dëgjoni

Organizimi i Lojërave Olimpike do t'i sjellë qytetit organizator dhe madje të gjithë vendit organizator forcë të madhe nxitëse, kjo është bërë një "rregull" i vërtetuar nga edicionet pas vitit 1984, kur u zhvilluan Lojërat Olimpike të Los Anxhelosit. Ky rregull vërtetohet gjithashtu edhe në qytetin Qingdao.

Qyteti i bukur bregdetar Qingdao është një nga qytetet bashkërenduese të Lojërave Olimpike të Pekinit. Në vitin 2008 atje do të zhvillohen garat olimpike të lundrimit me vela. Që nga viti 2003 kur ky qytet u përcaktua si qytet bashkërendues i Olimpiadës, zhvillimi ekonomik i tij ka pasur "efektivitet të dukshëm olimpik". Gjatë 4 vjetëve të fundit, vëllimi i GDP-së së këtij qyteti është rritur mesatarisht 16.4 % në vit dhe të ardhurat vendore janë shtuar mesatarisht 22.8 % në vit. Këto rritje jo vetëm kanë forcuar potencialin e qytetit, por edhe kanë hedhur një bazë të fortë për ngritjen e cilësisë së jetesës së popullit. Gjatë një interviste të posaçme për korrespondentin e radios sonë, kryetari i Bashkisë së qytetit Qingdao, z. Xia Geng, u shpreh:

"Vitet e fundit, me nxitjen e 'efektivitetit olimpik', ekonomia e qytetit tonë ka pasur një zhvillim relativisht të shpejtë. Lojërat Olimpike i kanë sjellë shumë ndryshime jetesës së banorëve dhe njëri prej tyre është shtimi i të ardhurave. Këto vite janë bërë periudha me shtimin më të shpejtë të të ardhurave të banorëve të Qingdaos."

Sipas të dhënave jo të plota statistikore, vitet e fundit, qyteti Qingdao ka investuar afro 20 miliardë juanë në ndërtimin urbanistik që ka lidhje me Olimpiadën, këtu përfshihen pallatet e stadiumet olimpike, si dhe infrastruktura për garantimin e organizimit me sukses të garave olimpike. Kryetari i Bashkisë së Qingdaos Xia Geng tha se gjatë 4 vjetëve të fundit investimet e Qingdaos në fushat e mjekësisë, kulturës dhe të komunikacionit janë shtuar 40 % në vit. Ndërtesa e re e Spitalit Qingdao është vënë në shfrytëzim, Teatri i Madh i Qingdaos dhe Qendra e Artit Modern e Qingdaos janë në zhvillim e sipër, ndërsa galeria, biblioteka dhe salla e muzikës e qytetit janë në transformim. Këto ndërtime urbanistike lidhur me Olimpiadën kanë krijuar afro 100 mijë vende pune.

Turizmi është pjesë e rëndësishme përbërëse e ekonomisë olimpike. Qyteti Qingdao ka qenë pikë e njohur turistike në Kinë, ndërsa këto vite, duke shfrytëzuar faktin që është qytet bashkërendues olimpik, ai ka zgjeruar ndikimin e vet në botë. Z. Xia Geng tha:

"Vitet e fundit, kemi ngulur këmbë në shkëmbimin e përhapjes së Lojërave Olimpike me reklamat e turizmit të qytetit. Kemi organizuar në mbi 30 vende aktivitete për të përhapur markën e qytetit, me temë 'Takohemi në Olimpiadë, në garat e lundrimit me vela në Qingdao'."

Lojërat Olimpike kanë sjellë shanse të mëdha tregtare për ndërmarrjet vendore. Tani dy ndërmarrje të famshme të Qingdaos janë bërë sponsorë të Lojërave Olimpike 2008, Grupi "Hair" dhe Kompania Aksionare e Birrës "Tsingdao". Duke kryer detyrimet e tyre si sponsorë të Olimpiadës, ata janë favorizuar drejtpërdrejt nga forca nxitëse e Olimpiadës për ekonominë. Në vitin 2006, një vit pasi Kompania e Birrës "Tsingdao" u bë sponsor i Olimpiadës, vëllimi i përgjithshëm i shitjes së birrave i saj u ngrit 111.5 %. Lojërat Olimpike jo vetëm ndihmojnë ndërmarrjet në zgjerimin e tregut, por kanë ushtruar ndikim pozitiv edhe brenda ndërmarrjes. Këshilltarja e presidentit të bordit të drejtorëve të kompanisë, zj. Yuan Lu, na paraqiti:

"Për ne punonjësit e kompanisë, statusi si sponsor i Lojërave Olimpike është një nder i madh. Edhe shpirti olimpik 'Më lart, më shpejt, më fort' na inkurajon të bëjmë më mirë."

Era olimpike ka shpejtuar lundrimin e ekonomisë së qytetit Qingdao. Nga sponsorët olimpikë deri në banorë të thjeshtë ndiejnë nga afër përfitimet e sjella nga "efektiviteti olimpik". (Wang Lei) (Artan)