dëgjoni

Sot do të shkojmë në qytetin Shenyang të Kinës veriperëndimore. Ndër 6 qytetet bashkërenduese të Lojërave Olimpike të Pekinit, Shenyang-u ka karakteristikat e veta. Në këtë qytet kanë lindur shumë kampionë botërorë e olimpikë, prandaj ai quhet djepi i kampionëve botërorë i Kinës. Zhvillimi i ndeshjeve olimpike në këtë qytet është me të vërtetë shumë i përshtatshëm.

Në bregun e liqenit të bukur Nanhu në jug të qytetit Shenyang, ndodhet një shkollë e lartë posaçërisht për fizkulturë, Instituti i Fizkulturës i Provincës Liaoning. Në të dy anët e rrugës kryesore të këtij korpusi gjenden shumë tabela dhe në secilën prej tyre është gdhendur emri i një kampioni botëror, të dalë nga kjo shkollë. Po të kalosh nga kjo rrugë duke numëruar tabelat gjatë saj, mund të numërosh të paktën deri 100! Nga një shkollë mund të dalin mbi 100 kampionë botërorë, kjo dukuri shihet vetëm në Shenyang-un me shumë talente sportive. Sipas statistikave, studentët e diplomuar në Institutin e Teknikave Sportive të Provincës Liaoning janë shpallur 145 herë kampionë botërorë dhe kanë thyer 174 rekorde botërore. Kjo shkollë vlerësohet edhe si "fabrika e medaljeve të arta". Ndër të diplomuarit nga kjo shkollë, shumë janë të njohur në arenën ndërkombëtare, si Wang Junxia, kampione olimpike e vrapimit 5000 metra për femra, Wang Nan, kampione e pingpongut si individ për femra në Lojërat Olimpike 2000, Sun Fuming, kampione e xhudos për femra në Lojërat Olimpike 1996 etj.

"Shenyang-u është një tokë magjepsëse dhe një fabrikë që krijon mrekulli. Në gjakun e banorëve të Shenyang-ut trashëgohet një shpirt heroik. Të gjithë banorët e qytetit tonë tregojnë vëmendje të madhe për zhvillimin e ndeshjeve olimpike në Shenyang."

Këto i tha me krenari zoti Xu Dadi, kryetari i zyrës së punëve përgatitore për ndeshjet olimpike në Shengyang. Ai i tregoi korrespondentit se Shenyang-u ishte kryeqyteti i parë i dinastisë Qing, të kontrolluar nga kombwsia mançure. Kultura e kalorësisë dhe e shigjetës e kombësisë mançure u ka dhënë banorëve të Shenyang-ut karakter lëvizjedashës, si dhe trup të fortë. Edhe në historinë e sporteve të Kinës, Shenyang zë një pozitë të rëndësishme. I pari kinez që mori pjesë në Lojërat Olimpike 1932, Liu Changchun-i, vjen nga Shenyang-u.

Zv/drejtori i Drejtorisë së Fizkulturës dhe Sporteve të Shenyang-ut, z. Xu Xingjia, i tha korrespondentit se pozita e përparuar e këtij qyteti në fushën sportive në vend është e pandarë nga zakoni i banorëve të tij, që parapëlqejnë kalitjen fizike dhe që marrin pjesë aktivisht në sporte të ndryshme. Ai u shpreh:

"Së pari, banorët e Shenyang-ut kanë ndërgjegjshmëri të madhe për nderin. Për interesat e vendit dhe figurën e qytetit, ata do të përpiqen me të gjitha forcat. Së dyti, këto vite Shenyang-u ka pasur një zhvillim relativisht të madh ekonomik e shoqëror. Niveli i jetesës së masave popullore është ngritur gjithnjë e më shumë, prandaj ata kanë më shumë energji për të marrë pjesë në sporte. Së treti, sporti dhe kalitja sportive janë mënyra e jetesës së banorëve të Shenyangut. Në këtë qytet industria sportive ka lulëzuar."

Sot zhvillimi i ndeshjeve olimpike të futbollit në Shenyang është bërë krenari e shumë banorëve të qytetit. Me afrimin e Lojërave Olimpike, edhe atmosfera e pritjes së Olimpiadës është theksuar më tej.

Në mars të vitit 2007, Shenyang-u nisi punët e mbledhjes së vullnetarëve për Lojërat Olimpike 2008. Sipas planit do të mblidhen vetëm 900 vullnetarë, por mbi 30 mijë banorë të Shenyangut u regjistruan, më i moshuari është 89-vjeçar, ndërsa më i vogli vetëm 5 vjeç. Kang Yifu, që mëson në klasën e 6-të në një shkollë fillore, është njëri prej tyre. Për shkak të moshës së vogël, ai nuk ka të drejtë të bëhet vullnetar olimpik, por u zgjodh fatmirësisht si një nga 500 "fëmijët olimpikë" të qytetit Shenyang dhe mori pjesë në aktivitetin e vizatimit me dorë të 5 rrathëve olimpikë. Ai i tregoi korrespondentit moton olimpike të përcaktuar për veten:

"Të përkrahet Olimpiada duke filluar që nga unë, çdo njeri të përpiqet të bëhet vullnetar olimpik. Të veprojmë duke filluar që nga unë për zhvillimin e Olimpiadës së gjelbër!"

Shenyang-u është një qytet me kulturë të thellë sportive, e cila mishërohet më mirë nga sheshet e ndryshme të kulturës sportive, dhe një prej tyre ndodhet në sheshin përpara Bashkisë në qendër të qytetit. Çdo mbrëmje këtu mblidhen mijëra sportdashës për kalitje fizike. Në muzg, me të hyrë në këtë shesh, korrespondenti i radios sonë u prek nga atmosfera e ngrohtë e kalitjes fizike. Këtu sheh valle latine, ushtrime gjimnastikore tradicionale kineze Ushu, lëvizje të topit të badmindonit etj.

Në qendër të sheshit, korrespondentin tonë e tërhoqën një grup njerëzish që luanin litarthi, të shoqëruar me muzikë me ritme të forta. Trajneri i këtij grupi njerëzish Cai Nanyi vjen nga Klubi i Litarthit i Shenyangut.

"Ne vijmë këtu çdo ditë. Vetëm nëse bëhet kalitje fizike në masë, sporti i një vendi do të jetë i fuqishëm. Kalitja fizike e përgjithshme është pikërisht synimi i Olimpiadës. Po të ngrihet cilësia trupore e të gjithë banorëve, do të fuqizohet patjetër vendi."

Po mos vallë shpirti i Olimpiadës nuk është shpërndarja e gëzimit të lëvizjes olimpike te sa më shumë njerëz? Në qytetin sportiv Shenyang, në mes të melodive të forta në sheshin përpara Bashkisë, kuptohet se pulsi i banorëve të qytetit rreh së bashku me Lojërat Olimpike 2008. (Wang Lei) (Artan)