degjoni

Në shtator të vitit 2007 u zhvillua në Kinë Kupa e Botës në Futbollin e Femrave, por ekipi kinez nuk u paraqit mirë në këtë edicion dhe nuk hyri as në gjysmëfinale. Pas përfundimit të kësaj kupe, trajnerja kryesore suedeze e ekipit kombëtar të Kinës Domanski dha dorëheqjen dhe pastaj Shoqata e Futbollit e Kinës ftoi francezen Elizabet si trajnere kryesore dhe vendosi që ekipi kombëtar kinez i futbollit të femrave të kryesohet nga ajo në përgatitjet për Lojërat Olimpike të Pekinit.

Pavarësisht se duket serioze, 44-vjeçarja Elizabet është një grua plot vitalitet. Ndonjëri e vlerësoi që në jetën e Elizabetës ka vetëm futboll. Ajo ka punuar si trajnere kryesore e ekipit kombëtar të Francës për 10 vjet me radhë dhe ka qenë edhe lektorja e Federatës Ndërkombëtare të Futbollit. Pas ardhjes në Kinë, çfarë gjërash të reja mund t'i sjellë ajo ekipit kinez?

Në dhjetor të vitit 2007, Elizabeta, në krye të ekipit kinez të futbollit të femrave, nisi zhvillimin e stërvitjeve të përqendruara në qytetin Guangzhou të Kinës jugore. Kjo është faza e dytë e stërvitjeve të përqëndruara pas marrjes së detyrës prej saj, me anë të së cilës ajo ka qëllim që të shikojë lojtaret, të përcaktojë formacionin e skuadrës dhe të forcojë teknikën e taktikën e skuadrës. Gjatë këtyre stërvitjeve, ekipi kinez zhvilloi dy ndeshje parapërgatitore me ekipin e Zelandës së Re, më në fund ekipi kinez fitoi mbi kundërshtarin përkatësisht me rezultatin 1:0 dhe 4:0.

Nga këto dy ndeshje del se transformimi nga Elizabeta i ekipit kinez të futbollit të femrave ka pasur efektivitet fillestar dhe anëtaret e ekipit e pranojnë gradualisht atë, si dhe ndryshimin e sjellë nga ajo. Duke folur për karakteristikat e Elizabetës si trajnere, sulmuesja Han Duan u shpreh:

"Gjatë stërvitjeve ajo na trajton shumë rreptësisht dhe seriozisht. Tani jemi vetëm në fazën e dytë të stërvitjes, ende në një periudhë që duhen njohje e përshtatje me njëra-tjetrën. Mendoj se këto stërvitje të përqendruara janë të suksesshme. Ne të gjithë morëm pjesë në to aktivisht dhe fituam në dy ndeshje. Kjo ka shumë rëndësi për ne."

Fitoret në dy ndeshje me radhë ishin patjetër një gjë e gëzueshme për Elizabetën, që punon në Kinë prej një kohe jo të gjatë. Mirëpo ajo e kupton qartë që ky është vetëm fillimi i punës së saj në ekipin kinez. Nëpërmjet stërvitjeve të përqendruara dhe ndeshjeve parapërgatitore, edhe Elizabeta u përpoq të njohë çdo anëtare të ekipit dhe që ato të pranojnë mendimet e saj si trajnere.

"Thashë në të kaluarën se këto dy ndeshje ndërkombëtare kanë për qëllim që të shikoj, nga njëra anë, paraqitjen e anëtareve në ndeshje të rëndësishme dhe, nga ana tjetër, nëse kërkesat e mia taktike mund të zbatohen në fushë. Nga këto dy ndeshje del se anëtaret janë të mira në ndërgjegjshmërinë për pasimin e topit dhe për sulmin."

Në Kupën e Botës në Futbollin e Femrave në shtator të vitit 2007, ekipit të Zelandës së Re i takoi të ndeshet me ekipin kinez. Në krahasim me ndeshjen e shtatorit, trajneri kryesor i këtij ekipi Hedman shprehu mendimin se ekipi kinez ka pasur ndryshim të madh dhe Elizabeta po i sjell ekipit kinez taktika më të përparuara.

"Trajnerja e re Elizabet i ka sjellë sigurisht taktika të reja. Tani ekipi kinez organizon më shumë sulme nëpërmjet koordinimit në tokë. Me taktikat e reja, ndoshta lojtaret kineze do të përshtaten pas njëfarë kohe, por nga largpamësia, kjo patjetër do të jetë në favor të rritjes së këtij ekipi. Tifozët kinezë duhet të falënderojnë këtë mënyrë të re."

Krahas një trajnereje kryesore me përvojë të pasur, për arritjen e rezultateve të qëndrueshme edhe punët e garantimit të prapavijës janë shumë të rëndësishme. Në fund të vitit 2007, z. Zhang Jianqiang u emërua si drejtor i ekipit kinez të futbollit të femrave dhe merret me punët e garantimit të prapavijës të ekipit. Në fakt Zhangu është marrë me punën e futbollit të femrave për mbi 30 vjet dhe gjithashtu ka përvojë të pasur. Si drejtor i ekipit, ai do t'u krijojë Elizabetës dhe anëtareve të ekipit mjedis të mirë përgatitjeje për Lojërat Olimpike. Ai shpreson se nëpërmjet përpjekjeve të veta do ta ndihmojë futbollin e femrave të Kinës të arrijë sukses në Lojërat Olimpike të Pekinit.

"Do të bashkërendohem me të gjitha forcat me trajneren kryesore në punët e prapavijës, si dhe punë të tjerë shërbyese, në mënyrë që ekipi ynë të ketë përparim të dukshëm në Lojërat Olimpike."

Nuk mbeten as 200 ditë nga hapja e Lojërave Olimpike të Pekinit. Megjithëse nuk kanë shkuar për një kohë të gjatë, stili i Elizabetës me seriozitet në fushë dhe mirëdashësi në kohën e lirë u pëlqen vajzave të ekipit kinez të futbollit të femrave. Në kohën e mëvonshme, nën udhëheqjen e Elizabetës, ekipi kinez do të përpiqet të ngrejë potencialin e vet nëpërmjet çdo stërvitjeje dhe ndeshjeje parapërgatitore, që të arrijë rezultat të mirë në Olimpiadë. (Wang Lei) (Artan)