Ju flet Radio e Jashtme e Kinës, të dashur dëgjues, mirë se vini prapë në minirubrikën "Tregime Olimpike", unë jam treguesi i saj Jiang Lei. Në programin e javës së kaluar ndoqët historinë më të lumtur të krijuar nga çifti çekosllovak Zatopek, të cilët u ngjitën në podiumin olimpik në të njëjtën ditë në Olimpiadën e Helsinkit. Këtë herë kemi përgatitur një material për një legjendë tjetër në historinë olimpike. Tashmë, le të shkojmë bashkë në Hungari.

Karoly Takaçisi është jo vetëm një hungarez i fortë me ngjyrë legjendare, por edhe një kampion olimpik i pabesueshëm në qitje në historinë e lojërave olimpike.

Takaçisi lindi në vitin 1919 në kryeqytetin e Hungarisë, Budapest. Në vitet 30 të shekullit të 20-të, Takaçisi u bë i njohur në qarket e qitjes. Në vitin 1938, ai u bë një oficer ushtarak në ushtrinë hungareze dhe ishte një anëtar i rëndësishëm në qitjen me pistoletë në ekipin hungarez të qitjes. Por në atë vit, atij i ra fatkeqësi. Në një stërvitje ushtarake, dora e tij që mbante pistoletën--ajo e djathtë, u thye fare nga shpërthimi i një granate dhe njerëzit menduan që karriera e tij në qitje me siguri do të përfundonte. Pas një muaj mjekimi në spital, Takaçisi nuk hoqi dorë nga karriera e tij në qitje dhe rimori pistoletën me dorën e majtë. Përpjekjet dhe këmbëngulja e tij i sollën sukses në vitin e mëpasshëm, kur fitoi titullin kampion në kampionatin kombëtar të qitjes në Hungari me dorën e majtë. Më pas, ai u rikthye në kombëtaren hungareze dhe fitoi për atdheun e tij titullin kampion në qitjen me pistoletë automatike në kampionatin botëror.

Për shkak që Olimpiada e vitit 1940 dhe ajo e vitit 1944 u anuluan gjatë Luftës së Dytë Botërore, Takaçisi nuk gjeti shanse në lojërat olimpike, por ky qitës i pagabueshëm mëngjarash nuk hoqi dorë nga ëndrra e tij olimpike. Në vitin 1948 kur ishte 38 vjeç, si anëtar i delegacionit olimpik të Hungarisë, Takaçisi u duk në fushën e qitjes në Olimpiadën e Londrës. Argjentinasi Karlos Enrique Valiente që vendosi rekordin botëror në qitjen e shpejtë me pistoletë, e pyeti pse erdhi në Londër në këtë moshë, Takaçisi iu përgjigj: "Erdha për të mësuar diçka."

Por në finalen e qitjes së shpejtë me pistoletë në Olimpiadën e Londrës, ky burrë që erdhi për mësim e mposhti argjentinasin. Megjithëse nuk theu rekordin botëror, hungarezi mori titullin kampion olimpik që kishte ëndërruar për një kohë të gjatë. Në ceremoninë e dhënies së çmimeve pas finales, Valienti që u radhit në vendin e dytë i thotë duke qeshur: "Ti ke mësuar mjaft gjëra."

Katër vjet më pas, në Olimpiadën e Helsinkit, Takaçisi ruajti me sukses titullin kampion, duke u bërë kështu qitësi i parë që fitoi titullin kampion në qitjen e shpejtë me pistoletë dy herë radhazi. Shpirti i tij që nuk tërhiqet kurrë dhe kurajo e tij që sfidon vetveten u ka lënë lojërave olimpike një histori të bukur të përhershme.

Ju flet Radio e Jashtme e Kinës, të dashur dëgjues, në programin e sotëm, ju treguam për një legjendar hungarez që fitoi dy herë titullin kampion olimpik pasi humbi dorën e djathtë, Karoly Takaçis. Herën tjetër do të vazhdojmë minirubrikën tonë "Tregime Olimpike" me një material interesant për Olimpiadën e 16-të në Melburn. Ju falënderoj për shoqërinë, mirupafshim. (Jiang Lei)