dëgjoni

Qyteti Shangai, që ndodhet në bregdetin lindor të Kinës, është një qytet shumë i madh, me një popullsi të përhershme prej 18 milionë banorësh. Vitet e fundit, për të plotësuar nevojën e qytetarëve për udhëtim dhe për t'i shërbyer Ekspozitës Botërore të vitit 2010, qyteti Shangai ka caktuar strategjinë e zhvillimit të komunikacionit urban "Komunikacioni publik është në radhë të parë" dhe ka zhvilluar me forca të mëdha komunikacionin publik.

Ndërtimi i komunikacionit me shina të lirë, të shpejtë, me kursim dhe që mbron mjedisin është një masë e rëndësishme për zhvillimin e komunikacionit publik në këtë qytet. Zëdhënësi i Drejtorisë Administrative të Komunikacionit të Shangait, zoti Liu Min, tha se komunikacioni me shina zë një vend të rëndësishëm gjatë zhvillimit të komunikacionit urban të Shangait.

"Qyteti Shangai duhet të zhvillojë me forca të mëdha komunikacionin me shina. Komunikacioni me shina mund të shfrytëzojë plotësisht hapësirën nëntokësore për të lehtësuar trafikun rrugor mbi tokë. Komunikacioni me shina është i lirë, i shpejtë, i sigurt dhe i saktë. Ai do të bëhet një mjet kryesor transporti i komunikacionit të qytetit Shangai. I tërë komunikacioni i këtij qyteti do të formojë një rrjet unik të komunikacionit urban me komunikacionin me shina si mjet kryesor, me autobusët si bazë dhe me taksitë si shtojcë."

Qysh nga fundi i viteve '50 të shekullit të 20-të, Shangai filloi të ndërtojë komunikacionin me shina. Në prill 1995, linja e parë e metrosë së Shangait u vu në shfrytëzim, si rrjedhim, shangajasit udhëtuan për herë të parë me metronë e vet. Zv-drejtori i përgjithshëm i Shoqërisë së Metrosë Shentong të Shangait, zoti Zhu Hushen, i tha korrespondentit:

"Në atë kohë, ishim shumë të gëzuar. Më në fund në Shangai filloi të ketë metro. Me përpjekjet e disa brezave, ne kemi ndërtuar me forcat tona metrotë".

Më vonë, komunikacioni me shina në Shangai filloi të zhvillohet shpejt. Deri në fund të vitit 2007, në 12 vjet janë ndërtuar 8 linja të komunikacionit publik dhe gjatësia e tyre ka arritur në mbi 234 kilometra. Qytetarët thanë se komunikacioni me shina që lidhet me të katër anët, u ka sjellë shumë lehtësi në udhëtim.

"Vitet e fundit, metrotë në Shangai janë zhvilluar shumë dhe tani ka shumë linja që shkojnë në të katër anët."

"Metrotë janë shumë të mira, të shpejta dhe të sigurta. Tani unë zakonisht udhëtoj me metro."

Përveç komunikacionit me shina, bashkia e qytetit Shangai ka shtuar shumë përkrahjen ndaj rrugëve mbi tokë, ka përsosur pandërprerë planifikimin e ndërtimit të rrugëve dhe ka zbatuar "rrugët e posaçme të autobusit". Zëdhënësi i Drejtorisë Administrative të Komunikacionit të qytetit Shangai, zoti Liu Min, u shpreh se nëpërmjet masave të ndryshme, do të përsoset komunikacioni publik.

"Ne shpresojmë se do të shtojmë përqindjen e banorëve që udhëtojnë me komunikacionin publik, në mënyrë që komunikacioni publik të luajë me të vërtetë rolin e mjetit kryesor të komunikacionit."

Në vitin 2010 do të organizohet në Shangai Ekspozita Botërore. Sipas parashikimit, në atë kohë, numri i turistëve kinezë dhe të huaj që do të vijnë për vizitë në Shangai, do të arrijë në mbi 70 milionë. Për këtë, është hapur edhe një rrugë e posaçme që të çon drejtpërdrejt në zonën e Ekspozitës Botërore. Para vitit 2010, do të hapen edhe 3 rrugë të posaçme për Ekspozitën Botërore. Zëdhënësi Liu Min tha se komunikacioni publik i Shangait do të plotësojë nevojën për organizimin e Ekspozitës Botërore.

"Ne kemi hartuar planin e komunikacionit publik për Ekspozitën Botërore dhe tani ky plan po zbatohet mbarë. Në atë kohë, komunikacioni publik i Shangait do të marrë përsipër pjesën dërrmuese të detyrave të udhëtimit për mysafirët kinezë dhe të huaj që do të marrin pjesë në Ekspozitën Botërore." (Du) (Artan)