Ju flet Radio e Jashtme e Kinës! Të dashur dëgjues, unë jam Pina, po takohemi përsëri në programin e sotëm të këngëve popullore kineze. Në këtë program do t'ju paraqes përsëri disa këngë popullore e kombësisë kazake.

Të dashur dëgjues, kënga që po ndiqni është një këngë popullore të kombësisë kazake me titull "Dallëndyshja". Kjo këngë elegante dhe lirike përshkruan një djalë, i cili e dashuron një vajzë, por nuk guxon t'ia shprehë asaj dashurinë, prandaj i kallëzon dallëndyshes. Në këngë thuhet: "O moj dallëndyshe, më dëgjo mua, ti je e gëzueshme, e dashur dhe e gjallë, qeshja jote shkëlqen si yll. O moj dallëndyshe, mos harro premtimet e tua..."

Këngët popullore të kombësisë kazake ndahen nga përmbajtja në këngë pune, këngë lavdie, këngë dashurie, këngë zakonesh etj., ndër të cilat këngët e dashurisë zënë një peshë mjaft të madhe. Kazakët kalojnë një jetë shtegtare, të dashuruarit shpesh ndodhen larg njëri-tjetrit, kështu që blegtorët këndojnë me zë të lartë përballë maleve të larta dhe stepës së madhe, për të shprehur ndjenjat e tyre. Këngët e dashurisë së kazakëve pasqyrojnë më shumë vuajtjet e ndarjes dhe urimet për të dashurit. Kënga popullore kazake që do të dëgjoni më poshtë me titull "Gaelitai" përshkruan pikërisht vuajtjet e të dashuruarve që ndodhen larg njëri-tjetrit. Në këngë thuhet: "Gaelitai, pse nuk më pret? Erdha për të të takuar, por ti nuk ishe, nuk ishte as çadra jote. E dashur e zemrës, kur mund të takohemi ? Kush më tregon se ku ke shkuar."

Kazakët e çiltër dhe mikpritës jetojnë kryesisht në veri të Sinjiangut, dhe shumica e tyre kalojnë një jetë shtegtare. Kur takohen ata e përshëndesin njëri-tjetrin me shprehje "Paç mbarësi në familje", "T'u shtoftë bagëtia". Ata i mirëpresin të gjithë mysafirët që vijnë për vizitë dhe për të fjetur, edhe sikur të mos i njohin.

Në zonën e banuar nga kazakët organizohen çdo vit aktivitete interesante folklorike, si gara e kuajve, ndjekja e djalit nga vajza etj. Ndjekja e djalit nga vajza është loja më interesante e të rinjve kazakë. Një djalë e një vajzë të hipur në kalë shkojnë drejt një vendi të caktuar. Gjatë rrugës djali mund të bëjë shaka të ndryshme me vajzën dhe të thotë fjalë ngacmuese, për të shprehur dashurinë e vet. Vajza e dëgjon e heshtur dhe sikur i vjen shumë turp. Kur arrijnë në destinacion, djali duhet të kthehet i pari dhe vajza e ndjek pas, duke e qëlluar djalin çapkën me kamxhik, djali nuk lejohet të kundërgodasë. Gjatë ndjekjes, në rast se vajza e pëlqen djalin, nuk e godet me forcë.

Të dashur dëgjues, në fund të programit të sotëm, ju ftoj të shijoni këngën tjetër popullore kazake me titull "Kam edhe një këngë tjetër të bukur". Kjo është një këngë e nënkuptueshme e dashurisë. Në këngë thuhet: "Kam edhe një këngë të bukur që nuk e këndoj, kam edhe një fjalë të zemrës që nuk e them, këtë fjalë e ruaj gjithmonë në zemrën time. O moj e dashur, dëshiroj ta dhuroj, pranoje të lutem."

Ju flet Radio e Jashtme e Kinës! Të dashur dëgjues, ndoqët një grup tjetër të këngëve popullore të kombësisë kazake. Mirudëgjofshim të shtunën tjetër. Në mikrofon për ju, Pina.