dëgjoni

Ju flet Radio e Jashtme e Kinës! Të dashur dëgjues, unë jam Pina, po takohemi përsëri në programin e sotëm të këngëve popullore. Lëshimi me sukses nga Kina pak kohë më parë i satelitit të parë "Chang Ë Nr. 1" për kërkime rreth Hënës ka shkaktuar entuziazmin e kinezëve për studimin e Hënës dhe përfytyrimet e tyre për Hënën. Në fakt shumë këngë popullore kineze të përhapura gjerësisht kanë lidhje me hënën. Në programin e sotëm do t'ju paraqit disa këngë popullore kineze për hënën.

Në Kinë hëna ka shumë kuptime simbolike, në sytë e kinezëve ajo simbolizon mbarësinë dhe bukurinë. Ajo është mbartësja e ndjenjave njerëzore dhe shpreh dashurinë dhe mallin e njerëzve për të dashurit, për vendlindjen, për të afërmit e miqtë. Kënga popullore e kombësisë tartare "Nën rrezet e argjendta të hënës" që ndoqët, shpreh pikërisht mallin nëpërmjet hënës. Kjo këngë me melodi të ngadalshme dhe tekst të bukur përshkruan peizazhin e bukur të natës me hënë dhe mallin e një djali për vajzën e zemrës. Në këngë thuhet: "Në ranishten e argjendtë janë shpërndarë rrezet e argjendta të hënës, po kërkoj gjurmët e së kaluarës. Gjurmët e së kaluarës janë të paqarta si në ëndërr. Ku je fshehur, moj vajzë që më ke braktisur!"

Në zemrat e njerëzve hëna është e bukur dhe fisnike, jeta e përditshme e njeriut është e lidhur shumë ngushtë me ndryshimin e saj. Në një natë të errët, hëna si një fener i orienton njerëzit. Si në kohët e lashta, ashtu edhe në ditët e sotme, shumë shkrimtarë e poetë kanë krijuar vepra e vargje të bukura për hënën.

Kënga që po ndiqni është një këngë popullore e provincës Yunnan të Kinës jugperëndimore me titull "Hëna e bardhë". Kjo këngë shpreh në mënyrë të thjeshtë dashurinë midis djalit e vajzës nën rrezet e hënës. Në këngë thuhet: "Hënë e bardhë, kam shumë fjalë zemre për të thënë, kur mund të t'i tregoj? O moj hënë, ku është vajza ime? Yjet shkojnë pas hënës, djali e vajza do të martohen me siguri."

Njerëzit kanë shumë përfytyrime për hënën e bukur, arritja në Hënë ka qenë qysh në kohët e lashta dhe është ëndrra e njeriut. Miti i lashtë kinez "Chang Ë fluturoi në Hënë" tregon pikërisht interesin e madh të kinezëve të lashtë për këtë trup qiellor misterioz dhe dëshirën e tyre për t'u ngjitur në hënë.

Kënga që po ndiqni është një këngë popullore e Tajvanit të Kinës me titull "Vallja e hënës". Kjo është një këngë e lashtë dhe e përhapur gjerësisht, e cila ka ritme të gjalla dhe të gëzueshme. Kënga përshkruan tablonë e hareshme ku njerëzit këndojnë e vallëzojnë nën rrezet e hënës dhe shpreh tiparet e hapura dhe të çiltra të banorëve vendorë tajvanezë. Në këngë thuhet: "Miq, ejani shpejt, hëna e bukur është ngjitur në shpatin e malit lindor, duke shfrytëzuar këtë rast të mirë, le të këndojmë e të vallëzojmë."

Ju flet Radio e Jashtme e Kinës! Të dashur dëgjues, ndoqët disa këngë popullore kineze lidhur me hënën. Mirudëgjofshim të shtunën tjetër. Në mikrofon për ju, Pina.