dëgjoni

38-vjeçari Liu Junyi lindi në provincën Hubei të Kinës jugore. Në të kaluarën, ai ishte një poet, ndërsa tani është drejtuesi i shoqërisë kinematografike "Junyi", por vijon të merret edhe me krijimin e poemave. Liu Junyi u shpreh se ai ka temperamentin romantik të poetit dhe mban përgjegjësinë shoqërore. Kohët e fundit, ai xhiroi filmin "Fëmijët që jetojnë pa prindërit" që i kushton vëmendje këtij problemi shoqëror.

Me zhvillimin e shpejtë të ekonomisë kineze, shumë fshatarë vijnë në qytet për punësim, por fëmijët e tyre qëndrojnë ende në vendlindje. Sipas statistikave, tani numri i fëmijëve në fshat që jetojnë pa prindërit ka arritur në 60 milionë. Për shkak të mungesës së dashurisë dhe të kujdesit të prindërve, gjatë rritjes së këtyre fëmijëve lindin shumë probleme. Filmi "Fëmijët që jetojnë pa prindërit" pasqyron pikërisht këtë problem të shoqërisë kineze. Në film, prindërit e personazhit kryesor Wang Xiaofu punojnë jashtë vendlindjes dhe Wang Xiaofu jeton së bashku me gjyshen, por gjyshja nuk di se si ta edukojë fëmijën. Personazhi tjetër kryesor Du Xiaowei jeton së bashku me gjyshin e sëmurë dhe kujdeset për tërë familjen. Disa fëmijë rriten pa kujdesin e prindërve, ata merren me rrahje madje edhe vjedhin para. Në fund, gjendja e tyre tërhoqi vëmendjen e policëve dhe të mësuesve. Qeveria vendore ndërtoi "Familjen e fëmijëve që jetojnë pa prindërit" për t'u krijuar një mjedis të mirë të rritjes.

Duke folur për shkakun e xhirimit të këtij filmi, Liu Junyi tha i emocionuar:

"Problemi i fëmijëve që jetojnë pa prindërit ka tërhequr vëmendje të gjerë. Jam i mendimit se artistët kanë përgjegjësi ta shfaqin jetën e këtyre fëmijëve."

Filmi "Fëmijët që jetojnë pa prindërit" u xhirua në Xiangfan të provincës Hubei, vendlindja e Liu Junyi-s. Personazhet e filmit flasin në dialektin e Xiangfanit. Liu Junyi e xhiroi këtë film me teknikën e filmit dokumentar dhe përdori shumë aktorë amatorë, sepse ai është i mendimit se kështu filmi do të jetë më i vërtetë. Shumë kritikë të filmit u shprehën se "Fëmijët që jetojnë pa prindërit" është një film i thjeshtë dhe prekës. Por në tregun e sotëm të filmit në Kinë, filma si "Fëmijët që jetojnë pa prindërit" kanë vështirësi të fitojnë të ardhura të larta, disa prej tyre madje nuk mund të mbulojnë koston e xhirimit. Liu Junyi e xhiroi këtë film me fondet e shoqërisë së vet. Ai tha:

"Artistët duhet të kenë përgjegjësinë shoqërore. Jam shumë i prekur se pas shfaqjes, qarqet e ndryshme shoqërore kanë shprehur admirimin e lartë për këtë film."

Liu Junyi ka marrë shumë letra nga shikuesit. Këta shikues u shprehën se ata do t'u kushtojnë vëmendje fëmijëve që jetojnë pa prindërit dhe do t'u japin ndihmë brenda mundësive.

Krahas filmit "Fëmijët që jetojnë pa prindërit", Liu Junyi ka xhiruar edhe filmat "Një milion", "E vetmja dashuri", "Dashuria në internet", dramë televizive "Hije", filmin dokumentar "Ten Hsiao Pin" etj.

Në qarqet kinematografike kineze ka shumë regjisorë të rinj të talentuar. Filmat e tyre fitojnë shpesh çmim në festivalet e huaja të filmit, por të ardhurat në tregun vendës nuk janë shumë të larta. Liu Junyi është një prej tyre. Duke folur për këtë gjendje, ai tha:

"Jam i mendimit se regjisorët e rinj nuk duhet të ankohen për gjendjen e vështirë, përkundrazi duhet të bëjnë përpjekje më të mëdha. Njëkohësisht organet administrative dhe regjisorë të famshëm duhet t'i përkrahin më tej regjisorët e rinj. Jemi të bindur se kemi aftësi të xhirojmë filma që mirëpriten nga shikuesit."

Krahas rezultateve në fushën e filmit, Liu Junyi ka pasur edhe rezultate në fushën e poemave. Ai hapi në internet një blog poemash që ka tërhequr shumë admirues të tyre. Liu Junyi u shpreh se krijimtaria e poemave është një gjë e domosdoshme në jetën e tij. (Fani)