degjoni

Dëbora e madhe ka ndikuar negativisht në transportin e qymyrgurit për prodhimin e energjisë elektrike në Kinë. Si pasojë, në disa krahina gjendja e furnizimit të energjisë elektrike është shumë serioze. Krahinat e ndryshme kineze kanë marrë masa urgjente për të zbutur gjendjen e nderë të furnizimit të energjisë elektrike duke siguruar së pari energjinë elektrike për banorët.

Tani në mbarë vendin ka mungesë të 70 milionë kilovatëve energji elektrike. Në këtë gjendje, krahinat e ndryshme kineze kanë marrë masa për të kufizuar përdorimin e energjisë elektrike të ndërmarrjeve me harxhim të shumtë të energjisë duke siguruar së pari energjinë elektrike për banorët dhe spitalet, shkollat, organet e transportit etj. në lidhje me interesat dhe sigurinë e masave publike.

Për të siguruar energjinë elektrike të banorëve, provinca Siçuan e Kinës perëndimore pakëson çdo ditë furnizimin e 40 milionë kilovatëve energji elektrike në ndërmarrjet me harxhim të shumtë të energjisë. Drejtori i një ndërmarrjeje kimike në këtë provincë Chen Guoming u shpreh:

"Ndërmarrja jonë harxhon shumë energji. Tani ne përdorim vetëm 40 mijë kilovatë energji elektrike çdo ditë, disa punishte të ndërmarrjes kanë ndaluar prodhimin."

Tani furnizimi i energjisë elektrike për banorët është në përgjithësi normal. Por mungesa e energjisë elektrike ka ndikuar negativisht edhe në pak lagje banorësh. Banorët u shprehën se ata e mirëkuptojnë këtë gjendje. Zonja Chen Xi e lagjes "Yaoqi" të qytetit Uhan të Kinës Qendrore u shpreh:

"Mund ta mirëkuptoj gjendjen e vështirë. Dëbora është shumë e madhe. Ne mund t'i kapërcejmë vështirësitë."

Komiteti Shtetëror i Zhvillimit dhe i Reformës i Kinës u ka kërkuar krahinave të ndryshme të sigurojnë transportin e qymyrgurit për prodhimin e energjisë elektrike duke shtuar rezervat e qymyrgurit. Njëkohësisht organet e energjisë elektrike të krahinave të ndryshme kanë marrë masa për të siguruar funksionimin normal të pajisjeve të energjisë elektrike. Provinca Guizhou e Kinës jug-perëndimore pësoi fatkeqësinë e dëborës dhe u ndërpre furnizimi i energjisë elektrike në 11 konte të saj. Nëpërmjet riparimit urgjent, tani ka rifilluar furnizimi i energjisë elektrike në disa konte. Punonjësja e shoqërisë së riparimit të pajisjeve të transportit të energjisë elektrike të Guizhout Gao Jie u shpreh:

"Ne kemi marrë shumë masa për të riparuar pajisjet e prishura të transportit të energjisë elektrike. Të gjithë punonjësit e shoqërisë kanë marrë pjesë në punën e shpëtimit."

Sipas parashikimit të motit, në disa ditët e ardhshme, në shumë krahina kineze do të bjerë përsëri dëborë e madhe. Organet përkatëse po marrin masa të mëtejshme për të siguruar furnizimin e qymyrgurit për prodhimin e energjisë elektrike. (Fani)