dëgjoni

Në shtator të këtij viti do të zhvillohen në Pekin Lojërat Paralimpike 2008, që do të jetë një rast i çmuar për Kinën në nxitjen e çështjes së personave me aftësi të kufizuar. Për të zhvilluar me sukses këtë veprimtari, Pekini po bën aktivisht përgatitje dhe ka zhvilluar punët e gjithanshme përgatitore.

Përgjegjësi i grupit koordinues të punëve përgatitore për Lojërat Olimpike, z. Zhu Shanlu, u shpreh se në krahasim me Lojërat Olimpike, ato paralimpike kanë karakteristikat dhe rregullat e veta dhe u paraqitin kërkesa të larta punonjësve shërbyes për Lojërat Paralimpike, prandaj përgatitjet e gjithanshme janë të domosdoshme.

Në fillim të janarit, departamenti i vullnetarëve pranë Komitetit Organizativ të Lojërave Olimpike të Pekinit zhvilloi kursin e dytë për mësuesit e vullnetarëve për Lojërat Paralimpike. Gjatë përgatitjes ka shumë disiplina praktikimi, duke përfshirë si të ndihmohen sportistët me të meta në këmbë në shtyrjen e karrocës së invalidëve. Pas këtyre përgatitjeve, kandidatët për mësues të vullnetarëve do të marrin pjesë edhe në provimin e pranimit dhe vetëm ata që kalojnë provimin do të bëhet zyrtarisht mësues të përgatitjes së vullnetarëve të Lojërave Paralimpike.

Gjatë përgatitjes, teknikat e ndihmës ndaj personave me aftësi të kufizuar janë theksi i kursit. P. sh., vetëm mësimi i praktikës për shtyrjen e karrocës së invalidëve zgjati një orë. Vullnetarët u treguan shumë aktivë në përgatitje të tilla dhe mësuan me gjithë seriozitet nga ata që marrin ndihmë. Vullnetari që mori pjesë në këtë kurs, Zhang Sai, u shpreh se me këtë rast fitoi shumë njohuri dhe teknika lidhur me shërbimet për personat me aftësi të kufizuar.

"Mendoj se nëpërmjet këtij kursi, mora shumë njohuri të Lojërave Paralimpike dhe kam kuptim krejt të ri për këto lojëra. Veçanërisht në disa shërbime të posaçme për personat me aftësi të kufizuara zotëroj shumë teknika konkrete. Kam përparime të mëdha."

Përgjegjësi i grupit koordinues të punëve përgatitore për Lojërat Olimpike, z. Zhu Shanlu, tha se një kurs i tillë është vetëm një pjesë e përgatitjeve të Lojërave Paralimpike. Më vonë, do të zhvillohen më shumë aktivitete në ndihmë të personave me aftësi të kufizuara në të gjithë sektorët e shërbimit të Pekinit. Ai tha:

"Theksi janë vullnetarët e qytetit dhe punonjësit në sektorët e komunikacionit, të sigurimit publik, të restoranteve, të turizmit etj."

Nga ana e tij, Zhu Shanlu tha se cilësia e punëve përgatitore varet në shkallë të madhe nga niveli i mësuesve. Ai u shpreh:

"Lektorët e kurseve të tilla duhet të jenë specialistë që merren me punët e njerëzve me aftësi të kufizuara si dhe sportet në këtë drejtim."

Përveç zgjedhjes serioze të lektorëve, grupi koordinues i punëve përgatitore për Lojërat Olimpike hartoi në veçanti edhe një sërë tekstesh mësimore në këtë drejtim dhe do të zhvillojë përgatitje të ndryshme për sektorët e ndryshëm. (Wang Lei) (Artan)