dëgjoni

Sot do t'ju paraqit disa këngë popullore të kënduara nga këngëtarja e njohur kineze Song Zuying.

Kënga që po ndiqni është një këngë popullore e provincës Jiangsu të Kinës jugore me titull "Lulet e jaseminit", e cila interpretohet nga Song Zuying. Kjo këngë me melodi të rrjedhshme dhe elegante shpreh dashurinë dhe adhurimin e njerëzve për lulet e jaseminit. Në këngë thuhet: "Lulet e bardha të jaseminit janë të bukura dhe aromatike, të gjithë i pëlqejnë. Le të këput disa prej tyre për t'ua dhënë të tjerëve."

Song Zuying, që ka lindur në vitin 1966 në një fshat të kombësisë miao të provincës Hunan në jug të Kinës, është një nga këngëtaret me ndikim më të madh në Kinë. Gjatë praktikës artistike shumëvjeçare, ajo ka rrënjosur thellësisht artin e saj në tokat e muzikës kombëtare të Kinës dhe njëkohësisht ka futur në të edhe mjeshtërinë e interpretimit të operës perëndimore, duke krijuar stilin e vet të veçantë të interpretimit. Ajo ka zë të ëmbël, këndon me ndjenja të thella dhe është në gjendje të interpretojë vepra muzikore të stileve të ndryshme.

Kënga që po ndiqni është një këngë popullore e provincës Hubei të Kinës jugore me titull "Kënga për varkën". Teksti i këngës është i thjeshtë e lakonik, kënga përshkruan një nuse të shkathët dhe të bukur, e cila gjatë rrugës për t'u kthyer në shtëpinë e nënës, arriti në një skelë dhe iu lut varkëtarit ta çojë në anën tjetër të lumit.

Song Zuying është një këngëtare shumë aktive, në shumë mbrëmje artistike madhështore dhe aktivitete të rëndësishme mund të shihet prania e saj dhe të dëgjohen këngët e saj. Në të njëjtën kohë ajo ka shkaur më se një herë me delegacione artistike kineze për vizitë dhe shkëmbime artistike në Evropë, Azi dhe Amerikë, ku është mirëpritur ngrohtësisht nga spektatorët e huaj dhe emigrantët kinezë. Në vitin 2002, ajo organizoi koncertin e saj recital me titull "Ditët e mira" në Teatrin e Operës Sidnei të Australisë, duke u bërë këngëtarja e parë popullore kineze që ka organizuar koncertin recital jashtë vendit. Në nëntor të vitit 2003, ajo organizoi një koncert tjetër në Sallën e Artë të Vjenës, ku me zë të këndshëm e të bukur tërhoqi vëmendjen e spektatorëve evropianë. Shfaqja u kurorëzua me sukses të plotë.

Në fund të programit ju ftoj të shijoni këngën popullore tibetiane me titull "Njeriu i xhanit është si lule Dama", interpretuar nga Song Zuying në koncertin e saj në Sallën e Artë të Vjenës. Kjo këngë, që karakterizohet nga stili e veçoria e theksuar tibetiane, përshkruan dashurinë prekëse të stepës së pafund. Në këngë thuhet: "Anembanë fluturojnë qyqet, kudo tingëllojnë bukur këngët. Po të mos qëndrosh në degën e lartë të pemës, askush nuk e di bukurinë e këngës tënde. Njeriu i xhanit është si qyqe, më i bukuri në botë. Po çelin lulet Dama, të kuqe e aromatike."

Të dashur dëgjues, në mes të tingujve të bukur të këngës "Njeriu i xhanit është si lule Dama", mbarojmë programin e sotëm të këngëve popullore kineze. Mirudëgjofshim të shtunën tjetër. Në mikrofon për ju, Pina.