dëgjoni

Para pak kohësh, Radio e Jashtme e Kinës hapi zyrtarisht të parin Institut Radiofonik të "Konfucit", gjë që është një sihariq për miqtë e huaj që kanë dëshirë të mësojnë gjuhën kineze dhe që adhurojnë kulturën kineze, sepse me hapjen e tij shtohen kanalet e mësimdhënies së gjuhës kineze. Që tani e tutje, miqtë tanë të huaj mund të mësojnë më lehtë gjuhën kineze me ndihmën e gjuhës së vet amtare nëpërmjet programeve tona të mësimdhënies radiofonike në radio dhe në internet.

"Do të lexoj një ekstrakt nga "Analet e Konfucit"?kur udhëtojmë tre veta, me siguri gjej prej tyre një mësues për mua. Kur e zgjedh më të mirin prej tyre si mësues për mua, më i dobti prej tyre mund të ndreqë të metat e tij."

Ndoshta ju duket e pabesueshme që këtë ekstrakt prej veprave klasike kineze e lexoi një vajzë 9-vjeçare nga Serbia. Ajo quhet emrin Katarina Stojanoviç dhe ka marrë emrin e bukur kinez "Su Li Na". Ajo ka ardhur në Kinë para 3 vjetëve bashkë me nënën e saj, që erdhi këtu për të punuar. Nëna e saj, Tatiana Soldat, që ka marrë emrin kinez "Su Çun Yu", na shpjegoi pse e bija flet kaq rrjedhshëm në gjuhën kineze.

"Erdhëm në Kinë para 3 vjetëve. Në atë kohë, ajo nuk dinte asnjë fjalë kineze dhe në tre muajt e parë nuk mësoi asgjë. Nganjëherë luante bashkë me fëmijët kinezë. Një ditë, ajo erdhi nxitimthi te unë dhe më pyeti se çfarë do të thotë 'zhuo mi cang'. Unë i thashë se kjo do të thotë që njëri fëmijë fshihet që tjetri ta gjejë. Ajo shkoi me vrap për të vazhduar lojën. E ka filluar mësimin e gjuhës kineze në këtë mënyrë dhe tani është bërë një farë pekinaseje e vogël."

Kjo vajzë serbe e përvetësoi kaq shpejt gjuhën kineze sepse mësoi në një mjedis afërsisht si në mjedisin e gjuhës së vet amtare. Instituti Radiofonik i "Konfuci", që është formuar pikërisht mbi një parim të tillë mësimdhënieje, do të hartojë një seri programesh me lëndë unike mësimore të gjuhës kineze dhe do t'i japë në emisionet e 38 gjuhëve në radio dhe në internet. Kështu, miqtë tanë të huaj do të kenë lëndë mësimore të gjuhës kineze, në gjuhët e tyre amtare.

Zv-ministri i Arsimit i Kinës, Zhan Sinsheng, thotë se, me hapjen e Institutit Radiofonik "Konfuci", është ngritur një urë me valët e radios miqësisë, e cila do të plotësojë kërkesat e miqve tanë në vende të ndryshme të botës për mësimin e gjuhës kineze.

Në fakt, që nga viti 2004, qeveria kineze filloi të formojë në vende të tjera institucione të mësimdhënies së gjuhës kineze, duke i emërtuar me emrin e Konfucit, përfaqësues i kulturës tradicionale kineze. Deri tani janë ngritur mbi 200 Institute "Konfuci" në 60 vende dhe rajone të botës. Krahas zgjerimit dhe thellimit të lidhjeve të Kinës me vendet e tjera, rritet vlera kulturore dhe praktike e gjuhës kineze dhe gjithnjë e më shumë të huaj hyjnë në radhët e adhuruesve të kësaj gjuhe. Nga të dhënat statistikore del se numri i njerëzve që mësojnë gjuhën kineze i ka kaluar 30 milionë vetat. Instituti Radiofonik "Konfuci" lindi pikërisht në kohën kur ndihet pamjaftueshmëria e pedagogëve të Instituteve "Konfuci".

Shefja e zyrës së Grupit Drejtues Kombëtar Kinez të mësimdhënies së gjuhës kineze në vende të tjera, zonja Shy Lin, tha në një intervistë se, me hapjen e Institutit Radiofonik "Konfuci", është plotësuar në mënyrë efektive pamjaftueshmëria e pedagogëve të Instituteve "Konfuci" në vende të tjera.

"Është i qartë roli i veçantë i Institutit Radiofonik "Konfuci", që ka një gjerësi dhe përmasë të madhe përhapjeje. Secili prej Instituteve "Konfuci" që kemi hapur në truallin e vendeve të tjera ka vetëm qindra kursistë. Ndërsa Instituti Radiofonik "Konfuci" mund të ketë një numër të shumëfishuar kursistësh. Institutet "Konfuci" në tokë nuk mund të kenë aq shumë lëndë mësimore, siç janë kultura tradicionale kineze, mjekësia kineze, farmaceutika kineze dhe Gongfuja kineze, ndërsa Instituti Radiofonik "Konfuci" ka programe shumë të larmishme, gjë që është një ndihmë e madhe për ta."

Me qëllim që miqtë tanë të huaj të mësojnë sa më mirë gjuhën kineze nëpërmjet Institutit Radiofonik të "Konfuci", do të fillojë gradualisht dhënia e programeve të mësimdhënis së gjuhës kineze në emisione të gjuhëve të ndryshme. Për këtë foli drejtori i Radios së Jashtme të Kinës, zoti Vang Geng Nian.

"Instituti Radiofonik i "Konfuci" është i gatshëm që, me përpjekjet tona këmbëngulëse, të ngrejë një urë të shkëmbimeve gjuhësore dhe kulturore midis popullit kinez dhe popujve të tjerë, duke dhënë kështu një kontribut aktiv në realizimin e shumëllojshmërisë së kulturës botërore dhe në ndërtimin e një bote plot me harmoni." (Zheng)