dëgjoni

Kërcimi hip-hop vjen nga kërcimi pop i të rinjve zezakë të SHBA-së i lindur në vitet '80 të shekullit të 20-të. Për shkak se ky kërcim bëhet zakonisht në rrugë dhe ka karakteristika të pjesëmarrjes së gjerë dhe të konkurrimit, ai ka fituar përshëndetjen e të rinjve të mbarë botës dhe është bërë pjesë e rëndësishme e kulturës hip-hop. Sot do t'ju njohim me një kërcimtar kinez të hip-hopit Xiao Chuanin. Emri i vërtetë i tij është Ruan Yongzhou, ai quhet "djali hip-hop i Kinës" dhe është mjeshtri dhe kërcimtari më i famshëm i hip-hopit në Kinë.

Në shumë konkurse të kërcimit hip-hop Xiao Chuan merr pjesë si anëtar i jurisë dhe nganjëherë ai interpreton. Xiao Chuan u shpreh se kërcimi hip-hop është shumë i lirë dhe ka magji të veçantë:

"Kërcimi hip-hop është pjesë e jetës sime, çdo ditë unë kërcej. Më pëlqen shumë ky kërcim. Megjithëse kërcej prej mbi 10 vjetësh, jam i mendimit se kërcimi hip-hop është një art i ndërlikuar dhe duhet të mësoj më tej."

Në vitin 1980, prindërit e dërguan Xiao Chuanin në SHBA për studime. Atë vit, Xiao Chuan ishte vetëm 5 vjeç. Si një nxënës i vogël, ai hasi shumë vështirësi në jetesë dhe në mësim. Por kjo praktikë përgatiti aftësinë e Xiao Chuanit për kapërcimin e vështirësive. Pas mbarimit të shkollës fillore, Xiao Chuan u kthye në atdhe për të ndjekur shkollën e mesme. Atë kohë Xiao Chuan e donte shumë futbollin dhe ëndërronte të bëhej yll futbolli. Por për fat të keq, në një stërvitje futbolli, ai u plagos rëndë dhe u thye ëndrra e tij për t'u bërë yll futbolli. Xiao Chuani u shpreh:

"Plagosja e rëndë vrau ëndrrën time të futbollit, por mendoj se kjo nuk ishte një gjë shumë e keqe për mua sepse nëse do të merresha me futboll sot, nuk do të kishte kërcimtar Xiao Chuan."

Në fund të viteve '80 të shekullit të kaluar, të rinjtë e fëmijët kinezë u magjepsën shumë nga filmi amerikan "Kërcim ritmik gjimnastikor" (Break dance). Ky kërcim e tërhoqi shumë Xiao Chunin. Më vonë, regjisori kinez Tian Zhuangzhuang xhiroi filmin "Të rinjtë rok" që përshkruan jetën e kërcimtarëve të hip-hopit. Ky film ngjalli jehonë të madhe në mbarë vendin. Qysh nga ajo kohë, Xiao Chuani filloi të merret me kërcimin hip-hop. Xiao Chuani tha:

"E përvetësova kërcimin hip-hop shumë shpejt sepse para kësaj kisha mësuar vallen popullore kineze dhe baletin. Jam i mendimit se midis llojeve të ndryshme të kërcimit ka lidhje të ngushta."

Në vitin 2003, me ftesën e Televizionit Qendror të Kinës, Xiao Chuani krijoi një program për mësimin e kërcimit hip-hop. Atë kohë në Kinë, kërcimi hip-hop ishte modë ndër të rinjtë. Në vitin 2005, Xiao Chuan u bë koreografi i valleve i mbrëmjes artistike të Festës së Pranverës të Televizionit Qendror. Në këtë mbrëmje, Xiao Chuan hartoi 8 pjesë kërcimi.

Krahas kërcimit hip-hop, Xiao Chuani ka edhe shumë pasione të tjera. Atij i pëlqejnë muzika, sporti, udhëtimi etj.

Pak kohë më parë, Xiao Chuani mori pjesë në një veprimtari artistike të pakicave kombëtare në provincën Guizhou të Kinës jugperëndimore. Në këtë veprimtari Xiao Chuanit i lindi një ide për bashkimin e kërcimit hip-hop me vallet popullore kineze. Tani ai po bën kërkime në këtë fushë.

Xiao Chuani u shpreh se kërcimi hip-hop është një kërcim që u sjell njerëzve gëzime. Në të nuk ka veprime të drejta a të gabuara, çdo njeri mund ta shijojë këtë kërcim të lirë. (Fani)