dëgjoni

Ju flet Radio e Jashtme e Kinës, të dashur dëgjues, javën e kaluar, ndoqët një histori të njohur në historinë e lojërave olimpike, në të cilin u takuam bashkë me holandezen fluturuese, Fanny Blankers-Koen, e cila fitoi shtatzënë, katër medalje të arta në Olimpiadën e Londrës, duke barazuar rekordin e idhullit të saj, Jesse Owens.

Sot do të vazhdojmë minirubrikën tonë 'Tregime Olimpike' me një histori tjetër interesante.

Lojërat olimpike moderne na kanë sjellë legjenda të panumërta, një nga të cilat lidhet me çiftin Zatopek. Dhe kjo është legjenda më e lumtur dhe më romantike në historinë olimpike.

Pasi përfundoi Olimpiada e Londrës në vitin 1948, Helsinki i Finlandës fitoi të drejtën e organizimit të Lojërave të 15-ta Olimpike të vitit 1952. Ndër olimpistët e kësaj olimpiade, kishte një çift të vërtetë: atleti i ekipit të Çekosllovakisë në vrapimin e distancave të gjata, Emil Zatopek dhe gruaja e tij, sportiste në hedhjen e shtizës Dana Zatopekova. Emil Zatopeku kishte qenë një ushtarak dhe vullneti i tij ishte forcuar shumë nga eksperiencat e tij në ushtri. Gjatë ditëve si sportist, ai gjithmonë bënte stërvitje me standarde të rrepta ushtarake dhe vraponte çdo ditë rreth 30 kilometra.

Në garën e vrapimit 5000 metra për meshkuj, Emil Zatopeku fitoi me lehtësi titullin kampion. Në të njëjtën ditë, e shoqja Dana Zatopekova fitoi titullin kampion në hedhjen e shtizës për femra, duke u bërë sportistja e para çekosllovake që fitoi titullin kampion të atletikës në lojërat olimpike. Më interesante është ajo që Emil Zatopeku dhe gruaja e tij kanë lindur në të njëjtën ditë në të njëjtin muaj e në të njëjtit vit, dhe në të njëjtën ditë, ky çift kampion u ngjit në podiumin e kampionëve të lojërave olimpike, çka është bërë një histori e rrallë dhe më e preferuara nga njerëzit.

Krahas kësaj, vlen të përmendet që Emil Zatopeku fitoi 3 medalje të arta përkatësisht në garën 5000 metra, 10000 metra dhe në garën e maratonës, të cilat, siç dihet, janë më të lodhshmet ndër sportet olimpike dhe për një atlet është e vështirë që të fitojë një medalje të artë në to. Por ky atlet çekosllovak i fitoi të gjitha, gjë që është një magji në fushën e atletikës. Për këtë arsye, Emil Zatopeku është bërë një nga atletët më të mëdhenj në historinë e atletikës e të lojërave olimpike, dhe është quajtur me dashuri 'lokomotivë njerëzore'.

Paraqitjet e shkëlqyera të Emil Zatopek-ut dhe të gruas së tij e kanë bërë Olimpiadën e Helsinkit të vitit 1952 olimpiadën më të suksesshme në historinë e sportit çekosllovak. Pasi përfundoi kjo olimpiadë, çifti Zatopek u nderua si heroi kombëtar i Çekosllovakisë, kurse kjo legjendë e bukur vazhdon të ndriçojë gjithmonë në historinë e lojërave olimpike.

Të dashur dëgjues, për më shumë informacion lidhur me lojërat olimpike, mund të klikoni në faqen tonë të internetit me adresën albanian.cri.cn

Herën tjetër, do t'ju tregojmë për një sportist legjendar në historinë olimpike, Karoly Takaçis. Mirupafshim!!(Jiang Lei)