dëgjoni

Në Kinë, Zheng Yuanjie është shkrimtari shumë i famshëm përrallash. Para 20 vjetëve, përralla e tij "Shuke dhe Beita" krijoi dy figura të hijshme të minjve Shuke dhe Beita. Këto dy figura mirëpriten ende edhe sot nga fëmijët kinezë.

53-vjeçari Zheng Yuanjie filloi të shkruajë përralla në fund të viteve '70 të shekullit të kaluar. Deri sot, sasia e fjalëve të përrallave të tij i ka kaluar 10 milionët. Në vitin 1985, Zheng Yuanjie krijoi revistën mujore "Mbreti i përrallave" ku botohen vetëm veprat e tij. Gjatë 23 vjetëve, revista "Mbreti i përrallave" është shitur shumë mirë, sasia e botimeve i ka kaluar 100 milionët duke shënuar një mrekulli në historinë e botimeve botërore. Zheng Yuanjie u shpreh se suksesi i tij lidhet ngushtë me edukimin familijar:

"Nëna ime është një njeri me veçori të jashtëzakonshme. Kur isha i vogël, ajo më kërkonte shpesh të bëja gjëra të jashtëzakonshme. Edukimi i nënës ka ndikuar thellë në jetën dhe në krijimtarinë time letrare. Për shembull krijova një revistë ku botohen vetëm veprat e mia, kjo është një gjë e jashtëzakonshme."

Zheng Yuanjie lindi në një familje oficerësh në provincën Hebei, më vonë familja e tij u shpërngul në Pekin. Zheng Yuanjie mori vetëm arsimin fillor. Pasi u rrit, ai kreu shërbimin ushtarak në forcat ajrore për 5 vjet. Pas largimit nga ushtria, Zheng Yuanjie u bë punëtor në një fabrikë, gjatë kësaj periudhe, ai filloi të krijojë vepra letrare.

Në fund të viteve '70 të shekullit të kaluar, në Kinë filloi të zbatohet politika e reformës dhe e hapjes me botën e jashtme, edhe letërsia e arti filluan të hyjnë në periudhën e lulëzimit. Shumë të rinj kinezë u morën me krijimtari letrare, Zheng Yuanjie ishte një prej tyre. Pas provës në krijimtarinë e formave të ndryshme letrare, Zheng Yuanjie vendosi më në fund të shkruajë vetëm përralla:

"Jam i mendimit se kam talent në fushën e përrallave. Kam imagjinatë krijuese, shkrimi i përrallave nuk është një gjë e vështirë për mua. Veprat e mia kanë fituar çmime të panumërta duke forcuar vetëbesimin tim për këtë çështje."

Ndër veprat e Zheng Yuanjies, "Tregimet e Pipilu-t", "Tregimet e Lusisi-së" dhe "Shuke dhe Beita" janë më të famshmet. Pipilu dhe Lusisi janë vëlla e motër binjakë, kurse minjtë Shuke dhe Beita janë miqtë më të ngushtë të tyre. Shuke dhe Beita mund të flasin në gjuhën njerëzore dhe duan t'i ndihmojnë njerëzit në vështirësi.

Qysh nga viti 1982, Zheng Yuanjie shkroi tregimet e Shukes dhe të Beitas për 13 vjet me radhë. Gjatë këtyre 13 vjetëve, këta dy minj u rritën së bashku me zhvillimin e kohës duke regjistruar ndryshimet e mëdha të shoqërisë kineze.

Temat e përrallave të Zheng Yuanjies vijnë zakonisht nga jeta. Duke folur për shkakun e ruajtjes së imagjinatës së fuqishme në krijimin e përrallave për dhjetëra vjet me radhë, Zheng Yuanjie tha:

"Kam një zemër fëmije dhe kam kureshtje për gjithçka. Mund të gjej shumë ide nga kureshtja."

Zheng Yuanjie u shpreh se interesi është mësuesi më i mirë, suksesi nuk mund të ndahet nga imagjinata. Për sa i përket edukimit të djalit, Zheng Yuanjie ka mënyra të veçanta, ai i jep djalit hapësirë të lirë për të shfaqur plotësisht talentet e tij. Sot, djali i tij Zheng Yaqi i rritur krijoi "Kursin e Pipilu-t" për t'i përgatitur fëmijët për të shkruar. Zheng Yuanjie është mësuesi i përhershëm i kursit. Pas krijimit, kursi ka tërhequr shumë fëmijë.

Sivjet është viti i miut sipas kalendarit bujqësor të Kinës, Zheng Yuanjie u shpreh se ai planifikon të vazhdojë shkrimin e tregimeve të dy minjve Shuke dhe Beita:

"Me rastin e vitit të miut, do të vazhdoj të shkruaj tregimet e Shukes dhe të Beitas. Në përrallën e re, Shuke dhe Beita do të ndihmojnë një djalë dhe të atin e tij të zhdukin keqkuptimet midis tyre." (Fani)