etj. i lanë përshtypje shumë të thella.

Pas vizitës në Kinë, në artikullin e shkruar nga ky regjisor i njohur shqiptar thuhet: "Një ndër propagandistët më të mëdhenj të filmit shqiptar është prezantuesi më popullor i televizionit kinez Cui Jong Juan (po kaq i njohur sa Ardit Gjebrea apo Adi Krasta për ne). Ai është koleksionisti më i madh i katalogëve të filmave nga e gjithë bota. Deri tani me tre mijë broshurat e katalogëve të tij ai radhitet në vend të parë.

Sot në Kinë kanë dalë në modë librat autobiografikë të personaliteteve të shquara nga fusha të ndryshme të jetës. Libri i ri i Cui Jong Juanit titullohet 'Jeta ime' dhe në të shumë vend zënë kujtimet për filmat shqiptarë. Deri më sot janë shitur një milion e dyzet mijë kopje. Ai është dhe iniciator i botimit të një albumi me muzikën e filmave më të mirë nga e gjithë bota. Albumi titullohet 'Ngadhënjim mbi vdekjen' dhe kënga e parë është ajo e të madhit Feim Ibrahimi në filmin që mban vetë titullin e albumit.

Edhe pse regjisori dhe aktori i madh kinez Gjan Ven është bërë një emër prestigjioz me çmimet e ndryshme ndërkombëtare, nuk ngurron të pohojë se në rininë e tij ai është ndikuar nga fryma e thellë realiste e filmave shqiptare. "

Gjatë 4 vjetëve të botimit të gazetës "Dritare", kanë dalë 15 numra të saj dhe në këta numra janë botuar aktivitete partiake dhe ndërtimore të Kinës, vizitat e miqve shqiptarë në Kinë dhe të miqve kinezë në Shqipëri, shkëmbimet kulturore dhe intervistat me kineastët veteranë shqiptarë, me sopranon e njohur shqiptare Inva Mula, me këngëtaren shumë të mirëpritur shqiptare Elsa Lila etj., si dhe njoftime të fushave të ndryshme nga Kina.

Këta numra të gazetës janë pritur mirë jo vetëm nga lexuesit shqiptarë në Shqipëri, por edhe nga emigrantët shqiptarë në vende të ndryshme të botës.

Aktorja veterane Eglatina Kume, që jeton tani si emigrante shqiptare në Greqi, na shkroi në e-mail se asaj i kanë pëlqyer shumë këto gazeta dhe ua ka shpërndarë miqve shqiptarë në Greqi. Edhe kryeredaktori i gazetës "Albania Press" ka treguar një interesim të madh për përmbajtjet e kësaj gazete, duke botuar në gazetën e tij edhe artikullin e numrit të fundit të gazetës "Dritare": "Jehona e disa filmave të vjetër shqiptarë në Kinë".

Duke filluar nga viti 2008, vit i organizimit të Lojërave Olimpike të Pekinit, redaksia e gjuhës shqipe e Radios së Jashtme të Kinës e shndërroi gazetën " Dritare" në revistë, ku do të botohen më shumë tekste me përmbajtje të pasura dhe më shumë fotografi të bukura.

Në numrin e parë të kësaj reviste janë botuar fjala e urimit e kryetarit të shtetit të Kinës Hu Jintao mbajtur me rastin e vitit të ri 2008, me titull: "Le të nxisim bashkërisht çështjen e lartë të paqes dhe të zhvillimit të njerëzimit", si dhe fjala e drejtorit të Radios së Jashtme të Kinës po me këtë rast.

4 artikuj të Konkursit global të njohurive për Lojërat Olimpike të Pekinit janë përmbajtja kryesore e këtij numri. Pas leximit të këtyre artikujve, lexuesit mund të japin përgjigje drejtpërdrejt në faqen 6 e 7 të kësaj reviste dhe t'i dërgojnë këto faqe drejtpërdrejt në adresën "Albania Section CRI-30 (China Radio International) Beijing, China (Kinë) 100040", ose t'ia dërgojnë këto përgjigje redaksisë së gjuhës shqipe të Radios së Jashtme të Kinës me postë elektronike në adresën: Albanian@chinabroadcast.cn.

Përveç këtyre, në këtë numër të revistës paraqiten edhe anëtarët e tanishëm të redaksisë së gjuhës shqipe dhe rubrikat përkatëse që drejtojnë ata. Këto rubrika kanë të bëjnë me aspekte të tilla të jetës në Kinë, si reforma dhe hapja e vendit, ndërtimi, artet dhe kultura, muzika, jeta shoqërore, sporti, arritjet në fushën e shkencës dhe të teknikës, pakicat kombëtare e shumë të tjera. (Zhai)