dëgjoni

Në mes të këngës "Rrafshnalta Qinghai-Tibet", që është një këngë me karakteristika të theksuara tibetiane, u hap zyrtarisht konkursi muzikor i kupës "Ardhja në Kinë" i studentëve të huaj që studiojnë në shkolla të larta të Pekinit. Na duket se, me diapazonin e gjerë të zërit të saj, këngëtarja Lim Ven Sun po na shpie në truallin misterioz të Tibetit, që quhet "Çatia e botës".

Lim Ven Sun është një studente malajziane që po studion muzikën kombëtare kineze në Institutin e Muzikës Kineze. E ndikuar nga i ati, kjo vajzë pati interes të veçantë për muzikën kombëtare kineze dhe qysh në vogëli filloi ta mësojë atë. Duke studiuar në Kinë, ajo ka thelluar dhe zgjeruar më tej njohjen për muzikën kombëtare kineze. Ajo çmon veçanërisht larminë dhe brendinë e thellë të këngëve popullore kineze.

"Këngët popullore kineze karakterizohen nga toni i shkallës pesë-zanore, prandaj janë interesante. Ato ndryshojnë nga muzika e vendeve perëndimore. Edhe metoda e të kënduarit ndryshon. Këto këngë popullore, siç janë këngët "Motra Djegëse", "Uji i përroit", "Unë të dua, o dëbora në veri të Murit të Madh" e të tjera, që janë të kënduara nga Song Zu Ying, kanë ngjyrime të theksuara kineze. Ato karakterizohen nga zëri i lartë e i hollë dhe janë të këndshme."

Puna përgatitore e këtij konkursi filloi që në tetor të vitit 2007. Në të morën pjesë 200 studentë të huaj që studiojnë në 36 shkolla të larta të Pekinit. Ata janë nga 35 vende të botës, si Koreja e Jugut, Rusia, Malajzia, SHBA, Indonezia e të tjera. Pas konkurrimeve të zjarrta, 16 prej tyre hynë në finale, që u organizua para disa kohësh në sallën e koncertit të Universitetit Minzu Qendror të Kombësive të Pekinit. Ndër këngët që kënduan ata, kishte jo vetëm këngë popullore kineze, por edhe këngë argëtuese kineze, që janë shumë të preferuara në Kinë.

Nuh Sung Vu, që ka ardhur para 3 muajve nga Koreja e Jugut për studime në Universitetin Pedagogjik të Pekinit, këndoi një këngë argëtuese kineze me titull "Unë besoj", që u pëlqeu shumë spektatorëve. Ai tha se kultura kineze e tërhoqi atë në Kinë për të studiuar kulturën dhe gjuhën kineze.

"Pjesëmarrja në këtë konkurs më ndihmoi shumë në mësimin e gjuhës kineze dhe njohjen e kulturës kineze. Përveç kësaj kënge, kam mësuar edhe shumë këngë të tjera kineze."

Studenti kamerunas Francis Tchig, që drejtoi konkursin, tha se ai ka ardhur nga një vend i largët në Kinë për arsye se admiron kulturën dhe historinë e gjatë kineze.

"Kultura kineze më duket shumë e thellë. Para ardhjes këtu, unë përfytyroja se Kina është njëlloj si vendet e tjera, ndoshta dallohet vetëm nga ngjyra e lëkurës. Kurse, pasi erdha, vura re se këtu është një botë tjetër, një botë me kulturë të larmishme. Gjatë 4 vjet studimesh në Kinë, mësova mjaft gjëra. Unë u propozoj shumë të tjerëve të vijnë këtu për disa kohë për të njohur kulturën e këtij vendi shumë të madh."

Konkursi u zhvillua në një det gëzimi. Këngëtarët kënduan me gjithë mend dhe spektatorët i pritën me ngrohtësi, duke e çuar konkurrimin nga një kulm në një kulm tjetër. Më në fund, 4 studentë të ardhur nga Vietnatmi dhe vende të tjera fituan çmimin e parë. Rektori i Institutit të Muzikës të Universitetit Minzu Qendror të Pekinit, profesor Meng Sin Yang, një anëtar i jurisë, tha se konkurrimi ishte qenë i zjarrtë.

"Në përgjithësi, pjesëmarrësit në këtë konkurs treguan një nivel të lartë. Ne, anëtarët e jurisë, ndiem shpesh herë vështirësi të madhe për të dalluar se kush është i pari dhe kush është i dyti. Këta studentë të huaj jo vetëm kanë përvetësuar mirë gjuhën kineze, por edhe kanë njohur thellë kulturën kineze dhe dinë se si të interpretojnë përmbajtjen e këngëve që këndojnë. Kjo gjë na mahniti."

Zoti He Siang Ming nga Shoqata Pekinase e Arsimit të Lartë, që ishte një nga organizatorët e këtij konkursi, tha se për të pasuruar jetën e 60 mijë studentëve të huaj që studiojnë në Pekin, shoqata e tyre organizon çdo vit aktivitete me përmasa të mëdha me temën e Kupës "Ardhja në Kinë". Para konkursit të këngëve, ata organizuan edhe konkursin e valleve, ndeshjet e pingpongut dhe aktivitete të tjera. Tani e tutje, ata do të vazhdojnë të organizojnë aktivitete të tilla, me qëllim që studentët e huaj të thellojnë njohjen për Kinën. (Zheng)